عیاللر حقلری بۉییچه فعال تشکیلاتلردن بۉلمیش فمنا تشکیلاتی تامانیدن نشر اېتیلگن بیاناتگه کۉره، ۲۰ دن آرتیق انسان حقلری تشکیلاتلری و جماعهلر بیرگهلیکده قوشمه بیانات نشر قیلیب، پاکستان و طالبان اۉرتهسیدهگی تۉقنهشوولر جدّیلشیشیدن خواطر بیلدیرگن.
رواداری تشکیلاتی کبی تانیقلی و مهم تشکیلاتلر تامانیدن هم امضالنگن اوشبو بیاناتده، پاکستان و افغانستان اۉرتهسیدهگی تۉقنهشوولرده تینچ اهالی قربان بۉلیشی خواطرلی اېکنی قید اېتیلگن.
شونینگدېک بو تشکیلاتلر قوشمه بیاتانیده، اوروش توشینچهسی افغانستاننینگ دیاسپورا و سورگوندهگی اهالیسی آرهسیده هم کوچهییب بارهیاتگنیدن خواطر بیلدیریلیب، اوروش هیچ قچان عدالت، برقرارلیک و تینچلیکنی اۉرتهگه آلیب کېلمهی بلکیم ویرانگرلیک، بدرغهلیک و زورهوانلیکلرگه سبب بۉلیشی تاکیدلهنگن.
عینی حالده، بو تشکیلاتلر بیاناتیده، کابلده امید کسلخانهسیگه پاکستان تامانیدن اویوشتیریلگن هجوم و بو هجوم عاقبتیده یوزلب کیشی اۉلیب و یرهنلیشی هم قارهلنگن.
مذکور بیاناتده، بیرلشگن ملتلر تشکیلاتی معلوماتی اساسیده، جاری میلادی ییل فبروری آییدن کیین طالبان و پاکستان اۉرتهسیدهگی اوروش نتیجهسیده ۷۶ کیشی جان بېریب و ۲۱۳ کیشی یرهلنگنی بیلدیریلیب، اوروش دوامی خلق فایدهسیگه اېمسلیگی معلوم قیلینگن.
انسان حقلری بو تشکیلاتلری، اوروش و تۉقنهشوولر تیزلیک بیلن تۉختهتیلیشی، تینچ اهالی قربان بۉلیشی آلدینی آلینیشی، انسان حقلری مجبوریتلری رعایه اېتیلیشی همده تینچ اهالی اویلری، مکتبلر، ساغلیق مرکزلری و حیاتی آست-قورمهلر سقلنیشی اوچون چارهلر کۉریلیشینی هم طلب قیلگن.
شونینگدېک بو تشکیلاتلر، شوندی شرایطده بالهلر و عیاللر کۉپراق ضررلنیشینی بیلدیریب، انسانپرورلیک یاردملر دوام اېتیشینی هم سۉرهگن.
