افغانستاننینگ قندوز ولایتیده، طالبان استخبارات ادارهسی خادملری بوندن بیر آی ایلگری (سهشنبه کونی، ۱۶ – جدی)، ناظره رشیدی ناملی ژورنالیست عیالنی باشقه اوچ عیال بیلن بیرگه حبسگه آلگن اېدی.
بو اۉزبېک عیالنینگ حبسگه آلینیشیدن بیر آی زمان اۉتگن بۉلسه-ده بیراق حاضرگچه طالبان نیمه سبب بو عیالنی قماقخانهده سقلب تورگنی حقیده قانیقرلی و آچیق جواب بېرگن اېمس.
قندوز ولایتیدن محلی منبعلردن بیرینینگ اۉزبېک تیوی بیلن شریک قیلگن معلوماتی اساسیده، طالبان ناظره رشیدی بیلن بیرگه حبسگه آلینگن عیاللردن ایکّی کیشینی آزاد قیلگن بیراق خانم رشیدی و اونینگ بیرگهسیدهگی ینه بیر دوستی تقدیری هلی بېللی اېمس.
منبع اۉزبېک تیوی ژورنالیستی بیلن بۉلگن صحبتیده ایتیشیچه «خوفسیزلیک کوچلر ناظره رشیدی دوستلری بیلن که همهسی عیاللر اېدی اۉلتیرگنلریده اولرنی حبسگه آلیب کېتگن، حاضرگچه مساله هیچ بېللی اېمس، بولر نیمه اوچون اوشلنگنی حقیده توزوک معلومات بېریلمهیدی.»
قندوزلیک بو ژورنالیست عیالنینگ حبسگه آلینیشی کېنگ تنقیدلرگه هم سبب بۉلیب، ژورنالیست و عیاللر حقلرینی مدافعه قیلووچی تشکیلاتلر، رشیدی تېزلیک بیلن آزاد اېتیلیشینی طلب قیلگن اېدی.
شونینگدېک خانم رشیدینینگ یقینلری و عایلهسی هم اونینگ احوالی آغیرلیگیدن خواطر بیلدیریب، بو عیال آزاد اېتیلیشینی طلب قیلگن اېدی.
طالبان اېسه اوشبو عیال نیمه سبب قماقده سقلنیب کېلهیاتکنی حقیده هیچ قندهی بېلگی بېرگن اېمس.
