رواداری ناملی انسان حقلری تشکیلاتی بوگون چهارشنبه، ۵ – حمل، میلادی ۲۰۲۵- ییل دوامیده، افغانستانده انسان حقلری احوالی خصوصیدهگی اۉز گزارشینی نشر قیلدی.
اوشبو تشکیلات حساباتیگه کۉره، طالبان حاکمیتیده بۉلگن افغانستانده انسان حقلری تورلی ساحهلرده آغیر احوالده دیر و بو وضعیتدن عیاللر، ژورنالیستلر، انسان حقلری فعاللری، قومی و مذهبی گروهلر و شونگه اۉخشش باشقه عادی اهالی ضرر کۉرگن.
رواداری تشکیلاتینینگ حساباتیده میلادی ۲۰۲۵ – ییل دوامیده ناقانونی و اۉز باشیمچهلیک آدم اۉلدیریشلر، اۉز باشیمچهلیک حبسگه آلیشلر، کلتکلش و شونگه اۉخشش باشقه ظالمانه و حقارتلنتیرووچی یاندهشوولری ۲۰۲۴ – ییلگه نسبتن کۉپهیگن.
اوشبو تشکیلاتنینگ گزارشیده، افغانستانده قومی و مذهبی گروهلر اقتصادی و ایش شرایطلریگه قۉل تاپیش، منبعلر و عمومی خذمتلردن فایدهلنیش و مذهبی مراسملرینی اۉتکزیشده چیکلاولر و تعصب بیلن دوچ دیر.
شو بیلن بیرگه، رواداری انسان حقلری تشکیلاتی، افغانستانده عیاللر احوالی ینه-ده آغیر بیر احوالده بۉلگنینی تاکیدلب، طالباننینگ امر بالمعروف و نهی عن المنکر قانونی عملگه آشیریلیشی بیلن خاتین-قیزلر کۉپراق باسیم آستیده قالگنینی معلوم قیلگن.
رواداری انسان حقلری تشکیلاتی، اوشبو وضعیت خصوصیده خواطر بیلدیرر اېکن بو خصوصده تېزلیک بیلن چاره کۉریلیشی کېرهک دېب هم تاکیدلهگن.
ایتیش کېرهک که افغانستان حاکمیتی طالبان قۉلیگه توشگنیدن بیری، مملکتده انسان حقلری احوالی اېنگ آغیر وضعیتده توشیب قالگن.
