یازووچی: احمد مویتن اۉغلو
اېسلتمه: بو مقالهده بیلدیریلگن فکرلر یازووچیگه عاید دیر؛ اۉزبېک تلویزیون بیر یېتکرمه صفتیده مقالهلرنی نشر قیلیش مسوولیتی بار. محتوا یازووچیلر فکریگه تېگیشلی.
طالبان تمانیدن سمنگان بیلیم یورتینینگ کیریش دروازهسی لوحهسیدن اۉزبېکچه یازوونینگ آلیب تشلنیشی، نه بیر اداری اقدام، نه بیر سلیقوی مساله؛ بلکه تورکلر کیملیگی، تیل و تاریخینی آچیق و آنگلی یوسینده یۉق قیلیشگه قصد دیر. کمسیتیش و انکار سنلگن اوشبو اقدام، اۉنلب ییللردن بېری زوراوانلیک، قۉرقو و تاریخنی بوزیش آرقهلی آلیب باریلهیاتگن مجبوری بیرخیللشتریش ریجهسی نینگ بیر قسمی دیر.
بیراق، فاجعه فقط طالبان قراری بیلن چېکلنمهیدی. یرهنی ینهده چوقورلشتیرهیاتگن نرسه، باشقه ولایتلردهگی بویوکلری، فعاللری و اینیقسه تورک سیاستچیلرنینگ اویتلی جیملیکلری دیر. بو جیملیکنی اېندی نه مصلحت و نه احتیاط قیلیش دېب اتهب بۉلهدی؛ بو جیملیک تبعیض و یۉق قیلیش بیلن عملی همکارلیک دیر.
بونی آچیق-آیدین ایتیش کیرهک:
کمیده ایلیک ییلدن بېری فاریاب و جوزجان تورکلری اۉز قوملری اوچون، پنجشیر و قندهارلیکلر اۉینهگن رولنی بجرگن. بیز الدینگه چیقدیک، تیک توردیک، بها تۉلهدیک، یۉق قیلیندیک و قهیېرده قیسی خلق ظلمگه اوچرهگن بۉلسه، جیم بولمهدیک. بدخشاندن هراتگچه ناراضلیک سېسی کۉتریلدی و باشقهلرنینگ قیغوسی، بیزنینگ قیغومیز بۉلیب کېلگن.
بیراق بوگون آچیق بیر حقیقت یلنغاچ بۉلیب چیقماقده:
سمنگاندهگی تورک کیملیگی مسالهسیگه کېلگنده کۉپچیلیک، کۉروچی بۉلیشنی قولهی کۉرماقده ؛ سېسسیز ، موضعسیز و مسوولیتسیز.
تورک فقط بیر آت و بیر جغرافیهدن عبارت می؟ تورک فقط جوزجان و فاریابدن عبارت می؟ سمنگان، بلخ، سرپل، تخار، کندوز، بغلان، بدخشان، هرات، بادغیس، فراه و باشقه حدودلردهگی تورکلر بو تېنگلمهده(معادله) قهیېرده توریبدی؟
حقیقت شوندهکه، بو ایکیلیک فقط قندهاری و ناقندهاری پشتونلر یاکه، پنجشیری و نا پنجشیری تاجکلر اۉرتهسیده بۉلمهگن؛ بو خوفلی یاریق ییللر دوامیده تورک توپلومی نینگ ایچیگه هم سیغدیریلگن.
و عینا شو یاریققه کیملیکنی یۉق قیلوچیلر تهینگن: برچه اوچون تورهدیگان تورک، بیراق اۉزینینگ یۉق قیلینیش پیتیده، یلغوز قالدیریلگن.
اگر بوگون سمنگان نینگ اۉزبېکچه آتینی آلیب تشلهش عادی حالگه ایلنتریلسه، اېرتهگه قیسی تیل، قیسی آت و قیسی بېلگی نوبتده بۉلهدی؟
بوگون یوز بېرهیاتگن نرسه عادی کمسیتیش اېمس؛ بو، ایکّی کره تبعیض:
بیرینچیسی یۉقاریدن مجبورن یوکلنهدی، ایکینچیسی اېسه اۉزیمیز نینگ جیملیگیمیز و فرقسیزلیگیمیز بیلن مستحکملنهدی.
تاریخ فقط ظالملرنی لعنتلهمیدی؛
جیم تورگنلرنی هم جنیاتگه قۉلی بار دېب بیلهدی.
اېسلتمه: ناراضلیکده قتنشگن فاریاب و جوزجاندهگی چېکلنگن اۉرتاقلر نینگ اولوشی سقلهنهدی
