طالبان باش وزیری محمدحسن آخوند بوگون شنبه، ۳۰ – جوزا، قزاقستان باش وزیرینینگ اۉرینباسری و بو مملکت اقتصاد وزیری سیریک ژومانگارین باشچیلیگیدهگی هیات بیلن اوچرهشدی.
ارگ تامانیدن نشر اېتیلگن بیاناتگه کۉره، اوچرهشوو ایکّی تامانلمه مناسبتلر و همکارلیکلر خصوصیده بحث اېتیلیب، طالبان باش وزیری بو گروهنینگ تورلی ادارهلریدن قزاقستان بیلن همکارلیکلرینی آشیریشلرینی سۉرهگن.
شو بیلن بیرگه، طالبان باش وزیری، قزاقستان بیلن افغانستان اۉرتهسیده تورلی ساحهلردهگی همکارلیکلر کینگهییشینی هم اۉرغولهگن.
ارگ تامانیدن نشر اېتیلگن بیانات اساسیده، قزاقستان باش وزیری اۉرینباسری بو مملکت افغانستانگه خاص اعتبار قرهتیب تورگنینی بیلدیریب، افغانستان بیلن قزاقستاننینگ یخشی مناسبتلر دوام اېتیشی و بو مملکتنینگ افغانستان اوچون بۉلگن انسانپرورلیک یاردملری هم دوامیدن ایشانچ بېریلگن.
عینی حالده، طالبان باش وزیری، اوشبو هیاتدن قزاقستان جمهور باشلیغی قاسم جومر توقایفگه هم پیامی اینیقسه افغانستانگه سفر قیلیشی اوچون تکلیفینی یېتکزیشینی سۉرهگن.
ایتیش کېرهک قزاقستان هم دنیانینگ باشقه کۉپلب مملکتلری کبی حاضرگچه طالباننی رسمیتگه تَن آلگن اېمس. دېیرلی چمهسی بېش ییلدن بېری افغانستانده حاکمیتلرینی دوام اېتتریب کېلهیاتگن طالبان حاضرگچه یالغیز روسیه تامانیدن رسمی تَن آلینگن و شوندهی بۉلسه هم کۉپلب مملکتلر بو گروه بیلن مناسبتلری و علاقهلرینی دوام اېتتیرماقده.
