پاکستان مدافعه وزیری خواجه محمدآصف، بو مملکت حربی کوچلری و طالبان اۉرتهسیده یوز بېرگن تۉقنهشوو برابریده جدّی مناسبت بیلدیریب، اېندی آچیق اوروش باشلنگنیدن خبر بېردی.
خواجه آصفنینگ ادعا قیلیشیچه، طالبان آرتیده هندوستان بار و شو سبب پاکستان بیلن اوروش باشلهگن.
شو بیلن بیرگه طالبان و پاکستاننینگ بو تۉقنهشوولری باشقه مناسبتلرنی هم اۉرتهگه آلیب کېلگن.
بیرلشگن ملتلر تشکیلاتینینگ باش کاتبی آنتونیو گوتریش بو تۉقنهشوو خصوصیده اۉز خواطرینی بیلدیریب، اوروش تامانلریدن تینچ اهالی جانی سقلنیشی اوچون اعتبار قرهتیشلرینی سۉرهگن.
ایران تشقی ایشلر وزیرلیگی بو تۉقنهشوو خصوصیده مناسبت بیلدیریب، ایکّی تاماندن تارتیشوولر سۉزلشوو آرقهلی حل اېتیشلرینی طلب قیلگن.
عین حالده افغانستان سابق جمهور باشلیغی حامد کرزی هم بو خصوصده مناسبت بیلدیریب، پاکستانگه بمباردمان بیلن اۉزی یرهتگن معمالرنی حل قیلیشی ممکن اېمس دېب بیلدیرگن.
ایتیش کېرهک که طالبان جنگریلری پاکستاننینگ سۉنگّی هوا هجوملریگه اۉتگن کېچه تۉقنهشوو باشلب کېچه ۱۲ده بو هجوم یکونلنگنیدن خبر بېرگن اېدی.
پاکستان مدافعه وزیری اېسه بو اوروش یکونلنمهگنی بلکه آچیق بیرحالده دوام اېتهیاتگنینی بیلدیرگن.
