آلماتی “Unity” صنعت اثری آرقهلی انسانلرنی بیرلشتیرماقده
انسانی بیردملیکنی نشانلش
کمپین بریف آسیا (campaign Brief Asia) خبر بېرشیچه؛ آلماتی شهری، بیر ایتنی قوتقریش اوچون انسان زنجیری توزهتگن شهر اهالیسی اېسدهلیگیگه بغیشلنگن برونز صنعت اثرینی، نمایشگه قۉیدی. اېسدهلیک «سیران» سوو آمباری بۉییده-عینا واقعه یوز بېرگن جایده اۉرنهتیلدی. لایحه، فورت بانگ جی اس سی(ForteBang GSC) و دی ا اس ام (DASM) گروهلریگه کیرووچی پروگریسشن آژانسی تشبثی بیلن عملگه آشیریلدی.
بیر نېچه ییل آلدین سیران سوو آمباری (مخزنی) بۉییده بیر ایت قالیب کېتگن اېدی و تیک بیتون دیواریدن اۉزی چیقهآلمسدی. بیر نېچه ناتنیش آدم تۉختب، قۉل اوشلهشیب انسان زنجیری یرهتدیلر. زنجیرلرنینگ سۉنگیدهگی کیشی پستگه اېگیلیب، ایتنی تارتیب آلیب خوفسیز جایگه چیقاردی. کیمدیر بو آننی تیلفون آرقهلی تصویرگه آلدی-ویدیو بوتون دنیاگه ترقهلیب، میلیونلب کۉریندی. ایضاحلرده، اۉنلب تیلده، آدملر بیر خیل فکرنی یازیشدی: “انسانلرنینگ یاردم بېریشگه بۉلگن ایستهگی هر قندهی وضیعتدن کوچلیراق دیر.”
اوشبو هیکل عینا اۉشه واقعهنی قیته یانسهتهدی یا عکس اېتیرهدی. سۉنگی آدمنینگ قۉلی ایتهیلب پنجرهدن تشقریگه اوزهتیلگن. شونده هر بیر یۉلاووچی اونی اوشلب، انسانیلیک زنجیرینینگ بیر قسمیگه ایلنیشی ممکن.
فورت بانگ جیاسسی وکیلی شوندهی دېدی:
“بو حکایه کېتیب قالمهگن انسانلر حقیده. او بیزگه نیمه اوچون بو یېرده بارلیگیمیزنی اېسلهتهدی: بیر-بیریمیزگه یاردم بېریش و قۉللب-قوتلش اوچون. شهرده اېندی منه شوندهی عادی بیراق، مضمونلی حرکتنینگ رمزی بارلیگیدن کیشی فخرلنسه بۉلهدی. بیز اوچون بو شونچهکه بیر لایحه اېمس، بلکه انسانی بیردملیک قدریتینی اېسلهتیش دیر. چونکه، بیز فورتده شونگه ایشانهمیز: بیر کیشی یالغیز بجره آلمهیدیگن ایشلرنی، بیرگهلیکده حرکت قیلسک، اۉشه ایش عملگه آشهدی.”
اوشبو هیکل 22 مارچگه رسمی آچیلیشیدن آلدین وایرال بۉلیب، گلوبل میدیا تیماسیگه اینلدی. آچیلیشدن ایکّی کون آلدین، اۉرنهتیش آقیمیده ایلک صورتلر اجتماعی ترماقلرده تاپیلیب، خبر طبیعی یوسینده قزاقستانده اینیقسه چېگرهلریدن انچه اوزاقده-اسپانیادن آلیب ویتنامگچه، برازیلدن-هندوستانگچه کېنگ ترقلدی.
شو وقت ایچیده انستاگرامدهگی بیرته پوست نینگ اۉزی 2 میلیوندن آرتیق لایک، 36 مینگ ایضاح و 40 میلیون کۉریشگه اېگه بۉلدی. عمومی اورگانیک قمراووی و میدیاده آلدیندن یاریتیلیشی بوتون دنیا بۉیلب 500 میلیوندن آشدی. 20 میلیون اهالیگه اېگه قزاقستانده دېیرلی بو صنعت اثری حقیده بیلمهیدیگن آدم قالمهگن.
اوشبو انشات صنعتی، قزاقستان و مرکزی آسیانینگ اېنگ مشهور زمانهوی رساملریدن بیری، یېربایسون میلادبېکوف تمانیدن یرهتیلگن. اونینگ ایجادی تاریخی حجتلر، تصویرلر، اېسدهلیکلر، لندسکپ و فیگورلر یا شخصیتلر بیلن اویغونلشهدی. اینیقسه، اولرنی اېسدهلیک و کیملیک نقطهی نظریدن قیته تلقین قیلهدی.
میلادبېکوفنینگ اثرلری؛ آنتروپدهگی (M HKA) زمانهوی صنعت موزهیی، هانگ کانگدهگی برگر کولیکشن، +M موزهیی، سینگاپور ملی موزهیی و باشقه ییریک موسسهلر کولیکشنلریده سقلنهدی.
مذکور لایحه آلماتی شهر حاکمیتی تمانیدن قۉللب-قوتلندی.
