امریکا قوشمه ایالتلرینینگ فیلادلفیا شهریده، امیرالکلام میرعلیشیر نوایی و ظهیرالدین محمدبابر حضرتلرینینگ توغیلگن کونیگه بغیشلب، احتفال اۉتکزیلدی.
امریکاده یشاوچی اۉزبېک فعاللرنینگ تیمور ناملی اجتماعی و مدنی انجمنی تشبثی بیلن اۉتکزیلگن اوشبو احتفالده، ضیالیلر، فعاللر و مدنیتسیور سیمالر اشتراک اېتگن.
بو حقده اۉزبېک تیوی اختیاریده قۉییلگن معلوماتده ایتیلیشیچه: «اوشبو احتفال تیمور اجتماعی و مدنی انجمنی تشبثی بیلن اویوشتیریلیب، اونده بیر قطار فرهنگی شخصیتلر، اجتماعی فعال کیشیلر و مدنیتسیور یاشلر قتنشگن اېدی.»
ییغینده، تاریخیمیزنینگ پارلاق بو ایککی سیماسی اۉزلریدن قالدیرگن علمی و ادبی میراثلری حقیده صحبتلر بۉلینگن.
تیمور اجتماعی و مدنی انجمنینینگ مطبوعات بۉلیمی معلوماتیگه کۉره، ییغین اشتراکچیلری تاریخی بو ایککی سیمانینگ ادبیات، سیاست و مدنیت بۉییچه بجرگن اونملی ایشلریدن اېسلب، شوندی احتفاللر اۉتکزیلیشی دوامینی تاکید قیلگنلر.
ایتیش کېرهک که اۉزبېک/تورک تاریخینینگ ییریک سیمالریدن بۉلمیش، بویوک ادیب و دانشمند حضرت امیرالکلام میرعلیشیر نوایی همده شاه و شاعر و بابریلر سلالهسینینگ اساسچیسی حضرت ظهیرالدین محمدبابر حضرتلرینینگ توغیلگن کونلری یېتیب کېلر اېکن، بو خاص کونلرگه بغیشلنیب احتفاللر و ییغینلر تشکیل اېتیلماقده دیر.
