بیرلشگن ملتلر تشکیلاتی باش کاتبی آنتونیو گوترش طالبان و پاکستان اۉرتهسیده زۉرآورلیک کوچهیگنی و تۉقنهشوولر یوز بېرهیاتگنیدن چوقور تشویش بیلدیرگن.
بیرلشگن ملتلر تشکیلاتی باش کاتبی هر ایکّی تاماننی تینچ اهالینی حمایه قیلیش مسألهسینی زودلیک بیلن اوستوار وظیفه صفتیده کۉریشگه چقیرگن.
گوترش طالبان و پاکستاندن خلقارا حقوق، اینیقسه خلقارا بشردوستانه حقوق دایرهسیدهگی مجبوريتلریگه رعایه قیلیشنی طلب قیلگن.
طالبان پاکستاننینگ پکتیکا و ننگرهار ولایتلریگه اویوشتیرگن هوا هجوملریگه جوابن کېچه پاکستانگه قرشی جواب ضربهلری بېرگن و چېگرهده تۉقنهشوولر باشلنگن.
بو هجوملردن سۉنگ پاکستان بوگون اېرتهلب (جمعه،۸ حوت) کابل، قندههار و پکتیکا حدودلریدهگی اَیریم نقطهلرنی بامباردمان قیلگن.
منبعلر نینگ «اطلاعات روز» گزېتهسیگه معلوم قیلیشیچه، طالباننینگ حربي مرکزلری و قۉشین قوماندانلیکلری نشانگه آلینگن.
طالبان بو بامباردمانلرنی تصدیقلهگن، بیراق قربانلر بۉلمهگنینی ایتگن.
ایکّی تامان تۉقنهشوولر چاغیدهگی تلفاتلر بارهسیده بیر-بیریگه ضد دعوالرنی ایلگری سوریب، قرشی تامانگه کتّه یۉقاتیشلر یېتکزیلگنینی تأکیدلهماقده.
پاکستاننینگ جاري هفته شنبه کېچهسی پکتیکا و ننگرهار ولایتلریگه قیلگن هوا هجوملری عاقبتیده ننگرهارده ۱۷ کیشی، جملهدن ۱۱ نفر باله هلاک بۉلگن.
بیرلشگن ملتلر تشکیلاتینینگ افغانستاندهگی یاردم ادارهسی (یوناما)نینگ معلوم قیلیشیچه، اوشبو هجوملر نتیجهسیده ننگرهارده ۱۳ نفر تینچ اهالی هلاک بۉلگن و ینه ۷ نفر فقرا جراحتلنگن.
