ایران پارلمانی باشلیغی محمدباقر قالیباف، اوروش نینگ ۳۰ کونی مناسبتی بیلن نشر قیلگن بیاناتیده امریکا قۉشمه ایالتلری آچیقچهسیگه مذاکره و ملاقات خبرلرینی یوبارهیاتگنینی، اما یشیرین طرزده اېسه ایران اوستیگه قوروقلیکدن هجوم رېجهلرینی توزهیاتگنینی ایتگن.
ایران پارلمانی رئیسی اوشبو بیاناتیده واشینگتن پُست گزېتهسینینگ خبریگه تهیهنیب، ایران کوچلری امریکالیک عسکرلرنینگ قوروقلیکدن کیریشینی کوتیب تورگنی و اولرگه قرشی کوچلی ضربه بېریشگه تیار اېکنینی بیلدیرگن.
واشنگتن پُست یقینده امریکا مدافعه وزیرلیگی (پنتاگون) ایرانگه قرشی بیر نېچه هفتهلیک قوروقلیک عملیاتیگه تیارگرلیک کۉرهیاتگنی حقیده خبر بېرگن، اما دونالد ترامپ بو رېجه بیلن راضی بۉلهدیمی-یۉقمی، حلی نامعلوم.
قالیباف شونینگدېک، ترامپ نینگ ۱۵ بنددن عبارت صلح تکلیفیگه اشاره قیلیب، امریکا اوروشده اېریشه آلمهگن نرسهسینی سیاسي و دیپلوماتیک یۉل بیلن آلیشگه اورینهیاتگنینی ایتگن.
او خلقیگه مراجعت قیلیب: «امریکالیکلر ایراننی تسلیم قیلیشنی ایستر اېکن، جواب انیق: بیز ظلمگه بۉیسونمهیمیز،» دېگن مضموندهگی سۉزلرنی یازگن.
امریکا و ایران اۉرتهسیدهگی اوروش باشلنگنیگه ۳۰ کون بۉلگن و سۉنگگی کونلرده اونی تۉختهتیش همده کېنگهییب کېتیشینینگ آلدینی آلیش بۉییچه دیپلوماتیک اورینیشلر کوچهیگن.
امریکا قۉشمه ایالتلری جمهور رییسی دونالد ترامپ بیر نېچه بار مذاکرهلر دوام اېتهیاتگنینی ایتگن بۉلسه-ده، ایران رسميلری هر قندهی تۉغریدن-تۉغری مذاکرهنی رد اېتیب، فقط واسطهچیلر آرقهلی خبر المشیلهیاتگنینی بیلدیرماقده.
