افغانستاننینگ قریب۵۰ مدنی جماعهچیلیگی، انسان حقوقلری تشکیلاتی و عیاللر ناراضیلیک حرکتلری اروپا اتفاقیدن طالبلر بیلن همکارلیکنی همده افغانستان مهاجرلرینی دېپورت قیلیشنی تۉختهتیشنی سۉرهدی.
انسان حقلری تشکیلاتی «رواداری» بوگون (پنجشنبه،۲۸جوزا) نشر قیلگن۴۷ قۉشمه مکتوب اروپا کمیسیون باشلیغی، اروپا کېنگشی رییسی، اروپا اتفاقی نینگ تشقی سیاست و خوفسیزلیک بۉییچه نمایندهسی همده ایچکی ایشلر و مهاجرلر بۉییچه وکیلیگه یۉللنگن.
47 ته تشکیلات اروپا اتفاقی نینگ طالبلر بیلن مناسبتلرنی «عادتي حالگه ایلنتیریش» سیاستی نینگ سیاسي، اخلاقي و خوفسیزلیک عاقبتلری حقیده آگاهلنتیریب، مهاجرت سیاستی انسان حقوقلری تمایللریگه اساسلنیشی کېرهکلیگینی تأکیدلهدی.
مکتوب یازووچیلریگه کۉره، آلمان و ناروې تامانیدن طالبان دیپلوماتلری نینگ افغانستان سیاسي وکالتخانهلریده قبول قیلینیشی همده یقینده بلجیم تامانیدن طالبان هیئاتی نینگ اروپاگه سفریگه کۉمکلشیلیشی اوشبو گروهگه «مشروعیت بېریش» بیلن برابر.
امضالاوچیلر بوندهی همکارلیک جندر تېنگلیگی و عیاللر حقوقلرینی قۉللب-قوّتلشینی دعوا قیلووچی دولتلر اوچون جدّي اخلاقي و حقوقي سواللرنی یوزهگه کېلتیریشینی قید اېتگن.
اولرنینگ تأکیدلشیچه، بو مناسبتلر بیرلشگن ملتلر تشکیلاتی اېکسپېرتلری و انسان حقوقلری تشکیلاتلری طالبان باشقرووینی «نهادیلشگن جندر ظلمی تیزیمی» دېب بهالهیاتگن بیر شرایطده عملگه آشیریلماقده.
مکتوبده طالبان وکیللری نینگ اروپاگه کیریشی بیلن باغلیق خوفسیزلیک خطرلری حقیده هم آگاهلنتیریلگن.
تشکیلاتلرگه کۉره، کۉپلب افغانستان قاچقینلری، اینیقسه سابق دولت خدمتچیلری و انسان حقوقلری حمایهچیلری، اۉزلری نینگ مخفي معلوماتلری طالبان اعضالریگه بېریلیشی و بو اۉزلری همده عایلهلری اوچون هلاکتلی عاقبتلرگه آلیب کېلیشیدن خواطرده.
شونینگدېک، اولر اروپادن طالبان نظارتیدهگی افغانستانگه مهاجرلرنی مجبوري دېپورت قیلیش عملیاتیدن هم تشویش بیلدیردی.
مکتوبده: «بیز افغانستان مهاجرلرینی مجبوري قَیتریشنی قارهلهیمیز و هنوز خوفسیز بۉلمهگن مملکتگه دېپورتلرنی زودلیک بیلن تۉختهتیشنی طلب قیلهمیز»، دېییلهدی.
تشکیلاتلر اروپا اتفاقیدن «انسانلرنی خوفسیز بۉلمهگن مملکتلرگه مجبوري قَیترمسلیک» تمایلیگه رعایه قیلیشنی سۉرهدی. اولرنینگ فکریچه، حتا جنایت صادر اېتیش هم آدمنی خوفسیز بۉلمهگن دولتگه دېپورت قیلیش اوچون اساس بۉله آلمهیدی.
مکتوب یازووچیلری اروپا دولتلری نینگ طالبان بیلن مهاجرلرنی دېپورت قیلیش بۉییچه همکارلیگی نهفقط قَیتگن مهاجرلرنی خوف آستیده قالدیریشی، بلکه طالبان نینگ مشروعیتیگه هم خدمت قیلیشینی تأکیدلهدی.
اولر هر قندهی مهاجرلر بۉییچه همکارلیک میکانیزمی اروپا اتفاقی نینگ حقوقي و انسان حقوقلریگه عاید مجبوريتلری نقطهٔ نظریدن بهالنیشی کېرهکلیگینی، شونینگدېک انسان حقوقلرینی کېنگ و تیزیملی روشده بوزیشده همده انسانیتگه قرشی جنایتلرده عیبلنهیاتگن نارهسمي حاکمیت وکیللریگه بېواسطه یاکه بالواسطه مشروعیت بېرمسلیگی لازملیگینی قید اېتدی.
۴۷ ته تشکیلات افغانستانگه دېپورتلرنی تۉختهتیش، شونینگدېک معلومات المشیش و کانسوللیک خدمتلری بیلن باغلیق باشقه خوفلرنی اۉز ایچیگه آلگن طالبان بیلن همکارلیکنی یکونلشگه چقیردی.
بو چقیریقلر اروپا کمیسیونسی اۉتگن آی طالبان هیئاتینی مهاجرلرنی دېپورت قیلیش نینگ تخنیکي مسألهلرینی محاکمه قیلیش اوچون بروکسلگه تکلیف قیلگنینی تصدیقلهگنیدن کېین ینگرهدی.
