افغانستانده یوز بېرگن سۉنگگی واقعه ینه بیر بار جمعیتیمیزدهگی آغریقلی حقیقتنی آچیب تشلهدی. طالبان عالي تعلیم وزیری تامانیدن بیر یاش اۉزبېک طلبهسیگه شپات اوریلگنی و باشقه اۉزبېک طلبهلری نینگ هم ملتیگه قرهب تحقیرلنگنی عادي حادثه اېمس بو تیزیملی عدالتسیزلیک و ملي کمسیتیش نینگ آچیق افادهسیدیر.
تعلیم مسکنی حرمت، بیلیم و کېلهجک قوریلهدیگن مقدس جای بۉلیشی کېرهک ایکن بوگون او یېرده طلبهلر قۉرقوو، حقارت و زوروانلیککه دوچ کېلماقده. طلبهگه قۉل کۉتریش بو نهفقط بیر انساننی تحقیرلش، بلکه علمگه، معرفتگه و بوتون جمعیت کېلهجگیگه قرشی اوریلگن ضربهدیر.
اېنگ اچینرلیسی شوندهکی، بو واقعه ملي کمسیتیش بیلن قاریشیب کېتگن. اۉزبېک طلبهلری نینگ علیحده اجرهتیلیب، حقارت قیلینیشی تصادف اېمس، بلکه آنگلی روشده آلیب باریلهیاتگن خوفلی یاندشوودیر. بو اېسه جمعیتده عداوت، ایشانچسیزلیک و بۉلینیشنی کوچهیتیرهدی.
سوال آچیق: اگر تعلیم تیزیمینی باشقهرهیاتگن شخص نینگ اۉزی شوندهی معامله قیلسه، بو تیزیمدن قندهی عدالت کوتیش ممکن؟ قندهی قیلیب یاشلر بوندهی محیطده اۉزینی خوفسیز حس قیلهدی؟ قندهی قیلیب اولر کېلهجککه ایشانهدی؟
بو حادثه فقط بیر طلبهگه اوریلگن شپات اېمس. بو بوتون بیر ملت نینگ شانی و قدر-قیمتیگه اوریلگن ضربهدیر. بوندهی ظلمگه سکوت قیلیش اېسه اونی قبول قیلیش بیلن برابردیر.
افغانستان کۉپ ملتلی جمعیتدیر. هر بیر ملت نینگ اۉز اۉرنی و حرمتی بار. اگر بوگون بیر ملت تحقیر قیلینسه، اېرتهگه باشقهسی هم شو تقدیرگه دوچ کېلهدی. بو اېسه مملکت کېلهجگینی خوف آستیگه قۉیهدی.
مین بو رذل حرکتنی قطعیاً قارهلب، شونی ایتماقچیمن؛ منصبدار شخصلر قانوندن اوستون اېمس. تعلیم تیزیمی اېسه قۉرقوو اېمس، عدالت و تېنگلیک اوستیگه قوریلیشی کېرهک.
بوگون سکوت قیلیش خیانتدیر. بوگون آواز کۉترمسلیک اېرتنگی ظلمگه یۉل آچیشدیر.
ظلمگه سکوت خیانت، تحقیر هلاکت! بو حقیقتنی اونوتمسلیگیمیز کېرهک.
