آنه تیلی، یالغیز صحبت قیلیش اوچون بۉلگن بیر واسطه اېمس؛ باله‌لیک حکایه‌لر، آنه‌لرنینگ اَلّه‌سی، خاطره‌لر تیلی و انسان‌نی ریشه‌لری همده مدنی اۉزلیگی بیلن باغلب توروچی مستحکم بیر رشته دیر. آنه تیلیده اۉرگنگن هر بیر سۉز باله اوچون عایله تاریخی، فرهنگی و اوتمیشی‌گه آچیلگن بیر ایشیک دیر.
شونده‌ی حالده، عایله‌لردن قطاریده آته-آنه‌لر فرزندلری بیلن اۉز آنه تیلیده اېمس، باشقه تیلده صحبت قیلیب اولرگه عایله‌نینگ اصل تیلینی اۉرگه‌تیش‌گه اونچه‌لیک اعتبار بیرمه‌یدی. بلکیم بو باشقه تیللرنی اۉرگهنیشگه بۉلگن قیزیقیش یا-ده فرزندلریگه کینگ‌راق امکانیتلرنی یره‌تیش اېسته‌گی بیلن باغلیق بۉلسه، بیراق بونی اونیتمه‌سلیک کېره‌ک که، باشقه تیللرنی اۉرگه‌نیش جریانیده آنه تیلی هم اعتباردن چیتده قالمسلیگی لازم.
باشقه تیل‌نی اۉرگه‌نیش، محیط، باشقه کیشیلر و حتا دنیا بیلن علاقه قوریش اوچون فایده‌لی بیر امکانیت بۉله آله‌دی؛ لیکن بو امکانیت باله‌نینگ آنه تیلی و عایله‌سی فرهنگی‌دن اوزاق بۉلیشی‌گه سبب بۉلمسلیگی کېره‌ک.
قیغو بیلن عایله‌لردن قطاری آره‌سیده فرزندلری بیلن اۉز آنه تیلیده گپلشیش‌دن تارتینه‌دیگن کیشیلر هم بار. باشقه تیللرده صحبت قیلیش‌نی یخشی‌راق بیلیب، اۉز تیللریگه اونچه‌لیک اعتبار قره‌تمه‌یدیلر. اصلیده آنه تیلیدن شرم قیلیش اېمس، اونی اسره‌ب قالیش، یۉره‌کدن یۉره‌ک و فرزنددن فرزندگه یېتکزیش کېره‌ک؛ چونکه آنه تیلی تینگری تعالی تامانیدن انسان گه عطا ایتیلگن بی‌بها نعمتلردن بیری دیر. انسان اۉز تیلینی قدرلش آرقه‌لی نه‌فقط اۉزلیگی، بلکیم اجدادلریدن قالگن مدنیت میراثی‌گه هم حرمت قایل بۉله‌دی.
آنه تیلی اویلرده تیریک قاله‌دی. آته-آنه باله‌نینگ ایلک اوقیتووچیسی بۉلیب و اوی، اونده ریشه توته‌دیگن جای دیر. فرزندلر بیلن آنه تیلیده گپلشیش، حکایه ایتیش، شعر اوقیش و اولرگه اۉز تیللری ادبیاتینی بیلدیریش، ساده لیکن بو میراث‌نی تیریک سقله‌ش اوچون ارزشلی آدیملر دیر.
بوگون ۲۹-میزان، اۉزبېک تیلی ملی کونی، ینه‌ده بیزلرنی بو تیل‌نی سقله‌شیمیزگه چیقره‌دی. اۉزبېک تیلی مملکت‌ده‌گی باشقه تیللر کبی افغانستان‌نینگ بای مدنیتی و تیل خزینه‌سی‌نینگ بیر قسمی بۉلیب، اونی اسره‌ب قالیش اوچون عایله‌لرنینگ اعتباری، تعلیم-تربیه‌سی و کونده‌لیک حیاتده اوندن کینگ فایده‌لنیش ضرور.
اونیتمسلیک کېره‌ک که، آنه تیلی باشقه تیللرنی اۉرگهنیشگه توسیق اېمس، عکسینچه انسان‌نی اۉزلیگی و مدنیتی بیلن باغله‌ب تورگن ریشه دیر. بیر کیشی کوپینچه تیل‌نی اۉرگه‌نیب، دنیا بیلن علاقه قوریب و عین پیتده آنه تیلینی مهر-محبت بیلن فرزندلریگه یېتکزیشی ممکن.
