مین اوچون اۉزبېک تیلی یالغیز صحبت قیلیش واسطه‌سی اېمس؛ بلکیم اۉزلیگیم، خاطره‌لریم و مدنیت ریشه‌لریم‌نینگ بیر قسمی دیر.
باله‌لیگیم‌ده اۉزبېک تیلی یالغیز اویده گپلشیله‌دیگن بیر تیل ایدی. مین شو تیلده یالغیز اویده گپلشه‌ردیم و ۲۰۲۱-ییل‌گچه هیچ قچان تیلیم سبب بیرار دستورگه تکلیف ایتیلمه‌گن ایدیم.
شونده‌ی بیرحالده، بیرینچی مرته کابل ده اۉیوشمه‌لر، فرهنگی نهادلر و مدنیت‌سیور کیشیلر همکارلیگی بیلن فرهنگی بیر دستور یۉلگه قوییلگنی‌دن کیېن، آنه تیلیم‌گه بۉلگن قره‌شلریم ینه‌ده چقورلشدی. اۉنگه بۉلگن مهر-محبتیم و فخریم آشدی. بو کبی برنامه یۉلگه قوییلیشی اۉزبېک تیلی‌نینگ نه‌فقط عایله‌لرده، بلکیم مدنی و اجتماعی احتفاللرده هم یخشی اۉرین‌گه اېگه بۉلیشی اوچون بیر امکانیت بۉلدی.
استه-سیکین بو قیزیقیشلر و احتفاللر ولایتلر، تومنلر و حتا قیشلاقلرده یاییلدی. یالغیز ۲۹-میزان ده نشانلنگن احتفال بوگون اېسه میزان آیی‌نینگ بیرینچی کونی یقین‌لشی بیلن کوپینچه کیشی اوشبو کون‌نی نشانلش مقصد تیارگرلیک آلیش‌گه باشله‌یدی و چیرایلی اۉزبېکانه کییملر، رنگ‌به-رنگ طعاملر و بیرلیک بیلن احتفاللرنی چیرایلشتیره‌دیلر.
یوزی تبسم بیلن توله باله‌لر، آنه تیلیمیز‌ده‌گی شعرلرنینگ اوقیلیشی طفیلی قولاققه یېتیشه‌دیگن سیسلر و مهمانلرنی کوتیب آلیش اوچون اۉزبېکانه کییملر کییب «آپه جان خوش کیلیب‌سیز» دېگن ایناغه‌لریمیزنینگ قولینی بغریگه باسیب قدرلشی، بو کونلرنینگ اینگ گوزه‌لیکلریدن دیر. بو لحظه‌لر ایسه تیل‌‌نینگ یالغیز سۉزلردن عبارت اېمسلیگی، بلکیم نسل‌لر، فرهنگ و کیم‌لیک آره‌سیده بیر تیریک رشته‌نی کۉرسته‌دی.
اویی‌میز تۉرت دیواری آره‌سیده کوپراق یېشیتیله‌دیگن تیلی‌میز‌نینگ بوگون مدنی احتفاللر، خلق آره‌سیده مهر و فخر بیلن نشانلنه یاتگنی‌نی کوریش، قنچه چیرایلی دیر. آنه تیلینی قدرلش، اۉزلیگی‌میزنینگ بیر قسمی‌نی قدرلش دیر. بو میراث‌نی نه‌فقط بیر کون، بلکیم ییل‌نینگ هر کونی‌ده اسره‌ب و باشقه نسللرگه ییتکزیشیمیز کېره‌ک.
