طالبان افغانستان‌ده، اۉزلرینی خاص قومی و قبیله‌وی فکرلری اساسیده، تبعیض و تعصب‌لری دوامیده، حاضر اچینرلی بیر قرار آلیب اۉزبېک تیلی و ادبیاتی دیپارتمنت‌لریدن فارغ بۉلگنلرنی دولتی بست‌لرگه کیریش اوچون توسیق‌لیک یره‌تگن.
طالبان نینگ بو قراری نه فقط تیلی‌میز و مدنیت‌میزگه قرشی بویوک جفا دیر بلکیم جماعه‌میز اوچون جدی اقتصادی زیان‌لرنی اۉرته‌گه آلیب کېلیشی ممکن.
طالبان بیرازگینه بۉلسه هم اۉزبېکلر ریشه‌سیگه تیشه اۉریشگه اینتیلیب، اۉزبېکلر بیلن قنچه‌لیک تعصب قیلگنینی نمایان قیلدی. حال بو که مینگلرچه اۉزبېک کیم-کیملرنی ترغیبی بیلن طالبان صفی‌گه بو گروه اوچون کورهشیب و کۉپینچه‌لری هم قان توککن.
بویوک بیر خلق نینگ اۉقیش و ایشلش حقی‌دن محروم اېتیلیشی
طالبان شوندی بیرحالده، اۉزبېک تیلی و ادبیاتی دن فارغ بۉلگنلر دولتی بست‌لرگه کیریشی اوچون توسیق‌لیک یره‌تماقده دیر که افغانستان‌ده بو گروه حاکمیت‌گه قیتگن بیری ایکی قیینچیلیک کوچهیگن؛ بیری یاش‌لر آره‌سیده اۉقیش اوچون بۉلگن انگیزه قویی کېلیشی و ایکینچی هم اېسه اۉقیش اوچون بۉلگن اینتیلیش‌لر.
کۉرینیشیچه، طالبان بو ایکی مساله‌نی سیزگن بیرحالده، اۉزبېک تیلی و ادبیاتینی بیتیرگنلرگه قرشی قرار آلگن که بو حقیقتن طالبان قنچه‌لیک تعصب‌لی بۉلگنلرینی بیلدیره‌دی.
شونینگدېک اوشبو قرار کتته بیر خلق نینگ ایشلش و اۉقیش انسانی حقلرینی نقض اېتیش دیر و بو بیلن طالبان پشتو تیلی‌دن باشقه تیللر اینیقسه اۉزبېک تیلیگه قرشی تیزیملی تبعیض قۉلگه آلگن.
عینی حالده طالبان نینگ اۉزبېک تیلی‌دن فارغ بۉلگنلر دولتی بست‌لرگه کیریشی تۉخته‌تیلیشی اوچون بۉلگن قراری، اۉزبېکلر اوچون آغیر اجتماعی عاقبت‌نی هم اۉرته‌گه آلیب کېله‌دی چونکه بو قرار بیلن یاش‌لریمیز آره‌سیده ایش‌سیزلیک معماسی کینگه‌ییب و تیلی‌میزگه اۉقیش اوچون هم قیزیقیش‌لر آزه‌یشی کوتیله‌دی.
شوندی اېکن که طالبان بو سیاستی عملگه آشیریلمسلیگی اوچون هر بیر اۉزبېک باش کوتاریب و هر بیر یۉل‌دن کۉره‌شیشی کېره‌ک، بۉلمه‌گن تقدیرده یاش‌لریمیز و تیلی‌میز کېله‌جگی خواطرده دیر.
اۉزبېک تیلیگه قرشی یانده‌شوو؛ اۉزبېک تیلی و مدنیتی کوچلی دیر
طالبان تبعیض‌لی و قبیله‌وی اویله‌شلری اساسیده، اۉزبېک تیلی و مدنیتی‌گه قرشی آدیم کوتاریشی شوندی بیرحالده دیر که افغانستان جغرافیه‌سیده بو سیاست عصرلردن بویان دوام اېتیب کېلماقده دیر.
عبدالرحمن خان دیک منفور حاکملر بو حقده دنیا کۉزی‌دن اوزاق سیاست قۉلگه آلیب و کۉپلب ریجه‌لرنی عملگه آشیردی. بیراق اۉزبېک تیلی و مدنیت‌نی یۉق اېتیش‌گه کوچی ییتمه‌دی چونکه بو تیل و مدنیت نه یالغیز افغانستان ناملی جغرافیه نینگ بویوک بارلیگی بلکیم بیز یشه‌یاتکن منطقه نینگ هویتی دیر.
شوندی اېکن که طالبان هم ینگی قراری کبی بیر قنچه اچچیق سیاست‌لرنی قۉلگه آلیشی ممکن، لیکن بو خلق آره‌سیده هلی هم ملی تویغو و ملت‌پرورلیک و مدنیت‌پرورلیک تیریک دیر. تاریخ‌ده بیر صندلی‌ده توریب مشرب‌خوان‌لیک بیلن تیل و مدنیت‌لرینی سقله‌گن نسللر باله‌لری، هلی هم کوچلی تیریک دیر و طالبان دیک تعصب‌لی گروه‌لرنی بو کبی قرارلری برابریده توره‌دی.
اۉزبېک طالبلر شو اوچون جهاد قیلگن اېدی‌می؟
طالبان حاکمیت‌گه قیتیشی بیلن اۉزبېک تیلیگه قرشی بیر قنچه یامان یانده‌شوو و ریجه‌لرنی قۉلگه آلدی که بو یامان یانده‌شوولردن مهمی قوییده‌گی لردن عبارت دیر:
منطقه‌لرنینگ اۉزبېک نامینی اوزگرتیریش: طالبان حاکمیت‌گه قیتیشی بیلن ایریم اۉزبېک منطقه‌لر آتینی اۉزبېکچه سۉزدن باشقه سۉزلرگه اوزگرتیریش‌گه اولگوردی و بو طالبان نینگ اۉزبېک تیلیگه قرشی بیرینچی سیاستی اېدی.
اۉزبېک درسلیک کتابلری و اوقیتووچی بست‌لر: طالبان بوندن ایلگری مکتب‌لرده اۉزبېک تیلی درسلیک کتابلری آز یوبارگنی و اۉزبېک تیلی اوچون مکتب‌لرده ییترلیچه «اۉزبېک تیلی اوقیتووچیسی» بست‌لرینی اختصاص بېرمه‌دی.
معلم تربیه‌لش موسسه‌لرده اۉزبېک بولیمی چیک‌لنیشی: عینی حالده طالبان حاکمیتی آستیده معلم تربیه‌لش موسسه‌لریده اۉزبېک تیلیگه اۉقیش اوچون هم چیکلاو یره‌تیلدی و بو هم طالبان نینگ اۉزبېک تیلیگه قرشی بیر سیاستی اېدی.
اۉزبېک تیلی‌ده علمی ایشلر برابریده چیکلاو: بوندن ایلگری طالبان یوکسک اوقوو وزیرلیگی هم اچینرلی بیر قرار بیلن اۉزېېک تیلی دیپارتمنت‌لریده‌گی علمی ایشلر و تدقیقات‌لر فارسچه و پشتونچه تیللریده بۉلیشی اوچون قرار آلگن اېدی که طالبان نینگ تعصب‌لی بو قراری جدی قرشی‌لیک بیلن یوز مه یوز بۉلدی.
حاضر اېسه طالبان اینگ جفانی اۉزبېک تیلیگه روا کۉریب «اۉزبېک تیلی و ادبیاتی‌دن فارغ بۉلگنلر دولتی بست‌لرگه کیریشی برابریده چیکلاو یره‌تگن» و طالبان بو سیاستی اۉزبېک مدنیتی بیلن دشمن‌لیکده بۉلگنینی کۉرسه‌تدی.
اخیرگی وقتلر ایچیده، طالبان نینگ اۉزبېک قومندان‌لریدن صلاح الدین ایوبی میمنه‌ده ۲۹ – میزان اۉزبېک تیلی ملی کونینی نشان‌لش مقصد اۉتکزیلگن ییغین‌ده نطق سۉزلب، طالبان اۉزبېک تیلیگه قرشی سیاستی یۉق دېب اعلام قیلگن اېدی.
طالبان نینگ یوقاری‌ده ایسلب اوتیلگن اینتیلیش‌لری و قاری صلاح الدین ایوبی نینگ بو سۉزلرینی نظرگه توتگن حالده، اۉزبېک طالبلر نیمه اوچون جهاد قیلدی؟ دېگن سوراغ پیدا بۉله‌دی.
طالبان جهاد شعاری آستیده ییللرچه اۉزبېکلرنی اۉز صف‌لریگه توپله‌دی و حاضر بو سنگرداش‌لرینی قدرت تقسیماتی‌ده هم چیت‌گه اۉرگن و اولر تیلی و مدنیت‌نی هم ایاغ آستی قیلیش‌گه اولگورماقده دیر و اۉزبېک طالبلر اېسه هلی هم جیم دیر.
