امریکا جمهور رییسی دونالد ترامپ، ینه ایران حربي کوچلریدن قوراللرینی تشلب، تسلیم بۉلیشنی سۉرهدی و بونینگ عوضیگه اولرگه خوفسیزلیک کفالتی بېریلیشینی ایتدی. او، عکس حالده اولر اۉلدیریلیشینی آگاهلنتیردی.
امریکا جمهور رییسی تیناوون (پنجشنبه، ۱۴حوت) شوندهی دېدی: «مېن ینه بیر بار ایران اسلامي سپاهپاسداران، اوردو و پولیس نینگ برچه اعضالریدن قوراللرینی تشلشنی سۉرهیمن. عکس حالده اۉلدیریلهسیز. اېندی ایرانلیکلر تامانیده توریش و مملکتینگیزنی قَیتریب آلیشگه یاردم بېریش وقتی کېلدی»
ترامپ، شونینگدېک، دنیانینگ تورلی مملکتلریده فعالیت یوریتهیاتگن ایران دیپلوماتلریدن باشپناه سۉرهشنی و «کتّهراق صلاحیت همده یخشیراق کېلهجکگه اېگه ینگی ایران»نی برپا اېتیشگه یاردم بېریشنی سۉرهدی.
او ینه شونی ایتدیکی، امریکا ایراننینگ کېلهجکدهگی رهبری شوندهی شخص بۉلیشینی ایستهیدیکی، امریکا، اسرایل و قۉشنی دولتلرنی تهدید قیلمهسین.
ترامپ شونینگدېک، اېرانده آلیب باریلهیاتگن «حماسهی خشم» عملیاتی حقیده گپیریب، بو عملیات رېجهلشتیریلگنیدن انچه آلدینگه کېتگنینی تأکیدلهدی.
امریکا جمهور رییسینینگ ادعا قیلیشیچه، اوشبو عملیات نتیجهسیده اېراننینگ هوا کوچلری، هوا مدافعهسی تیزیملری، اوچاقلری، علاقه تیزیملری، راکتلری و اوچیریش قوریلمهلرینینگ تخمیناً ۶۰-۶۴فایزی یۉق قیلینگن.
بو ایکّی دولتنینگ هجوملریدن سۉنگ ایران هم اسرایل شهرلری و منطقهدهگی امریکا حربي بازهلریگه راکت همده درون هجوملرینی باشلهدی.
اوروش حاضر یېتّینچی کونیگه کیرگن بۉلیب، ایکّی تاماننینگ هجوملری هنوز دوام اېتماقده. شو بیلن بیرگه، یقین شرقده اوروش کېنگهییب کېتیشی ممکنلیگی حقیدهگی خواطرلر کوندن-کونگه آرتیب بارماقده.
