فوربس مجله‌سی ینگی‌لیکده تاثیرچن سیمالر رۉیخطی نی ترقتگن که اوشبو رۉیخط‌ده، افغانستانلیک بیر ییگیت نینگ آتی هم کیریتیلگن.
«جوان برای جوان» نهادی نینگ اساسچیسی محمد حبیب عبدالله نینگ آتی، علمی اجتماعی و انسان‌دوستلیک فعالیت‌لری باعث فوربس مجله‌سی‌نینگ 2024- ییلده 30 یاشدن قویی تاثیرچن سیمالری‌نینگ رۉیخطی گه کیریتیلگن.
عین حالده، عبدالله 2022- ییلده دیانا جایزه‌سینی هم قۉلگه کېلتیرگن اېدی.
محمد حبیب عبدالله اۉزبېک تلویزیونی بیلن اۉتکزگن صحبتیده: «مېن کۉپ خرسندمن و بو نه فقط مېن بلکه افغانستان اینیقسه، اۉزبېک خلقی اوچون کتته بیر یوتوق دیر.»
عبدالله نینگ کۉپه‌یتیریشیچه، او «جوان برای جوان» و «یوز ییگیت» نهادلری آرقه‌لی افغانستان ییگیت‌لریگه بیلیم و تکنالوژی خصوصیده اوزاق‌دن اۉرگه‌نیش سیستمی نی یۉلگه قوییب و شونینگدېک قزاقستان‌ده افغانستانلیک بیر ییگیت صفتیده، کۉپ علمی و فرهنگی فعالیت‌لرگه حصه قوشگن.
محمد حبیب عبدالله گه کۉره، تورلی بۉلیم‌لرده‌گی قیلگن فعالیت‌لری باعث، فوربس مجله‌سی تامانیدن 2024- ییلده 30 یاشدن قویی تاثیرچن سیمالردن بیری صفتیده تنلنگن.
ایتیلیشیچه، مذکور مجله هر ییل تورلی مملکت‌لرده و تورلی خیل بۉلیم‌لرده فعالیت قیلیب و اۉزلریدن خلاقیت کۉرستگن 30 یاشدن قویی تاثیرچن سیمالر رۉیخطی نی نشر قیله‌دی.
فوربس مجله‌سی اۉتکن کون پنج‌شنبه تاثیرچن شخص‌لرنینگ رۉیخطی نی اعلام قیلدی که اوشبو رۉیخط‌ده فاریاب‌لیک ییگیت محمد حبیب عبدالله نینگ هم آتی کۉرینه‌دی.
اَیتیش کېره‌ک که شونینگدېک، 2023- ییلده افغانستان‌دن «احتساب» اپلیکیشنی توزه‌تووچیسی سارا واحدی نینگ آتی هم مذکور مجله رۉیخطی‌گه کیریتیلگن اېدی.
