سۉنگّی ییللرده اۉزبېکستانده کۉزهتیلهیاتگن اۉزگریشلر و بو مملکت حکومتی تامانیدن قۉلگه آلینیب تورگن بعضی-بیر قرارلر، شوکت میرضیایف یېتکچیلیگیده بۉلگن بو مملکت ملی اۉزلیگینی قیته قوریش باسقیچیگه کیرگنینی کۉرستماقده. بو جریان تاریخی میراثنی تیکلش، تورکی قدریتلرنی مستحکملش همده اسلامی قدریتلرنی اعتراف اېتیشگه و رواجنلتیریش کبی حکومت اینتیلیشلرده سیزیلیب تورگن. اۉزبېکستاننینگ مذکور یاندشووی فقط ایچکی مدنی دستورلرگه خلاصه بۉلیب قالمهی بلکه افغانستان اۉزبېکلری اوچون هم ایریم پیام و مسوولیتلرنی تاپشیرهدی.
اۉزبېکستان حکومتی زمانهوی باشقروو بیلن تاریخی ایلدیزلر اۉرتهسیده مضمونلی باغلیقلیک یرهتیشگه اینتیلیب، اۉزینینگ تاریخی قدرت و شان و شوکتیگه اساسلنگن بیر کوچ اولهراق تانیشتیرماقده اېکن، افغانستان اۉزبېکلری هم بو وضعیتگه نسبتن بیفرق بۉلمسلیکلری کېرهک دیر.
اۉزبېکستانده اۉزبېکانه اۉزلیک اساسیدهگی حرکتلر
شوکت میرضیایف رهبرلیگی دوریده تاریخی خاطره و ملی رمزلرگه اعتبار کوچهییب و بو سیاست و یاندهشوو اخیرگی وقتلرده حکومت تامانیدن آلینگن قرارلر و حکومتی سعیوحرکتلر دایرهسیده آچیقچه اعلام اېتیلدی. بو خصوصده تاشکینتده یقینده اۉتکزیلگن طنطنهلی نوروز بیرهمی اۉتکزیلیشی اېنگ اخیرگی نمونه دېب ایتیش ممکن چونکه اۉزبېکستان و قدیمی تورکستان شورویلر تامانیدن باسیب آلینگندن کېیین ایلک مراتبه تاشکینتده دولت رهبری حضوریده تېموریلر بیرقی آسمانگه کۉتریلدی و بو سلالهنینگ اساسچیسی حضرت امیرتېمور و اونینگ درباری قیافهسی نمایش اېتیلدی. بو اېسه تاشکینت اۉزینینگ تاریخی اۉزلیگینی ینه هم حکومتی اعتبار باشیگه آلیب کېلگنی کۉرینهدی.
بوندن تشقری اۉزبېکستان حکومتی اخیرگی آیلر ایچیده، اپریل آیی «امیر تېمور آیی» اعلام اېتیلیشی، تېمور توزوکلری دنیا تیللریده ترقهتیلیشی، تېموریلرگه عاید قۉل-یازمهلر ییغیلیشی و شونگه اۉخشش کۉپلب قرارلرنی قبول قیلدی که بو مملکتنینگ سیاستی اېندی حقیقی مستقللیک و اۉزبېک مدنیتیگه اعتبار قرهتیشنی علیحده مثاللری دیر.
شو بیلن بیرگه یقینده، اۉزبېکستان جمهور باشلیغی شوکت میرضیایف بو مملکتنینگ سرخان دریا ولایتیگه بۉلگن سفری چاغیده امام ترمذی مقبرهسینی زیارت قیلیب، اۉزبېکستانده ینگی اولاد اسلامی و اۉزبېکلرنینگ ملی توشینچهسی اساسیده تربیهلنیشینی بویروق بېردی.
شونینگدېک اۉزبېکستان دولت رهبری اسلامی قدریتلر اساسیده بۉلگن سیاستی یقینده تاشکینتده ییریک اسلامی تمدن مرکزینی هم قوریلگنینی اعلام قیلدی.
دېیرلی بو ملی اۉزلیک و اسلامی توشینچه اساسیده بۉلگن قرارلر بیر نیچه ییللر ایلگری اۉزبېکستانده ممکن بۉلمهگن بیر سیاست کۉرینیب کېلگن اېدی. بیراق حاضر اېسه حکومت کتته اشتیاق بیلن سیاستلرینی ملی اۉزلیک و اسلامی توشینچهسی دایرهسیده ترتیبلشتیرماقده دیر.
شوندهی اېکن بو چاره-تدبیرلر تاریخی اۉزلیکنی مستحکملش، ملی افتخارنی کوچهیتیریش و قدیمی ییریک امپراتورلیکلرنی اساس سالگن اۉتمیش بیلن زمانهوی دولت اۉرتهسیدهگی باغلنیشگه خذمت قیلهدی.
اۉزبېکستانده حکومت سیاستلری و افغانستان اۉزبېکلری
یوقاریده اېسلب اۉتگن اۉزبېکستان حکومتینینگ سیاستیدهگی اۉزگریشلر یالغیز بو مملکتنینگ ایچکی سیاستیده چیکلنیب قالمهی بلکه بیز اخیرگی آیلر و ییللر ایچیده افغانستان اۉزبېکلریگه نسبتن اۉزبېکستاننینگ ایریم ایجابی آدیملریگه گواه اېدیک.
اخیرگی وقتلر ایچیده، اۉزبېکستان حکومتی کمیده ایکّی مراتبه «مزارشریفده نوایی هیکلی یۉق اېتیلیشی» و «بیلیم یورتلر لوحهلریدن اۉزبېکچه یازوولر توشیریلیشی» خصوصیده آچیقچه دخالت قیلیب، طالبانگه بوخصوصده آگاهلنتیریش بېریلدی. بو دېگنی اۉزبېکستان حکومتی قیسی بیر معناده افغانستانده هم اۉزبېک مدنیتی و اۉزبېکلرنینگ مدنی حرکتلریده اولرنی یانیده تورگنینی اعلام قیلدی.
بوندن تشقری، اۉزبېکستانلیک بیر قنچه ژورنالیستلر و فعاللر یقینده افغانستانگه باریب، بو یېرده یشاوچی اۉزبېکلر، جنوبی تورکستان و شونگه اۉخشش اۉزبېک خلقینینگ احوالی حقیده کۉرسهتوولر تیارلب، افغانستاندهگی میلیونلب اۉزبېکلرگه نسبتن فخرلنیشلرینی اعلام قیلدی و اولر بیلن قانداش اېکنلری و بو تاریخی جدالیک یکونلنیشینی تاکیدلب اۉتدیلر. شونینگدېک اۉزبېکستان ایچیده هم «قلمپیر.اۉز» «جدیدلر گزیتهسی» و «دنیا اۉز» یېتکیرمهلری، افغانستان اۉزبېکلری و اولرنینگ ملی دعوالری و اۉزبېکستان خلقی بیلن بیر قان و اېلت بۉلگنلری حقیده مهم کۉرسهتوولر و لوحهلر تیارلب ترقهتدیلر که بو حرکتلر، افغانستان اۉزبېکلرینی اۉزبېکستاننینگ ینگی اولادیگه تانیشتیریش اوچون اۉته مهم و ایجابی آدیم اېدی.
دېیرلی اۉزبېکستانلیک بو ژورنالیستلر و یېتکرمهلرنینگ شوندهی حرکتلری بیر نیچه ییل ایلگری ممکن اېمس اېدی و ممکن دولت سیاستی اونگه رخصت بېرمسه اېدی. حاضر اېسه بو کۉرسهتوولر شونی کۉرسهتدی اۉزبېکستانده هم افغانستانلیک اۉزبېکلر بیلن بیرلهشیش قیته تیکلنماقده و بونگه دولت هم قرشی اېمس دیر.
بو حقده باشقه بیر نرسهنی هم تاکیدلش کېرهک که افغانستانده اۉزبېکستانلیک دیپلوماتلر، اۉزبېکلرگه تېگیشلی احتفاللر و ییغینلرده اشتراک اېتیش اوچون قیزیقیشلری و اۉزبېکلر بیلن علاقهده بۉلیب توریش اوچون حرکتلری بو مملکت حکومتینینگ افغانستانگه نسبتن سیاستیده اۉزبېکلر و بو مدنیت اساسی اۉرین توتگنینی کۉرسهتدی.
شوندهی اېکن افغانستان اۉزبېکلری هم بو شرایطدن فایدهلنیب، اۉزلری بیلن منطقوی بیر کوچنی بیرگه قیلیش اوچون حرکت قیلیشلری کېرهک و بو بارهده اۉزبېکستان بیلن نه فقط سیاسی و فرهنگی باغلنیشلر مستحکملنیش درکار بلکه اقتصادی علاقهلر هم اساسی یۉل توتهدی. حاضر پاکستان چېگرهلری یاپیلگنی و ایراننینگ اوروش وضعیتی افغانستان کۉپلب وارداتی نرسهلر اوچون اۉزبېکستان یۉلیگه باغلیق بۉلیب قالگن. بو وضعیت افغانستان اۉزبېکلری فایدهلنیب، چېگرهده تجارت علاقهلرینی کۉپهیتیریشلری کېرهک تا اۉزبېکستان بیلن اقتصادی علاقه باشقه خلقلرنی قۉلیده توشیب قالمسه و بو علاقه اۉزبېکلر تامانیدن باشقیریلسه. بو بارهده افغانستان و اۉزبېکستان چېگرهسیدهگی مشترک بازار کتته بیر شرایط دیر. بو خصوصده اعتبار قرهتیش نه فقط خلقمیزنی اقتصادی کوچلنیشیگه سبب بۉلهدی بلکه اۉزبېکستانده افغانستان اۉزبېکلریگه نسبتن یخشی مناسبت و حرکتلرنی هم یخشیراق کوتیب آلیش ممکن و نهایت مناسبتلر مستحکملشگه آلیب بارهدی.
