طالبلر باش وزیری ملامحمد حسن آخوند تیلفون آرقهلی مالیزیا باش وزیری انور ابراهیم بیلن ینه بیر بار منطقهدهگی وضعیت و طالبان همده پاکستان اۉرتهسیدهگی ماجرالر حقیده صحبتلشدی.
طالبلر مطبوعات سۉزلاوچیسی ذبیحالله مجاهد تیناوون کېچقورون پنجشنبه،۶ حمل ایکس اجتماعی ترماغیده بیانات نشر قیلیب، اوشبو صحبت حقیده معلومات بېردی.
طالبان باش وزیری مذکور تیلفون ملاقاتیده امریکا و اسرایلنینگ ایرانگه هجومیدن کېین منطقهده کېسکینلیک کوچهیگنیدن خواطر بیلدیرگن و بو گروهنینگ اساسي موضع معمالرنی اۉزارا توشونیش و همکارلیک آرقهلی حل قیلیش اېکنینی تأکیدلهگن.
ملا محمدحسن آخوندنینگ قۉشیمچه قیلیشیچه، طالبان رمضان بیرهم سعوديه عربستانی، تورکيه و قطر دولتلرینینگ التماسیگه بناءً پاکستانگه قرشی هجوملرینی تۉختهتیب، اۉزینینگ یخشی نیتینی نمایش اېتگن.
او شوندهی دېگن: «زۉروانلیک هېچ قَیسی تامانگه فایده کېلتیرمهیدی و کېسکینلیکنی کوچهیتیرهدیگن حرکتلردن تيیلیش کېرهک. معمالرنی حل قیلیش اوچون دانالیک و عقل بیلن ایش توتیش لازم.»
طالبان بیاناتیگه کۉره، مالیزیا باش وزیری هم منطقهدهگی وضعیتدن خواطر بیلدیرگن و طالبان همده پاکستان اۉرتهسیدهگی وقتینچهلیک زۉروانلیکنینگ تۉختشی دوام اېتیشیگه همده موجود معمالر مذاکرهلر و اۉزارا توشونیش آرقهلی حل اېتیلیشیگه امید بیلدیرگن.
مالیزيا باش وزیری، شونینگدېک، مملکتی هر ایکّی تامان بیلن اۉزارا توشونیشده بۉلیب، کېسکینلیکنی کمهیتیریشده ایجابي رۉل اۉینشیگه حرکت قیلیشینی ایتگن.
بو طالبان و مالیزيا باش وزیرلری اۉرتهسیده طالبان همده پاکستان اۉرتهسیدهگی ینگی ماجرا باشلنگنیدن بېری ایکّینچی تیلفون ملاقاتی دیر.
