قندوز ولایتینینگ چهاردره تومنیده ۴۵ یشر هاجر بېش بالهنینگ فرزندی اېدی. اونینگ حیاتی عادی آرزولر بیلن باشلنگن اېدی: تینچ اوی، مهربان تورموش اۉرتاغ و فرزندلری اوچون کېلهجک. بیراق، او باشیدن کېچیرگن حقیقت بوندن بوتونلهی باشقچه بۉلدی. قۉرقوو، تحقیر و ظلمتگه تۉله حیات.
هاجر اصلیده قووناق و مهربان قیز اېدی. او ۱۰ کیشیلیک کتته عایلهده اولغهیگن، بېش کیشی سنگیلیسی بار اېدی و او عایلهدهگی اېنگ کتّه قیز اېدی.
هاجرگه ساوچیلر کېلگنیده، آتهسی او کیم، قهیېرلیک اېکنینی هم سۉرهمهی، اونی تورموشگه چیقیشگه مجبور قیلدی.
هاجرنینگ بېش سنگلیسی هم بار اېدی و آتهسی اولرنینگ برچهسینی اوزاق وقت باقهآلمس اېدی. شونینگ اوچون هم تېز تورموشگه چیقیشی کېرهک اېدی. تاکه باشقه سینگیلری هم تورموشگه چیقسهلر. هاجر بو مسلهنینگ قربانی بۉلدی و تورموشگه چیقدی.
اونینگ تورموش اۉرتاغی حمید نفوذلی آدم، بیراق قمارگه بېریلگن و تېز جهلی چیقهدیگن آدم اېدی.
نکاح نینگ باشیده هاجر بیلن یخشی معامله قیلردی. هاجر هم اۉزینی بختلی حس قیلردی. او تینچ و بختلی حیات تاپدیم دېب اۉیلر اېدی. بیر ییل اۉتیب اولر قیز فرزندلی بۉلیشدی. بو اولرنی جوده خرسند قووانتیردی. حیات بیر مدت شو شکلده دوام اېتدی.
کېنچهلیک حمید ایش بهانهسی بیلن هاجر بیلن قندوز شهریگه کۉچ قیلدیلر. او یېرده حربی نظام ایچیده، ملی پولیس صفتیده ایشلهی باشلهدی.
کۉپینچه او بیر نېچه کېچه اویگه کېلمسدی. هاجر اېسه تونلرینی یالغیز و قۉرقوو ایچیده اۉتکزردی. حمید اویگه کېلگنیده اېسه کۉپینچه اۉزگه اېرککلرنی اۉزی و اۉز اۉرتاغلرینی آلیب کېلردی. اولر بیرگه قمار اۉینب، ایچکیلیک ایچردیلر.
هاجر بونگه قرشی چیقیب، بوندهی ایشلرنی اویده قیلیشلریگه یۉل قۉیمسلیککه قرشیلیک کۉرستگنده، تورموش اۉرتاغی اونی اوریب-کتلتکلردی.
بیر نېچه شو جنجاللر بیلن اۉتدی و حاجر ایکّی قیز و ایکّی اۉغیل فرزندلی بۉلدی.
قیزلری اولغهییب بارگن سری، هاجرنینگ تشویشلری هم آرتیب بارردی.
تورموش اۉرتاغی کېچهلری جوده کېچ کېلردی. بغضا کۉزلری قیزهریب، سببسیز غضب بیلن. قمارده یوتقیزگن پیتلری اېسه غضبینی هاجردن چیقرردی. او کۉپ مرته هاجرنی تهدید قیلگن. “اگر سېسینگنی تشقریگه چیقرسنگ، اۉزینگ بیلهسن نیمه بۉلیشینی. مېن پولیس من-هېچ کیم مېنگه هېچ نرسه قیلهآلمهیدی.”
هاجر قۉرقردی. نه فقط اېریدن، بلکه اونینگ آرتیده تورگن تیزیمدن هم. هیچ بیر تشکیلات عیالنینگ سۉزلریگه ایشانمس اېدی. عایلهسی هم آبرو-عزتلری اوچون جیم بۉلیشنی ایستهگندی.
بیراق، جیملیک هر دایم هم یېچیم اېمس اېدی. هاجرنینگ جیملیگی بیلن وضعیت ینه-ده آغیرلشدی. اونینگ اېری ینه عادتدهگیدیک قمارده یوتقیزدی، لېکن بو سفر قرضنی تۉلش اوچون بېرهدیگن هېچ نرسهسی قالمهگن اېدی-فقط قیزلری.
حمید ۱۴ یاشلی قیزینی اۉز قبیلهسیدن بۉلگن بیر ییگیتگه پول عوضیگه بېریب یوباردی. شونده، قمار قرضلرینینگ بیر قسمنی یاپیشی ممکن اېدی.
بیراق، بو هم یېترلی بۉلمهدی. حمیده قرضگه بۉینیگچه باتگن اېدی و آخر عاقبت کېتیشگه قرار قیلدی.
او هاجرنی مجبورلب، اویلرینی و اویدهگی برچه بویوملرنی ساتیب یوباریدی. شوندن کېین اولر یشیرین یۉل بیلن ایرانگه یۉل آلدیلر.
چمهسی بیر هفته ایچیده اولر تهرانگه یېتیب باریشیدی. قۉللریده قالگن آزگینه پول بیلن بیر اوی اجاره آلیب، او یېرده یشهی باشلهدی.
ایرانده هم حیات آسان کېچمهدی. بیر لقمه نان تاپیش اوچون همه ایشلشگه مجبور بۉلیشدی. هاجرنینگ تورموش اۉرتاغی حمید ایش تاپیب، بیر نېچه آی فابریکهده قۉریچی بۉلیب ایشلهدی. حیاتلر سېکین-سېکین یخشیلنهیاتگندېک تویولر اېدی. بیراق، هاجر اېری قیته قمار اۉینشگه باشلهگنیدن خبرسیز اېدی. حمید ینه قمارگه بېریلدی و قۉلیده بار پولنی یوتقیزیب قۉیردی. کېچهلر کۉپ کېچ کېلردی یا هم بیر نېچه کون اویده کېلمس اېدی. آلدینکیدېک اویگه بیر لقمه نان اوچون پول قالمهگندی.
هاجر اوشبو وضعیتدن چرچهگندی. باشقه چیدهشگه حالی یۉق اېدی شو اوچون اۉزی ایشلگه قرار قیلدی. تاکه اېریگه احتیاجی بۉلمهسین. نهایتده هاجر آزیق-آوقت فابریکهسیده محصولرنی قداقلش ایشیده ایشلهی باشلهدی. او قیزینی تیکوو اوستاخانهسیگه ایشگه جایلشتیردی. کتته اۉغیلنی اېسه میوه دکانیگه شاگرد قیلدی.
شو بیلن هاجر عایلهسی نینگ روزغارنی تیبرهتیشگه موفق بۉلدی. فرزنلری و عیالی خبری بۉلمهگن تورموش اۉرتاغی ایریم کېچهلر اوییگه بارردی و اویدهگی بار پوللرنی آلیب کېتردی، خلاص.
ایراندهگی حیات آسان اېمس اېدی، بیراق هېچ بۉلمهگنده هاجر کېچهلری قۉرقوو و تشویش بیلن اوخلهمسدی. معمالر بری-بیر دوام اېتردی. اونینگ یورهگی اېسه اېنگ کۉپ قیزی اوچون اېزیلردی. قیزی اېرینینگ عایلهسی تامانیدن ظلم و زوروانلیککه دوچ کېلهیاتگن اېدی.
شونینگ اوچون هاجر قیزینی هم ایرانگه آلیب کېلشگه قرار قیلدی. تاکه او هم اۉشه ظلمدن قوتولسین. او قیزینی عمهکیسی آرقهلی ایرانگه چقیردی. اېندی قیزی عایلهسی یانیده ایشلب، حیاتینی دوام اېتتیرماقده. بعضا آتهسینینگ آچیق سۉزلریدن هم اذیت چېکهدی. لېکن بری-بیر کوچلی بۉلیشگه، ایشلشگه و ظالم اېریدن بوتونلهی قوتولیشگه حرکت قیلماقده.
بوگون هاجر ۴۵ یاشده. اونینگ حیاتینینگ کۉپ قسمی آغیر و مشقت بیلن اۉتگن. او آلتی ییلدن بېری ایرانده مهاجر بۉلیب یشهیدی. بیراق، مهاجرلر تقدیری هم آسان اېمس. سۉنگگی پیتلردن کۉپلب افغانستانلیکلر ایرانده چیقریب یوباریلماقده.
شو سببلی هاجرنی ینه بیر قۉرقوو قیینهیدی: اۉزی و عایلهسی هم چیقریب یوباریلیشی ممکنلیگی. شونگه قرهمهی، او امیدینی یۉقاتمهیدی و خداگه توکل قیلهدی. ینه اۉشه قرانغو کونلرگه، افغانستاندهگی آغیر حیاتگه قیتمهسلیک اوچون.
برچه قیینچیلیکلر و آغر یوکلرگه قرهمهی، هاجر بیر کونی کېلیب اۉزی کبی جیملیک ایچیده عذاب چېککن عیاللرگه یاردم بېریشنی آرزو قیلهدی. او فرزندلری نینگ کېلهجگی اوچون امید قیلهدی. چونکه اولر اونینگ یگانه امیدی و کوچ قیناغی.
هاجرنینگ حکایهسی-خوفسیزلیک عیال یانیده بۉلیشی کېرهک بۉلگن بیر پیتده، اولرنینگ حیاتیده تهدیدگه ایلنگنینی کۉرستهدیگان بۉغیلیب قالگن هیقیریق دیر.
