دکتور عبدالسلام آثم محمد عظیم فرزندی, 1331. ییلی حمل آیی نینگ بیرینچی کونی یا اېرگنهقون کونیده, فاریاب ولایت نینگ میمنه شهریده توغیلگن. آثم، ایلک تعلیملرینی 1338. ییلی میمنه شهریدهگی عربخانه آتلی مکتبده باشلهگن. 1350. ییلی ابو عبید جوزجانی لیسهسیده مکتبنی تماملهگن. او، 1352. ییلی کابل بیلیم یورتی طب فاکولتهسیده عالی اۉقیشگه کیریب, 1357 ییلی موفقیت بیلن یکونلهگن. 1358 و 1362 ییلر آرهلیگیده کابلده مذکور بیلیم یورتی نینگ علمی اۉرین باسری صفتیده ایشلهگن.
- ییلیدن باشلهب, روحی ساغلیک ریاستی نینگ اۉرین باسری صفتیده ایشگه باشلهگن و بو ساحهده اۉزینی کۉپراق کیلیشتیریش اوچون دنیا ساغلیک تشکیلاتی نینگ بورسلریدن فایدهلهنیب؛ هندوستان, مصر, پولند و سیویس اۉلکهلریگه بارگن. قالهبیرسه ایران, پاکستان و هندوستانده روحی کسللیکلر و معتادلر نینگ تداویسی یا ساغلیگیگه تیگیشلی تحقیقی ایشلرنی ایلگری آلیب بارگن. روح ساغلیگینی تامینلهش و نیشه قیلووچی مادهگه قرشی مجادله اوچون توزهلگن اولوسلر ارا علمی ییغلیشلرگه تورت مرتبه اۉلکهمیز نینگ نمایندهسی صفتیده قتنشیب اۉز اولوشینی قوشگن.
آثم جنابلری نینگ معنویت دنیاسی اۉزگچه بۉلگن. بو سۉزیمیزنی اولرنینگ حیات ایزلریده یقال کۉریشیمیز ممکن. حرمتلی داکتر جنابلری شوندهی دیدیلر:
“مین، تاقچه و کتابلیک رفلری کتابدن توله بۉلگن بیر عایلهده دنیاگه کېلگنمن. قیش کېچهلری اۉییمیزده کتاب اۉقیلر اېدی. بوتون قونی-قوشنیلریمیز کېلیب قولاق سالر اېدیلر. کتابلر جنگنامه و منظوم حکایهلردن عبارت بۉلیب، اېسکی شیوه بیلن اۉزبېک تیلیده یازیلگن اېدی. کتاب اۉقیش وظیفهسی رحمتلی آتهم ملا محمد عظیم و رحمتلی اکهم میرزا محمد یونس گه عاید اېدی؛ سوادیم چیققندن کېین بو ایش مینگه تاپشیریلدی. کیچیک یاشلریمده یخشی حافظهم بار اېدی. اینیقسه، قیزیق حکایهلر و یخشی شعرلر اۉزون مدتده اېسیمده قالر اېدی. 8. صنفده اېکن نظم یازماققه باشلهدیم بو 1346 ییلیگه تۉغری کېلهدی. رحمتلی سید احمد بینا آتلی فاریاب نینگ مشهور شاعری بیلن تانیشیب، او کیشیگه شاگرد بۉلدیم. حرمتلی استـاذیم کۉپ التفات کۉرسهتیب، شعر یازیشگه استعداد اېگهسی اېکنسن دېب، سېوینچلی خبر بېردیلر. اولر دایمی یوسینده یازگن شعرلریمنی کۉپ علاقه بیلن اصلاح قیلر اېدیلر. آز مدتدن کېین استاذیم نینگ تشویق و توصیهسی بیلن میمنهده نشر بۉلهدیگان فاریاب آتلی جریدهگه آنه وصفیده یازیلگن بیر پارچه شعریمنی ترقهلیش اوچون بېردیم و تیزلیکده باسیمدن چیقدی. اوندن کېین مذکور جریده و باشقه نشریهلرده شعرلریم باسیمدن چیقه باشلهدی. شوندهی قیلیب، کتته-کیچیک احتفاللرده و کنفراسلرده شعر اۉقیش اوچون مینی دعوت قیلر اېدیلر.”
اونینگ شعرلری نینگ مضمونلری کۉپینچه اجتماعی موضوعلر حقیده یازیلگن بۉلسه-ده, اولرده یخشی نغمه-میلودی جلوهلری کۉزگه تیگهدی.
عبدالسلام نینگ اۉزبېکچه شعری تۉپلمی 1362. ییلی «ینگی آچیلگن گللر» عنوانی بیلن, افغانستان شاعرلر و یازرلر اویوشمهسی تمانیدن باسیمدن چیققن. بو کتاب مملکت مقیاسیده اۉزبېک تیلیده چاپ قیلینگن, بیرینچی تۉپلم صفتیده تانیلدی. ینه ایکی تیل یعنی اۉزبېکچه و فارسچه تیللریده یازگن شعری تۉپلمی ترقهتیلیش اوچون حاضر دیر. بولردن تشقری شعرلری، 1350. ییللری نینگ سۉنگیده کابلده باسیمدن چیققن اۉزبېکچه درسلیک کتابلر نینگ صفحهلرینی هم بیزهگن. قۉشمچه قیلیب ایتگنده، داکتر آثم اۉزبېکچه و فارسچه تیللریده کۉپلب تصنیفلر یازگن که مشهور اشولهچیلر اۉقیگنلر. اونینگ اۉزبېکچه و فارسچهگه یازگن ایریم مقالهلری افغانستان و ایریم تشقی اۉلکهلرده باسیلگن. داکتر آثم نینک اثرلری ایکی تیلده هم اوستالیک بیلن یازیلگن دیر.
یورتیمیز نینگ شرایطیدن قطع نظر, داکتر آثم اۉزبېک کلتوری بۉلسین می، علمی تدقیقات یا توره بوییچه فعالیتلرده دایما فدایلیک قیلیب خلقیگه خدمت قیلیب کېلگن. بیراق، کېز نینگ شفقتسیزلیگی طفیلی ایریم یازگن شعرلری, بیر قنچه ترجمه بۉلگن ایشلری و قۉل یازمه کتابلری اوروش سببلی مهاجرتگه مجبور بۉلگن پیتیده, یۉقالیب کېتگن و ایریملری کیشیلر تمانیدن اۉغیرلنگن.
داکتر عبدالسلام آثم حقیقت ایزلاوچیسی صفتیده علم تیلی بیلن هم, شعر تیلی بیلن هم سۉزلهیدی؛ انسان آنگینی نهفقط علمی تدقیقاتلر آرقهلی, بلکه ادبی سۉزلر یۉلی بیلن هم تدقیق قیلهدی. او, فرقلی ساحهلرده ایشلب، چین یورهکدن خلقیگه خدمت قیلگن. فقط قوییدهگی یونهلشلرده فعالیتلری چیکلنمهگن. بلکه اجتماعی و علمی بۉلیملرده هم اۉز خلقیگه و تورهسیگه خدمت قیلیش وظیفهسینی اۉز عهدهسیگه آلگن. اونینگ ایریم فعالیتلری:
– افغانستان روح ساغلیگی رضاکارلر اویوشمهسی نینگ اۉرین باسری.
– افغانستان شاعرلر و یازووچیلر اویوشمهسی نینگ مرکزی شورا عضوی.
– امیر علی شیر نوایی فرهنگی اویشمهسی نینگ مرکزی شوراسی نینگ باشلیغی و اساچیلریدن بیری.
اجتماعی و علمی وظیفهلری یانیده بجرگن ماموریتلرگه هم دقتمیزنی قرهتهمیز:
– 1350 و 1351 ییللری فاریاب ولایتی نینگ میمنه شهریده معارف مدیرلیگیده کاتب صفتیده.
– 1358 و 1364 ییللر آرهسیده کابلده طبی بیلیملر انستیوتی نینگ استادی و علمی اۉرین باسری.
– 1365 و 1366 ییللرده, افغانستان روح ساغلیک ریاستی نینگ اۉرین باسری.
– 1367 و 1370 ییللر آرهلیگیده کابلده روح ساغلیک شفاخانهسی نینگ باشلیغی.
– 1371 و 1373 ییللریده, افغانستان شمالی ولایتلری نینگ عامه ساغلیک باشلیغی و ملی اسلامی جنبشی نینگ اۉرین باسری.
– 1373 و 1375 ییللریده اېسه انقرهده افغانستان دولتی نینگ سفیری.
عبدالسلام آثم، ادبی و ساغلیک یۉنهلیشیده قیلگن خدمتلری و علمی فعالیتلری باعث, افغانستان شاعرلر و یازرلر اویشمهسی, عامه ساغلیک وزیرلیگی تشکیلاتی (دبلیو. ایچ او) تمانیدن 30دن آرتیق معنوی تشویق و مقتاولرگه لایق کۉریلگن.
بوکون خلقیمیز هر تمانلمه تدقیقاتلر و علمی فعالیتلرگه چنقاق دیرلر. داکتر عبدالسلام آثم نینگ فعالیتلری اېسه سینچکاو یاشلریمیز اوچون اېنگ کتته و معتبر قیناق دیر. اۉقیگن بۉلیمی و فعالیتلری نینگ تضادیگه قرهمهی، او خلقیگه خدمت قیلیشنی هیچ قچان اېسیدن چیقارمهگن. داکتر صاحبگه جان ساغلیگی بیلن اۉزون عمر تیلهب قالهمیز.
