افغانستانده ۲۹نچی میزان اۉزبېک تیلی ملی کونی کینگ نشانلنیب و ایلیق کوتیب آلینماقده اېکن بیراق تیل رواجی برابریده‌گی توسیقلیکلر هلی هم دوام اېتماقده دیر.
بو خصوصده بۉلگن اساسی معمالردن بیری بو معارف ساحه‌سیده، اۉزبېک باله‌لری آنه تیللریده تعلیم آلیش حقوقی بوزیلیب کېله‌یاتگنینی دوام اېتیشی دیر.
اۉزبېک تی‌وی صحبت اۉتکزگن بیر قنچه ولایتلرده‌گی مکتبلرده، اۉزبېک تیلیده درسلیک کتابلری یۉقلیگی شکایت قیلینماقده و مکتب اۉقیتووچیلری و اۉقووچیلری بو معماگه اعتبار قره‌تیلیشینی سۉره‌یدی.
سرپل ولایتی‌نینگ ایریم حدودلری کبی اۉزبېکلر یشاوچی قیشلاقلر مکتبلریده، اۉزبېک تیلی درسلیک کتابلری یۉقلیگی معلوم قیلینگن.
شونینگدېک، کتاب بۉلگن حدودلرده اۉزبېک تیلی‌دن درس اوته‌یدیگن معلم یۉقلیگی یا هم عکسینچه اۉقیتووچی بۉلگن مکتبلرده کتاب یۉقلیگی معماسی موجود دیر.
بغلان و قندوز کبی ولایتلرنینگ اۉزبېکلر یشاوچی کۉپلب حدودلری کبی مکتبلرده، اۉزبېک تیلیده اصلا درس اۉقیتیلمسلیگی و حتا که بیر مضمون هم بو تیل‌ده یۉقلیگی اهالی شکایتینی اۉرته‌گه آلیب کېلگن.
تاکیدلش کېره‌ک که افغانستانده اۉزبېک تیلیده تعلیم طلبی اوزاق ییللردن بیری ایلگری سوریلماقده بیراق تېگیشلی اداره‌لر بو طلبنی همان اعتبارسیز قالدیریب کېلماقده دیر.
