بیرلشگن ملتلر تشکیلاتینینگ انسان حقلری بۉییچه مخصوص گزارشگری ریچارد بنت، اۉزینینگ سۉنگگی گزارشیده افغانستان ساغلیقنی سقلش ساحهسی عیال خادملر، اینیقسه عیال داکترلر یېتیشماوچیلیگی بیلن جدّي یوزمه-یوز کېلهیاتگنینی تأکیدلهدی.
گزارشگه کۉره، سۉنگگی تحلیل نتیجهلری عیاللرنینگ ساغلیقنی سقلش تیزیمیدهگی اولوشی جوده پست اېکنینی کۉرسهتهدی: عیاللر عمومي (متخصص بۉلمهگن) داکترلرنینگ۲۷ فایزینی، متخصص داکترلرنینگ۱۸ فایزینی و نرسلرنینگ۲۹ فایزینی تشکیل اېتهدی. بنتنینگ ایتیشیچه، بو کۉرستکیچلر، اینیقسه عیاللر و قیزلر اوچون ضرور بۉلگن طبي احتیاجلرنی قاندیریشده یېترلی اېمس.
گزارشده طالبان تامانیدن جاري اېتیلگن سیاستلر جملهدن، عیاللرنینگ تعلیم آلیشی، ایشلشی، اېرکین حرکتلنیشی و جماعت حیاتیدهگی اشتراکینی چېکلش افغانستان ساغلیقنی سقلش تیزیمیگه چوقور و اوزاق مدتلی ضرر یېتکزهیاتگنی قید اېتیلگن.
مذکور گزارشده ایتیلیشیچه،۲۰۲۴-ییلده طبي تعلیم نینگ تعقیقلنیشی نهفقط حاضرگی ساغلیقنی سقلش خدمتلرینی ایزدن چیقرگن، بلکه ساغلیقنی سقلش ساحهسینینگ کېلهجکدهگی برقرارلیگینی هم جدّي ضعیفلشتیرگن.
طالبان اوّل قیزلر اوچون آلتینچی صنفدن یوقاری مکتبلرو بیلیم یورتلرینی یاپگن اېدی؛ طبیات انستیتوتلری اېسه اۉتگن ییلگچه عیاللر اوچون آچیق بۉلیب کېلگن، بیراق اولر هم طالبان رهبری بویروغی بیلن یاپیلدی.
ریچارد بنتنینگ تأکیدلشیچه، طالبان عیاللرنینگ طبیات، نرسلیک، قابلهلیک و ساغلیق بیلن باغلیق باشقه تعلیملرگه کیریشینی چېکلش آرقهلی مملکت ساغلیقنی سقلش تیزیمینینگ اساسلرینی یېمیرماقده.
شونینگدېک، حساباتگه کۉره، ساغلیقنی سقلش ساحهسیده ایشلهیاتگن عیاللر تقاعدگه چیقیش، مجبوري ایشدن بۉشهتیش یاکه مهاجرت قیلیشگه مجبور بۉلماقده. بو حالت، اینیقسه قیشلاق و چېکّه حدودلرده، بوتون جماعهلرنی ملَکهلی و خوفسیز طبي یاردم کۉرسته آلهدیگن خادملرسیز قالدیرماقده.
