اخیرگی کونلر دوامیده، اسراییل و تورکیه رسمیلرینینگ تارتیشوولری کېسکینلشیب، اجتماعی صحیفهلرده بیر-بیراویگه نسبتن جدّی تنقیدلر و تهدیدلرنی تیلگه آلگن.
اوشبو وضعیت، تورکیه جمهور باشلیغی رجب طیب اردوغاننینگ ایران و امریکا اۉرتهسیدهگی آتیش-کېسین کېلیشووی اسراییل حرکتلری سبب بوزیلیشی ممکنلیگی و تورکیهده اسراییلنینگ اۉنلب یوقاری مرتبهلی رسمیلری حبسگه آلینیش قراری قبول قیلینیشی آرتیدن اۉرتهگه کېلگن.
تورکیه حکومتینینگ بو قراری آرتیدن، اسراییلنینگ یوقاری مرتبهلی رسمیلری اینیقسه باش وزیری بنیامین نتیاهو و مدافعه وزیری اسراییل کاتز علیحده بیاناتلر بیلن تورکیه جمهور باشلیغینی تنقید قیلیشگه باشلهگن.
اسراییللیک بو مقاملرنینگ برابریده اېسه، تورکیه حکومتی رسمیلریگه قۉشیمچه بو حکومتگه قرشی سیمالر جملهدن اردوغان تامانیدن قماققه تارتیلگن و استانبول بلدیه باشلیغی اکرم اماماۉغلو، سیلاوده اردوغاننینگ اساسی رقیبی کمال قیلیچدار اۉغلو و اردوغاندن ایریلیب باشقه حزب قورگن بو مملکت سابق باش وزیری احمد داوداۉغلو، اسراییل برابریده بیانات یازیب، بو مملکتنی آگاهلنتیردی.
اکرم اماماۉغلو بو حقده اۉزینینگ ایکس صحیفهسیده یازیشیچه: «یقین شرق حدودی بۉیلب عامهوی قیرغینلر، جینوساید و ناقانونی هجوملر بیلن بیگناهلرنینگ قانینی تۉککنلر! تورکيه جمهوریتی قاتللر تامانیدن ایلگری سوریلگن عیبلاولرنی انابتگه آلمهیدی. سیز تورکيه جمهوریتینی تیلگه آلیب، باشلهگن اوشبو ناقانوني اوروشگه قانونيلیک بېره آلمهیسیز!.»
شونینگدېک، تورکیه جمهورلیک ریاست سیلاویده بو مملکت حاضرگی جمهور باشلیغی رجب طیب اردوغاننینگ اساسی رقیبی بۉلمیش کمال قیلیچدار اۉغلو هم بیر بیانات یازیب، اسراییل رسمیلرینینگ اردوغانگه نسبتن تنقیدلرینی کېسکین قارهلهدی.
قیلیچدار اۉغلونینگ تاکیدلهشیچه، اسراییل رسمیلری یامان یاندهشوولری برابریده تورکیهنینگ بوتون خلقی تۉختهگن دېب شوندهی یازگن: «تورکيه جمهوریتی حکومتی تورلی مدنیتلر، اعتقادلر و اۉزلیکلرنی اۉز بغریگه آلگن مېزبان دولت بۉلیب، هر بیر اۉزلیکنی حرمت قیلهدی و اونی حمایه قیلهدی. سیزنینگ بۉلینیش، یاندهشوولرینگیز و ویرانکارلیک لایحهلرینگیزگه قرشی ۸۶ میلیونلیک تورک خلقی سیزگه قرشی تورهدی.»
باشقه تاماندن تورکیه سابق باش وزیری احمد داوداۉغلو هم بو خصوصده بیلدیرگن مناسبتیده اسراییل تیز آرهده، توککن قانلرگه چوکّهدی دېب آگاهلنتیرگن.
