امریکا قۉشمه ایالتلری تشقی ایشلر وزیری مارکو روبیو هندستانده ژورنالیستلرگه بېرگن بیاناتیده، بوگون کون آخریگچه امریکا و ایران اۉرتهسیدهگی کېلیشوو حقیده یخشی ینگیلیکلر نشر قیلینیشی احتمالی بارلیگینی ایتدی.
«اندی تیوی» خبریگه کۉره، روبیو دهلیده هندستانلیک همکسبی بیلن اۉتکزیلگن مطبوعات انجمنیده شوندهی دېگن: «مېنیمچه، احتمال یقین بیر نېچه ساعت ایچیده دنیا یخشی ینگیلیکلرنی اېشیتیشی ممکن.»
امریکا تشقی ایشلر وزیرینینگ قۉشیمچه قیلیشیچه، ایران بیلن شکللنهیاتگن تینچلیک کېلیشووی هرمز بۉغازی بیلن باغلیق خواطرلرنی برطرف اېتهدی.
اونینگ ایتیشیچه، بو کېلیشوو آخر-عاقبت امریکا جمهور رییسی دونالد ترامپ ایستهیاتگن نقطهگه آلیب بارهدیگن جریاننی باشلهیدی یعنی دنیا اېندی ایران نینگ هستوي قورالیدن قۉرقمهیدیگن یاکه خواطر آلمهیدیگن حالتگه کېلهدی.
بوندن آلدین امریکا جمهور رییسی دونالد ترامپ هم ایران بیلن کېلیشوو یکوني باسقیچده اېکنینی و تامانلر اونینگ تفصیلاتلرینی محاکمه قیلهیاتگنینی ایتگن اېدی.
شونینگدېک امریکا قۉشمه ایالتلری اوشبو کېلیشوو اساسیده هرمز بۉغازی قَیته آچیلیشینی بیلدیرگن. مذکور دېنگیز یۉلی اوروش باشلنگنیدن بویان ایران تامانیدن یاپیلگنی و بونینگ آرتیدن دنیا بازاریده نفت نرخلری کېسکین آشگنی ایتیلماقده.
ایران و امریکا اۉرتهسیدهگی کېلیشوو یکونلنهیاتگنی حقیدهگی خبرلر پاکستان اوردوسی قوماندانی عاصم منیرنینگ تهرانگه سفری آرتیدن پیدا بۉلدی. پاکستان اوردوسی باش قوماندانی جمعه آقشامیده تهرانگه بارگن و کېچه اېراننینگ یوقاری مرتبهلی رسميلری بیلن امریکا بیلن مذاکرهلر یوزهسیدن صحبتلردن سۉنگ تهراننی ترک اېتگن.
پاکستان ایران و امریکا اۉرتهسیدهگی مذاکرهلرده رسمي واسطهچیلیک قیلماقده. پاکستان باش وزیری شهباز شریف هم ایکّی تامان یقین آرهده تینچلیک کېلیشووینی امضالشیگه امید بیلدیرگن.
