امریکا جمهور رییسی دونالد ترامپ افغانستانده قالیب کېتگن امریکا حربي تخنیکلری حقیده گپیرر اېکن، قۉشمه ایالتلر بو جهازلرنی قَیتریب آلیشی ممکنلیگینی ایتدی. اونینگ تأکیدلشیچه، حاضر طالبان امریکاگه خوشآمد قیلماقده.
ترامپ پاریسده بۉلیب اۉتهیاتگن جی۷ ییغینی دایرهسیدهگی مطبوعات انجمنیده ینه جوبایدین مأموریتی دوریده عملگه آشیریلگن امریکا قۉشینلری نینگ افغانستاندن آلیب چیقیلیش جریانینی تنقید قیلدی. اونینگ ایتیشیچه، اونینگ اوّلگی مأموریتی هم افغانستاندن چیقیشنی رېجهلشتیرگن، بیراق بو ایش برچه حربي تخنیکلرنی آلیب چیقیب کېتگن حالده، شرَف و آبرو بیلن عملگه آشیریلیشی کېرهک اېدی.
اما ترامپ نینگ سۉزلریگه کۉره، بایدین مأموریتی برچه تخنیکلرنی آرتده قالدیرگن.
او شوندهی دېدی: «برچه جهازلرنی قالدیریب کېتیشدی. بلکه مېن اولرنینگ برچهسینی قَیتریب آلیشیم ممکن. تۉغری، بو کۉپراق رمزي مسأله، چونکه اولر اېندی بیرآز اېسکیرگن، اما بلکه همهسینی قَیتریب آلرمیز.»
ترامپ دوام اېتیب، طالبان نامینی تیلگه آلمهگن حالده: «افغانستان حاضر بیزگه خوشآمد قیلماقده، بونی بیلهسیزلر»، دېدی.
ترامپ بوندن آلدین هم بیر نېچه بار اونینگ مأموریتی افغانستانده قالگن امریکا حربي تخنیکلرینی قَیتریب آلیشینی تأکیدلهگن اېدی.
اقش ۲۰۲۱-ییلده ترامپ نینگ اوّلگی مأموریتی طالبان بیلن امضالهگن کېلیشوو اساسیده افغانستاندن چیقیب کېتگن.
امریکا و ناتو کوچلری چیقیب کېتگنیدن سۉنگ، افغانستان حکومتی قولب توشدی و طالبان مملکتده قالگن برچه حربي تخنیکلرنی اۉز نظارتیگه آلدی.
ترامپ بایدین مأموریتینینگ افغانستاندن چیقیش اصولینی بیر نېچه بار تنقید قیلیب، اونی شرمندهلی دېب اتهگن.
او، شونینگدېک، بیر وقتلر امریکا کوچلرینینگ افغانستاندهگی اساسي حربي بزهسی بۉلگن بگرام مرکزی حقیده هم بیر نېچه بار فکر بیلدیریب، امریکا بو بزهنی قَیتریب آلیشینی ایتگن.
