بیرلشگن ملتلر تشکیلاتینینگ ترقیات دستوری، فبروری آیینینگ ۷ – سی، ساغلیق خلقارا کونی مناسبتی بیلن ایکس صحیفهسیده بیر بیانات نشر قیلیب، افغانستانده انسانلر جانینی قوتقیریب تورگن جماعهلر جملهدن عالملر و ساغلیق خادملریدن قدردانلیک بیلدیرگن.
شو بیلن بیرگه بیرلشگن ملتلر تشکیلاتینینگ ترقیات دستوری، افغانستان ساغلیق خذمتلرینی کوچهیتیریش و ضررلنووچی اهالینی قۉللب-قوتلشگه اورینیب تورگنینی هم بیلدیرگن.
بو تشکیلات، خلقارا همکارلری بیلن سل، ملاریا و ایچآیوی کبی کسللیکلریگه قرشی خذمتلر ترقهتیب تورگنینی هم معلوم قیلگن.
ساغلیق خلقارا کونی افغانستانده شوندی بیرحالده یېتیب کېلماقده دیر که مملکتده، ساغلیق ساحهسیدهگی امکانیتلر یېتیشماوچیلیگی سبب جدّی شکایتلرنی اۉرتهگه آلیب کېلگن.
مملکت حاکمیتی طالبان قۉلیگه توشیب قالگنیدن بیری، ساغلیق بۉلیمی هم جدّی خواطرلر آستیده قالگن و حاضر بو تیزیم فعالیتی کۉپینچه خلقارا یاردملرگه محتاج دیر.
شونینگدېک، اخیرگی ییللر دوامیده خلقارا یاردملر اینیقسه امریکا قوشمه ایالتلرینینگ یاردمی آزهیشی آرتیدن، مملکت ساغلیق تیزیمی جدّی باسیملرنی باشدن کېچیرماقده و یوزلب ساغلیق مرکزلری فعالیتی تۉختهتیلگن.
