فاریاب ولایتیده طالبان امنیه قومندانلیگینینگ اعلام قیلیشیچه، بو ولایتده کانلرنی ناقانونی قازیش بیلن شغللنگن ایکّی کیشی حبسگه آلینگن.
طالبان ادعاسیگه کۉره، بو شخصلر فاریاب ولایتی گرزیوان اولسواللیگیده اۉتگن کېچه ساعت ۳ اطرافیده مخصوص اوسکونهلر بیلن یېرلرنی قازیب، تاریخی یادگارلیکلر و بویوملرنی قیدریشده بۉلگن.
مذکور شخصلر گرزیوان اولسواللیگی بادگه قیشلاغینینگ سریدره قیشلاغیده حبسگه آلینگن.
طالبان اوشبو شخصلر همده بو یېرده قندهی تاریخی بویوملر و یادگارلیکلرنی قیدیریب تورگنی حقیده تۉلیق تفصیلات بېرگن اېمس.
ایتیش کېرهککه طالبان حاکمیتیده، افغانستان شمال و شمالشرقی حدودلریدهگی تاریخی آبدهلر خوفسیزلیگی خواطر آستیگه توشیب قالگن.
بوندن ایلگری، تخار ولایتیدهگی محلی منبعلر بو ولایتنینگ آیخانم منطقهسیده طالبان حمایهسیده بۉلگن شخصلر ناقانونی قازیش ایشلرنی عملگه آشیریب تاریخی بویوملرنی قیدیریشگه اورینگنیدن خبر بېرگن اېدی.
