بریتانیانینگ پایتختی لندن شهری بوگون سهشنبه ۴ – حمل، طالبانگه قرشی سیاسی و مدنی فعاللر ییغینیگه میزبانلیک قیلدی.
اوشبو ییغین حقیده حاضرگچه تۉلیق تفصیلات بېریلمهگن و ییغینده انیق نیمه مسالهلر بحث اېتیلگنی و نیمه قرارلر قبول قیلینگنی هم بیللی اېمس.
ییغینده، افغانستان اۉزبېکلری نامیدن نظیف شهرانی، فرهاد ثانی، داکتر گل احمد و عبدالله رحیمی اشتراک اېتگن.
ایریم معلوماتلرگه کۉره، اوشبو ییغین بوندن بیر نیچه آی ایلگری پاکستان پایتختی اسلامآباد شهری میزبانلیگیده اۉتکزیلگن ییغینی دوامی بۉلگن. بیراق بو مساله ییغین تشکیلاتچیلری تامانیدن تصدیقلنگن اېمس.
شونینگدېک ییغینده اشتراک اېتگن فعاللر هم اۉزبېک تیوی گه بو مسالهنی تصدیقلب یا ده رد قیلمهگن.
دېیرلی بو ییغین شوندهی بیرحالده اۉتکزیلماقده دیر که اخیرگی وقتلر ایچیده، طالبان و پاکستان اۉرتهسیده جدّی اوروش و تۉقنهشوولر باشلنگن اېدی. شو سبب ایریم ایشانچلرگه کۉره، پاکستان و شونگه اۉخشش باشقه ایریم تامانلر طالبانگه قرشی سیاسی باسیملرنی کۉپهیتیریشگه اورینیب تورگنی ایتیلماقده.
ایتیش کېرهک که بوندن ایلگری هم، طالبانگه قرشی فعاللر دنیانینگ تورلی مملکتلری و شهرلریده ییغین اۉتکزیب، افغانستان وضعیتی یوزهسیدن بحث قیلگن. بیراق بو ییغینلر حاضرگچه افغانستانده سیاسی بیران اۉزگریش اۉرتهگه کېلیشیگه سبب بۉلگن اېمس.
