ایران تشقی ایشلر وزیری عباس عراقچینینگ ایتیشیچه، امریکانینگ «قرهمه-قرشی خطی-حرکتلری و آرتیقچه طلبچنلیگی» ایکّی دولت اۉرتهسیدهگی دیپلوماتيک یۉلیدهگی جدّي تۉسیق حسابلنهدی.
عراقچی بو سۉزلرنی پاکستان ایچکی ایشلر وزیری محسن نقوی بیلن اوچرهشووده بیلدیرگن.
ایسنا خبرگزارلیگی بوگون سهشنبه، ۲۹-ثور خبر بېریشیچه، ایران تشقی ایشلر وزیری اوچرهشوو دوامیده: «امریکانینگ قرهمه-قرشی موضعلری و حددن تشقری طلبچنلیگی دیپلوماتیک یۉلیدهگی کتّه تۉسیق دیر»، دېگن.
او منطقهدهگی کېسکینلیک کوچهییشینینگ آلدینی آلیش بۉییچه پاکستاننینگ سعی-حرکتلرینی قدرلب، ایران «مسوولیتلی یاندشوو» طفیلی مذاکره و دیپلوماتيک یۉلینی تنلهگنینی تأکیدلهگن.
عراقچینینگ سۉزلریگه کۉره، امریکانینگ اوّلگی دورلرده مجبوريتلرنی بیر نېچه بار بوزیشی ایراننینگ شبهه و ایشانچسیزلیگیگه سبب بۉلگن.
بوندن آلدین هم ایرانلیک رسميلر شونگه اۉخشش بیاناتلرده امریکا اۉتگن ییلی مذاکرهلر جریانیده ۱۲ کونلیک اوروشنی باشلهگنینی، بو ییل اېسه عمان واسطهچیلیگیدهگی مذاکرهلر دوام اېتهیاتگن پیتده ایرانگه هجوم قیلگنینی ایتگن اېدی.
امریکا قۉشمه ایالتلرینینگ جمهور رییسی دونالد ترامپ تیناوون کېچقورون ایرانگه قرشی رېجهلشتیریلگن هجومنی ایکّی-اوچ کونگه کېچیکتیرگنینی معلوم قیلدی.
ترامپ تروثسوشیال ترماغیده یازیشیچه، بو قرارنی قطر، سعودی عربستان و بیرلشگن عرب امیرلیگی التماسیگه بناءً قبول قیلگن، چونکه تامانلر کېلیشووگه اېریشیش احتمالی جوده یقین اېکنینی بیلدیرگن.
امریکا جمهور رییسی بیر وقت نینگ اۉزیده ایران هستوي قورالگه اېگه بۉلیش حرکتیدن واز کېچمسه و کېلیشووگه اېریشیلمسه، امریکا اوردوسی کېنگ کۉلملی هجومگه تیار اېکنیدن آگاهلنتیرگن.
