بیز پول دېب حسابلهیدیگن، مېتال تنگهلر یاکه سېرحشم کاغذلر اصلیده شونچهکه رمزلر خلاص. بیراق منه شو رمزلر معین بایلیک نینگ وکیللریدیر یاکه دلیللریدیر. پوللر اولرنی چیقرگن دولت خزینهسیده موجود قیمتبها مېتالر مقداری بیلن تصدیقلنهدی. پول قدرینی بېلگیلشده تسیویلیزاتسيهگه اېریشگن بوتون دنیاده معیار بۉلیب آلتین و کوموش خدمت قیلهدی. بو قیمتلی مېتالر انچه نایاب و اۉز اهمیتینی یۉقاتمهیدی، بیراق اولر نینگ ذخیرهسی بازار احتیاجلرینی قاندیریشگه یېتهدی.
باشقهچه قیلیب ایتگنده، کاغذ پول و تنگهلر پول صفتیده دولت تامانیدن چیقریلر اېکن، اولر اۉز قدرلریگه اېگهلیگی تن آلینهدی، چونکه اولر دولت خزینهسیدهگی آلتین و کوموش مقداری بیلن مستحکملنگن.
۱۸۲۱ ییلده بویوک بریتانیا اۉز پول تیزیمی نینگ اساسی صفتیده مانامېتالیزم (یعنی فقط بیر خیل مېتالدن فایدهلنیش)نی جاري قیلدی. آلتین رسمي ولیوته صفتیده قبول قیلینگن اېدی. ۱۹۱ ییلگه کېلیب آلتین یېر یوزیدهگی برچه ولیوتهلر نینگ اۉلچاو بیرلیگی بۉلیب قالدی. نرخ نینگ ستندرد معیاریگه اېگه بۉلگن مملکتلر اېندی بېملال بیر-بیرلری بیلن سودا ساتیق قیلیشلری ممکن بۉلیب قالدی. امریکا قۉشمه ایالتلری نینگ دالری، فرانسه نینگ فرانکی، آلمان مارکلری آلتینده افادهلنگن بېلگیلنگن قیمتگه اېگه اېدی.
۱۹۳۳ ییلگه کېلیب اکثریت مملکتلر آلتین ستندردیدن بیرآز چېکینهدیلر. بیراق حلی هنوزگچه کۉپلب مملکتلر ولیوتهسی، شو جملهدن امریکا ولیوتهسی هم بېلگیلنگن آلتین بهاسیده معیارلنگن. آلتین خلق ارا سوداده نهایتده مهم اهمیت کسب اېتهدی. حکومت قویمه آلتینلرنی ساتیب آلهدی و ساتهدی. آلتین نینگ بیر قِسمی خلقارا قرضلرنی تۉلش اوچون صرفلنهدی، قالگن قِسمی اېسه سقلنهدی. سقلنهدیگن آلتینگه دولت نینگ آلتین ذخیرهسی دېییلهدی.
