افغانستانده پولیوگه قرشی عمومی اېملش کمپاینی باشلنیشی بیلن بیر وقتده، اوشبو کسللیک عاقبتلرینی اۉز حیاتیده باشدن کېچیرگن انسانلر عایله‌لردن بېش یاشگچه بۉلگن فرزندلرینی اېمله‌تیشنی سۉره‌ماقده. اولر‌نینگ تأکیدلشیچه، بو آرقه‌لی باشقه باله‌لر هم مذکور کسللیک عاقبتیده یوزه‌گه کېله‌دیگن معمالرگه دوچ کېلیشی‌نینگ آلدی آلینه‌دی.
بلخ ولایتیده یشاوچی، معلوللیگی بۉلگن عیاللردن بیری نوريه امیری باله‌لیگیده پولیوگه چه‌لینگنینی اَیته‌دی. اونینگ سۉزلریگه کۉره، اۉشه پیتده یوریش اونگه قیین بۉلگن و اوزاق مصافه‌لرنی باسیب اۉته آلمه‌گن. نوريه بو حالت اۉزی ایسته‌گندېک تعلیم آلیشنی دوام اېتتیریشیگه تۉسقینلیک قیلگنینی تأکیدله‌یدی.
نوريه شفاکار بۉلیشنی آرزو قیلگنینی، بیراق جسمانی معمالری و قتناوده‌گی قیینچیلیکلر بو آرزوسیگه اېریشیشیگه تۉسقینلیک قیلگنینی اَیته‌دی. شونینگدېک، او مکتبده اَیریم باله‌لر‌نینگ نااۉرین مناسبتینی اېسلب، جسمانی حالتی سببلی اوستیدن کولیشگنینی و بو اونی رنجیتگنینی بیلدیره‌دی.
نوريه‌‌نینگ اَیتیشیچه، تخمیناً ۱۵ ییل آلدین آیاغی‌نینگ شکلی اۉزگرگنی سببلی جراحلیک عملیاتینی باشدن کېچیرگن. اونینگ سۉزلریگه کۉره، کېینچه‌لیک سویدن کمیته‌سی یاردمیده دوالنیش اوچون کابلگه بارگن و کیور شفاخانه‌سیده عملیات قیلینگن. شونینگدېک، او کېینچه‌لیک قیزیل خاچ تشکیلاتیدن یوریشگه یاردم بېرووچی ماسلمه آلگن. نوريه حاضر اوّلگیدن یخشیراق یوریشینی، بیراق هنوز آغیر بویوملرنی کۉتره آلمسلیگینی و اَیریم ایشلرنی بجریشده قیینه‌لیشینی اَیته‌دی.
او حیاتده‌گی قیینچیلیکلرگه قره‌مه‌ی، مکتبنی تماملشگه و عایله قوریشگه موفق بۉلگنینی تأکیدله‌یدی. حاضرده اوچ فرزندی بار نوريه عایله‌لردن باله‌لرینی پولیوگه قرشی اېمله‌تیشنی سۉره‌یدی، تاکه اولر اۉزی باشدن کېچیرگن معمالرگه دوچ کېلمسین.
نوريه‌‌نینگ آنه‌سی گلچهره هم قیزی باله‌لیگیده یوریشده قیینه‌لگن کونلرنی اېسله‌یدی. اونینگ اَیتیشیچه، نوريه توغیلگن پیتده اولر آقچه تومنیده یشه‌شگن و اېملش‌نینگ اهمیتیدن بې‌خبر بۉلیشگن. گلچهره‌‌نینگ سۉزلریگه کۉره، اۉشه دورده اَیریم عایله‌لر باله‌لرینی اېمله‌تمه‌گن. او هم سوادسیزلیگی سببلی واکسین‌‌نینگ اهمیتی و اېملنمسلیک قنده‌ی عاقبتلرگه آلیب کېلیشی ممکنلیگینی بیلمه‌گن.
گلچهره نوريه‌‌نینگ آیاقلری ضعیفلشیب، یوریشی قیینلشگنینی سېزگنیدن سۉنگ اونی شفاکارلرگه آلیب بارگنینی اَیته‌دی. شفاکارلر اېسه اولرگه نوريه پولیوگه چلینگنینی معلوم قیلیشگن.
اونینگ قۉشیمچه قیلیشیچه، نوريه باله‌لیگیده حتا زینه‌دن چیقیب-توشیشده هم قیینه‌لگن، جسمانی حالتی سببلی مکتبده باشقه‌لر‌نینگ مسخره‌سیگه دوچ کېلگن. گلچهره‌‌نینگ اَیتیشیچه، قیزی بعضاً ییغلب مکتبدن اویگه قَیتر و صنفداشلری‌نینگ مناسبتیدن شکایت قیلردی.
نوريه‌‌نینگ آنه‌سی اۉشه پیتده قیزینی اېمله‌تمه‌گنیدن جوده افسوسلنیشینی و بو‌نینگ اوچون اۉزینی کۉپ بار عیبله‌گنینی اَیته‌دی. او حاضر آنه‌لردن هر قنده‌ی قیینچیلیککه قره‌مه‌ی، طبیات خادملری کېلگنیده فرزندلرینی اېمله‌تیشنی سۉره‌یدی، تاکه اولر اونینگ قیزی باشدن کېچیرگن تقدیرگه دوچ کېلمسین.
نوريه بیلن بیر قطارده، احمد تابش شیرزاد هم پولیو عاقبتلری بیلن یشه‌یاتگن انسانلردن بیریدیر. اونینگ اَیتیشیچه، جسمانی معمالریگه قره‌مه‌ی، تعلیمینی دوام اېتتیریشگه موفق بۉلگن و افغانستان همده ایراندن ایکّی ته لیسانس دیپلومینی آلگن.
تابش‌نینگ تأکیدلشیچه، معلوللیگی بۉلگن انسانلر هم تعلیم آلیشی و جمعیتده مهم ا‌ۉرین توتیشی ممکن. بیراق ضرور شرایطلر‌نینگ، اینیقسه، قتناو امکانیتلری‌نینگ یېتیشمسلیگی اولر‌نینگ کونده‌لیک حیاتینی قیینلشتیره‌دی. اونینگ سۉزلریگه کۉره، شخصی و اداری ایشلری‌نینگ کۉپینی مستقل بجره آله‌دی، اما بیر جایدن باشقه جایگه باریش و کۉچیشده یاردمگه محتاج.
او حیاتیده‌گی قیینچیلیکلردن بیری جسمانی آغریقلر و اۉزی کبی حالتگه دوچ کېلگن انسانلرنی کۉریش اېکنینی، بیراق اولر‌نینگ برچه‌سیگه یاردم بېره آلمسلیگینی اَیته‌دی. تابش عایله‌لرنی پولیوگه قرشی اېملش کمپاینیده همکارلیک قیلیشگه چقیریب، باله‌لرنی اوشبو کسللیکدن حمایه قیلیش مهم‌لیگینی تأکیدله‌یدی.
جهان ساغلیقنی سقلش تشکیلاتی معلوماتلریگه کۉره، ۱۹۸۸-ییلدن بویان دنیاده یاووایی پولیوویروس سببلی یوزه‌گه کېله‌دیگن پولیو حالتلری ۹۹ فایزدن کۉپراققه کمه‌یگن. ۱۹۸۸-ییلده ۱۲۵ دن آرتیق مملکتده اوشبو کسللیک‌نینگ قریب ۳۵۰ مینگ ته حالتی قید اېتیلگن اېدی. افغانستان و پاکستان هنوز یاووایی پولیوویروس محلی روشده ترقه‌لیب تورگن مملکتلر قطاریگه کیره‌دی.
باله‌لر فلجی‌نینگ آلدینی آلیشگه قره‌تیلگن عمومی اېملش کمپاینی ۲-نوامبر، دوشنبه کونی افغانستان‌نینگ اکثریت حدودلریده باشلندی و ۵-نوامبرگچه دوام اېته‌دی. ساغلیقنی سقلش وزیرلیگی معلوماتیگه کۉره، اوشبو کمپاین دایره‌سیده بېش یاشگچه بۉلگن ۱۲،۸ میلیون باله‌نی اېملش رېجه‌لشتیریلگن. جَنوبی منطقه‌ده کمپنی ۳–۶-نوامبر کونلری، لوگر ولایتیده اېسه ۹–۱۳-نوامبر کونلری اۉتکزیلیشی بېلگیلنگن.
پولیو عاقبتلرینی اۉز حیاتیده باشدن کېچیرگن انسانلر عایله‌لردن کمپاینی دوامیده بېش یاشگچه بۉلگن فرزندلرینی اېمله‌تیشنی و طبیات خادملری بیلن همکارلیک قیلیشنی سۉره‌ماقده. اولر باله‌لرنی اۉز وقتیده اېملش پولیو بیلن کسللنیش و اونینگ عاقبتلری‌نینگ آلدینی آلیشی ممکنلیگینی تأکیدله‌ماقده.
