سعودی عربستان پایتختی ریاض شهریده بۉلیب اۉتگن مصلحتی ییغیلیشده عرب و مسلمان دولتلری تشقی ایشلر وزیرلری ایراندن فارس کۉرفزی اطرافیدهگی و منطقهدهگی دولتلرگه قرشی هجوملرینی تېزلیک بیلن تۉختهتیشنی طلب قیلدیلر.
اوشبو دولتلر تشقی ایشلر وزیری قۉشمه بیانات نشر قیلیب، ایراننینگ راکت و درون هجوملرینی قارهلب، بو هجوملر هېچ قندهی بهانه بیلن و هېچ قندهی شکلده آقلب بۉلمسلیگینی ایتگنلر.
اوشبو مصلحتی ییغیلیشیده سعودی عربستان، قطر، بیرلشگن عرب امیرلیگی، تورکیه، پاکستان، آذربایجان، بحرین، مصر، اردن، کویت، لبنان و سوریه تشقی ایشلر وزیرلری اشتراک اېتدی.
اولر قۉشمه بیاناتیده دولتلرنینگ بیرلشگن ملتلر تشکیلاتی نظامیگه موافق اۉزینی حمایه قیلیش حقوقیگه اېگه اېکنینی تأکیدلهدیلر.
شونینگدېک، عرب و مسلمان دولتلری تشقی ایشلر وزیرلری اېران بیلن کېلهجکدهگی مناسبتلر دولتلر حاکمیتیگه حرمت و ایچکی ایشلرگه ارهلشمسلیککه باغلیقلیگینی، ایران هېچ قندهی شکلده منطقه دولتلرینینگ حاکمیتیگه یاکه حدودینی بوزمسلیگی کېرهکلیگینی همده حربي امکانیتلریدن فایدهلنیب منطقه دولتلرینی تهدید قیلمسلیگی لازملیگینی ایتیشدی.
اولر شونینگدېک، ایراننی اۉزیگه علاقهدار گروهلرنی قۉللب-قوّتلش و مالیهلشتیریشنی تۉختهتیشگه، هرمز بۉغازینی یاپیش یاکه خلقارا دېنگیزنی بوزیشگه قرهتیلگن هر قندهی حرکت یاکه تهدیددن واز کېچیشگه چقیریشدی.
بو دولتلر اېراننی در بابالمندب بۉغازیده دېنگیز خوفسیزلیگیگه تهدید قیلمسلیککه هم اوندهشدی.
اېران امریکا و اسرایل هجوملری باشلنگنیدن بېری منطقهدهگی بیر قطار دولتلرده، جملهدن سعودیه عربستان، قطر، بیرلشگن عرب امیرلیگی، کویت و بحرینده تورلی نشانلرگه منتظم هجوملر قیلگن.
اېران اېسه بو هجوملرنی امریکا حربي بزهلری و منطقهدهگی کوچلر جایلشگن حدودلرگه قرشی «اۉزینی حمایه قیلیش حقوقی» اساسیده عملگه آشیریلگنینی ایتهدی.
اما منطقه دولتلری بو هجوملرنی حاکمیتنی بوزیش دېب حسابلب، اۉزلریگه جواب قَیتریش حقوقینی سقلب قالیشلرینی بیلدیرگن.
