طالبلر رهبری هبتالله آخوندزاده پاکستاننینگ افغایستانگه قیلگن هجوملریگه بېواسطه اشاره قیلمسدن، بو گروه حکومتینی کوچ بیلن مغلوب اېتیب بۉلمسلیگینی ایتدی.
طالبان رهبری بوگون (پنجشنبه، ۲۸-حوت) قندهار عیدگاه مسجدیده اۉقیلگن رمضان هییتی نمازیدهگی نطقیده شوندهی دېدی: «اگر بیز تۉپ و اوچاق بیلن یۉق قیلینهدیگن بۉلگنیمیزده، امریکا قۉشمه ایالتلری و روسیه الّهقچان بیزنی یۉق قیلگن بۉلردی.»
هبتالله آخوندزاده، کابلدهگی گیاهوندلیکدن دوالش مرکزیگه قیلینگن قانلی هجومدن اوچ کون اۉتیب نطق سۉزلهگنیگه قرهمهی، بو واقعهگه عموماً تۉختهلمهدی و پاکستان بیلن دوام اېتهیاتگن ماجراگه هم ایضاح بېرمهدی.
او نمازخوانلرگه دین و اعتقادلرینی سقلشنی توصیه قیلیب، شوندهی دېدی: «اگر دینینگیزنی سقلهسنگیز، بوتون دنیا بیرلشسه هم سیزگه ضرر یېتکزه آلمهیدی و تیزیمینگیزنی اۉزگرتیره آلمهیدی.»
شونینگدېک، او جمعیتده نزاع و بۉلینیشلردن آگاهلنتیریب، «انسان حقوقلری» و «عیاللر حقوقلری» نامی بیلن آدملر اۉرتهسیگه اختلاف سالینهیاتگنینی ایتدی.
هبتالله آخوندزاده اهالیدن طالبان توزومی و خوفسیزلیگی اوچون شکر قیلیشنی همده گروه فرمانلری و قانونلریگه عمل قیلیشنی سۉردی.
او نطقیده نرخ-نوا نینگ صنعي آشیریلیشی و ذخیره قیلیش (احتکار) حقیده هم آگاهلنتیریب، بوندهی ایش قیلگنلر گناهکار و جزاگه لایق اېکنینی تأکیدلهدی.
شونینگدېک، او آته-آنهلرنی یاشلر تربیهسیگه اعتبار قرهتیشگه و اولرنی دیني تعلیم اوچون مسجدلرگه یوباریشگه چقیردی.
هبتالله آخوندزاده اۉزینی ینه مسلمانلر «امیری» دېب اتهب، آدملرنی اسلام یۉلیگه باشلش اونینگ ذمّهسیدهگی مسوولیت اېکنینی بیلدیردی.
طالبلر افغانستانده ینه حاکمیتنی قۉلگه آلگنیدن بېری اونی «ا میرالمؤمنین» صفتیده تنیشتیریب کېلهدی و اهالیدن اونینگ فرمانلریگه اطاعت قیلیشنی طلب قیلهدی.
او عید فطر مناسبتی بیلن یۉلهگن پیامیده هم اۉزینی « اولیالامر» دېب اتهب، اونینگ بویروقلریگه بۉیسونیش هر بیر مسلمان اوچون فرض اېکنینی تأکیدلهگن.
بیراق، طالبلر حکومتی کېنگ مقیاسده انسان حقوقلرینی، اینیقسه عیاللر، قیزلر و اېتنیک همده دیني آزچیلیکلر حقوقلرینی بوزیشده عیبلنماقده.
طالبان هبتالله آخوندزاده فرمانلری اساسیده عیاللر نینگ تعلیم آلیشی و ایشلشینی منع قیلینگن همده اولرنینگ جمعیتدهگی اشتراکیگه کېنگ چېکلاولر جاري قیلگن.
بیرلشگن ملتلر تشکیلاتی اېسه طالبان نینگعیاللرگه نسبتاً سیاستینی «انسانیتگه قرشی جنایت» دېب بهالب، اونی «جنسی آپارتاید» صفتیده هم کۉریش ممکنلیگینی بیلدیرگن.
