هرمز بۉغازیده کېمهلر قتناوینینگ ایزدن چیقیشی، دنیانینگ اېنگ مهم دېنگیز یۉللریدن بیریده یوز بېرهیاتگن معما، اېندیلیکده فقط انرژی بازاریگه اېمس، بلکه اساسي دوالر تأمینات زنجیریگه هم جدّي تأثیر کۉرسهتماقده.
معلوماتلرگه کۉره، کېسکینلیکلردن آلدین اوشبو یۉلکدن کونیگه 100 دن آرتیق کېمه اۉتگن بۉلسه، حاضر بو رقم بیر نېچه کېمهگچه کمهیگن. بو پسهییش دنیا اقتصادی اوچون کېنگ کۉلملی عاقبتلرنی کېلتیریب چیقرماقده.
بیرلشگن ملتلر تشکیلاتی معلوماتلریگه کۉره، دنیادهگی کیمیاوي اۉغیتلرنینگ قریب اوچدن بیر قِسمی عیناً شو یۉل آرقهلی تشیلهدی. متخصصلر حتا قیسقه مدتلی تۉسیلیش هم کۉپلب مملکتلرده اېکینچیلیک موسمینی ایزدن چیقریشی و آزیق-طعام خوفسیزلیگیگه تهدید سالیشینی تأکیدلشماقده.
تکنالوژي ساحهسیده هم بو اوزیلیشلر سېزیلماقده. جهاندهگی گېلي گازینینگ قریب اوچدن بیر قِسمی قطر آرقهلی، عیناً هرمز بۉغازی یۉنهلیشیدن یېتکزیب بېریلهدی. گېلي میکراچیپلر ایشلب چیقریشده مهم اهمیتگه اېگه بۉلیب، او سمرتفانلر، کامپیوترلر و طبي تصویرلش اوسکونهلریده قۉللنیلهدی.
دارو-درمان ساحهسی هم خرجتلر آشیشی خوفی آستیده. مېتانال و اېتیلېن کبی نفت-کیمیا محصولاتلری، اولرنینگ کتّه قِسمی فارس کۉرفزی دولتلریدن اېکسپورت قیلینهدی، انتیبیاتیکلر و واکسینهلر ایشلب چیقریشده مهم رۉل اۉینهیدی. اوشبو مادّهلر اېکسپورتیدهگی اوزیلیشلر گلوبل بازارده دارو نرخلرینینگ آشیشیگه آلیب کېلیشی ممکن.
شونینگدېک، اوشبو یۉنهلیش آرقهلی تشیلهدیگن ینه بیر مهم محصولات، آلتینگوگرد بۉلیب، او اۉغیت ایشلب چیقریشده و بطریلرده ایشلهتیلهدیگن مېتالرنی قزیب آلیشده ضرور حسابلنهدی. اونینگ تأمیناتیدهگی اوزیلیشلر الکترون و انرژی محصولاتلری نرخینینگ آشیشیگه سبب بۉلیشی ممکن.
عموماً آلگنده، هرمز بۉغازی فقط نفت تشیش یۉلی اېمس، بلکه گلوبل سودا اوچون استراتژیک «تار بۉغین» حسابلنهدی. اونینگ یاپیلیشی آزیق-طعام تأمیناتیدن تارتیب ساغلیقنی سقلش و تکنالوژي صناعتیگچه بۉلگن کۉپلب ساحهلرگه تأثیر کۉرسهتیشی ممکن.
