طالبلر نظارتیدهگی افغانستان قیزیل یریم آی جمعیتی کابلده یورهک تېشیگی کسللیگینی دوالشگه اختصاصلشگن شفاخانه فایدهلنیشگه تاپشیریلگنینی معلوم قیلدی.
مذکور شفاخانه بوگون، ۱۱-اسد (یکشنبه) کونی طالبلرنینگ یوقاری مرتبهلی عملدارلری اشتراکیدهگی مراسمده رسماً آچیلدی.
قیزیل یریم آی جمعیتی مسووللرینینگ ایتیشیچه، اوشبو شفاخانهده یورهک تېشیگی کسللیگیگه چهلینگن بېمارلرگه بېپول دوالش خدمتلری کۉرسهتیلهدی.
اولرنینگ معلوم قیلیشیچه، شفاخانه ییلیگه قریب۲ مینگ نفر بېمارنی دوالش قوّتیگه اېگه.
شفاخانه باشلیغی عبدالولی هوتمانزی آچیلیش مراسمیده مرکز زمانهوي جهازلر بیلن تأمینلنگن ایکّیته عملیات خانهسیگه اېگه اېکنینی ایتدی.
بونگچه افغانستانده یورهک تېشیگی کسللیگیگه چهلینگن بالهلر دوالنیش اوچون اساسن هندستانگه یوباریلر یاکه مملکت ایچیدهگی خصوصي شفاخانهلرگه یۉنهلتیریلر اېدی.
افغانستان قیزیل یریم آی جمعیتی نینگ طالبان تامانیدن تعیینلنگن باشلیغی شهاب الدین دلاور آچیلیش مراسمیده حاضرگچه مملکت ایچیدهگی شفاخانهلرده۱۵مینگ نفر یورهک تېشیگی کسللیگیگه چلینگن بېمار دوالنگنینی بیلدیردی.
اونینگ سۉزلریگه کۉره، اوشبو بېمارلرنینگ دوالنیش خرجتلری افغانستان قیزیل یریم آی جمعیتی تامانیدن قاپلنگن.
طالبلر مسووللری ینگی شفاخانه ایشگه توشیریلیشی بیلن یورهک تېشیگی کسللیگیگه چهلینگن برچه بېمارلر اوچون بېپول دوالنیش امکانیتی یرهتیلیشی و اېندیلیکده بېمارلر دوالنیش اوچون ییللر دوامیده کوتیشگه مجبور بۉلمسلیگیگه امید بیلدیردیلر.
