کابلده بابر باغیده بابریلر سلالهسینینگ اساسچیسی همده دنیا تاریخی آز اوچرهتگن عدالتلی شاه، استعدادلی شاعر، اوستون قلملی یازووچی همده بویوک سرکرده و دولت اربابی ظهیرالدین محمد بابر مقبرهسینی زیارت قیلگنی بارگنینگیزده آق تاشده یازیلگن بو اولوغ ذاتنینگ جانشینی همایون شاهگه قیلگن وصیتنامهسینی اۉقیب کۉریشینگیز ممکن.
بابر کمیده ۱۴۰ کلمهلیک بو وصیتنامهسیده بیر عالم معنا و رهنماییلیکنی اۉقیب، بابرنینگ توشینچهسی قنچهلیک کېنگ و عدالتلی بۉلگنینی بیلیب آلیشینگیز ممکن.
بویوک شاه و شاعر اۉزینینگ وصیتنامهسینی مذهبی نفاقلردن اوزاقده بۉلیش کېرهکلیگی بیلن باشلهیدی و اۉزیدن کېین بابریلر سلالهسینینگ پادشاهیگه بیرینچی بۉلیب اۉز یورهگینگدن مذهبی تعصبنی یۉق قیلگن و هر بیر آدم بیلن اۉز مذهبی بویروغلری اساسیده عدالت قیلگن دېب شوندی یازهدی: «سېنگه لازم دیر که مذهبی تعصبلرنی یورهک لوحدن تازه قیلسهین، هر مذهبنینگ اۉز طریقیگه موافق عدالت قیلگن.»
شونینگدېک بابر، هندوستاننینگ هندو باور اهالیسی رنج اېتمسلیگی اوچون اېنک/سېگیرنی قربان قیلیشدن وازکیچیشینی بویورهدی اۉز اۉغلیگه. بو مساله بابر قنچهلیک عدالتپرور اېکنلیگینی کۉرسهتَدی. یوزلب ییل ایلگری شوندهی عدالتلی و کېنگ تفکرگه اېگهلیک البته بو ظهیرالدین محمدبابر دېک بویوک بیر ذاتدن چیقهدی.
بابرنینگ قیمتلی بو سۉزلری حاضرگی کونده شوندهی بیر مملکت پایتختیده تورگن که بو مملکتنینگ حاکملری باشقه دین و مذهبلرگه تېگیشلی خلقلر باشقه بیر تامانده، اولر بیلن بیر دین و مذهبده بۉلگن باشقهلرگه چیدهشلری یۉق و اسلام آتی بیلن حکومت قیلیب، باشقه مسلمانلرگه قرشی قرار چیقریب کېلماقده دیر.
بابر شوندهی حرکتلر اوچون هم بیر عاقبتنی انیقلب کېتگن. بابر وصیتنامهسینینگ ینه بیر بۉلیمیده عدالت قیلمهگن و خلقنی رنج بېرگن حاکمیت عاقبتی حقیده شوندی یازهدی: «منازعهلر و یامان گمانلر فرمانروالیکنینگ زهری دیر، جهانده عدالتنی کېنگهیتیریشنی تَنله. شاه رعیتدن و رعیت شاهدن آسوده بۉلسین.»
بابر اۉز وصیتنامهسیده اۉغلینی حضرت امیر تېمور صاحبقران قیلگن ایشلریگه اعتبار قرهتیشینی بویورهدی. بو دېگنی بابر سۉزلهیاتکن عدالت و کېنگ توشینچهلیک تفکر حضرت امیر تېموردن میراق قالیب کېلهیاتگنی بیلینهدی.
