بوگون اېرته‌لب‌دن همه‌میز، هندوستان نینگ پاکستان‌گه قرشی راکته هجوملری و بو هجوملر آرتیدن پاکستان کوچلری نینگ هندوستان حدودی‌گه قرشی آتیشمه‌لری، شونینگدېک بو تارتیشوولر حقیده‌گی، مناسبت‌لرگه باغلیق خبرلر بیلن باشله‌دیک.
هندوستان و پاکستان اۉتمیشی بیر مملکت بۉلیب، بیراق حاضرگی کونلرده جدی رقیب‌لر تانیله‌دی و آره‌لریده‌گی تارتیشوولرنی اساسی سببی هم، کشمیر حاکمیتی اوستیده‌گی جنجللر دیر.
دېیرلی کمیده ۱۵ میلیون جمعیت‌گه ایگه بۉلگن کشمیر، ییللردن بیری پاکستان و هندوستان آره‌سیده، جنجللرنی اۉرته‌گه آلیب کېلماقده دیر.
کشمیر پاکستان و هندوستان آره‌سیده ایکی حصه‌گه بۉلینگن بۉلسه هم، بیراق بو ایکی مملکت‌دن هر بیری، مذکور منطقه بوتونله‌ی حاکمیت‌نی قۉلگه آلیش‌گه دعوا قیله‌دیلر.
هندوستان و پاکستان جنجللری حاضر قندی حالت‌ده؟
اېسلب اۉتگندیک، هندوستان و پاکستان آره‌سیده اۉتگن کیچه‌دن بیری اوروش و تۉقنه‌شوو باشلنگن. هندوستان تامانیدن باشلنگن اوشبو تۉقنه‌شوو، کمیده ایکی هفته‌دن بیری یوز بېریشی احتمال بېریلیب کېلماقده اېدی. بوندن ایکی هفته ایلگری هندوستان حاکمیتیده بۉلگن کشمیرده سیاح‌لر اوققه توتیلیب، کمیده ۲۶ کیشی جان بېرگن اېدی.
بو واقعه آرتیدن هندوستان باش وزیری جدی مناسبت بیلدیریب، بو مملکت حربی کوچلری‌گه پاکستان‌گه هجوم قیلیش اوچون اختیار بېردی. هندوستان نینگ ادعا قیلیشیچه، مذکور هجوملرنی اۉیوشتیرگن ترورچیلر پاکستان‌دن کېلیب بو ایش‌گه قۉل اۉرگن.
ایندی اېسه، هندوستان نینگ اۉتگن کیچه اۉیوشتیرگن راکته هجوملری آرتیدن، هسته‌ای قورالگه اېگه بو ایکی مملکت تۉلیق بیر اوروش تامان اوتیشی حقیده خواطرلر جدی‌لشگن.
هندوستان و پاکستان بیر بیراوی بیلن تۉلیق اوروش باشله‌یدیمی؟
کۉپلب سیاسی و خوفسیزلیک مساله‌لر ایش بیلرمان‌لری، هندوستان و پاکستان حاضرگی شرایطده، تۉلیق اوروشده باشلش‌گه تیار اېمس دېب بیلدیرماقده دیر.
بوندن ایلگری کشمیر مساله‌سی اوستیده، کمیده بیش مراتبه؛ ۱۹۴۷ -۱۹۶۵ – ۱۹۷۱ – ۱۹۹۹ و ۲۰۱۹ – ییللری، تۉقنه‌شوو اۉتکزگن هندوستان و پاکستان، حاضر هر قندی بیر تۉلیق اوروش باشلشی منفعت‌لریگه اېمس‌لیگینی بیله‌دی دېب ایشانه‌دی. بو حقده ایش بیلرمانلر.
ایشانچ‌لرگه کۉره، هندوستان اوروش باشلنگن تقدیرده، بو وضعیت‌دن منطقه‌ده‌گی باشقه رقیب‌لر جمله‌دن چین، هندوستان‌گه قرشی ناتۉغری فایده‌لنیشیدن خواطرده دیر.
عینی حالده، بو تامان‌ده پاکستان هم حاضر دواملی بیر اوروش تامان کېتیش‌گه تیار کۉرینمه‌یدی. چونکه بو مملکت اقتصادی کۉرینیش‌دن بوندی بیر اوروش‌گه تیار اېمس دیر.
اوروش بۉلگنده غالب قیسی تامان بۉله‌دی؟
ایلگری ایتیب اۉتگندیک، حاضر هندوستان و پاکستان ایکیسی هم تۉلیق و دواملی بیر اوروش تامان کېتیش‌گه تیار اېمس دیر. بیراق اگرده شوندی بیر وضعیت یوز بېرگن تقدیرده، بو ایکی مملکت هم هسته‌ی قوراللرگه ایگه بۉلگنلری اوچون مذکور اوروش خوفلی بۉلیشی کوتیله‌دی.
اوروش یوز بېرگن تقدیرده، هسته‌ی قورال هر قندی بیر تحلیللرنی ناتۉغری چیقاریشی ممکن. بیراق بو قوراللرنی نظرگه توتمه‌گن حالده، هندوستان رقیبی پاکستان‌گه نسبتن اوروش‌گه کۉپراق تیار دیر و چانس کۉپراق هندوستان بیلن دېب ایشانه‌دی، حربی مساله‌لر بۉییچه ایش بیلرمانلر.
معلومات‌لرگه کۉره، هندوستان نینگ حربی بودجه‌سی کمیده ۷۰ میلیارد دالر دیر که بو تامان‌ده پاکستان نینگ ۸ میلیارد دالر اطرافیده حربی بودجه‌سیدن کمیده اۉن برابر کۉپراق. شو اوچون هندوستان اقتصادی کۉرینیش‌دن کۉپراق اوروش‌گه تیار و اوروش نتیجه‌سی نفع‌گه بۉلیشی ممکن.
عینی حالده، پاکستان‌گه نسبتن کمیده ایکی-یریم برابر کۉپراق حربی‌گه ایگه هندوستان، تکنالوژِی و استراتیژیک همده هوایی مدافعه امکانیت‌لری جهت‌دن هم پاکستان‌دن کۉره کوچلی‌راق کۉرینه‌دی.
بو اوروش نینگ افغانستان اوچون تاثیرلری قندی؟
هندوستان و پاکستان آره‌سیده تارتیشوو قنچه‌لیک یامان‌لشیشی، بو ایکی مملکت نینگ منطقه‌ده شریک و دوست تاپیش‌گه جبرلنتیره‌دی. شو اوچون ایکی مملکت هم طالبان‌نی اۉزی‌دن قیلیب، بیر بیراوی‌گه قرشی ایش آلیش اوچون طالبان‌گه بیران امتیازلرنی نظرگه توتیشی ممکن.
عینی حالده، هندوستان و پاکستان آره‌سیده اوروش یوز بېریشی کۉپراق، افغانستان اوستیده اقتصادی تاثیر آلیب کېلیشی کوتیله‌دی. چونکه افغانستان سوداگرلیک ساحه‌سیده کۉپراق پاکستان و بو مملکت یۉلی‌گه باغلیق دیر.
حاضر هم بیر نیچه وقت‌دن بیری پاکستان و هندوستان آره‌سیده تارتیشوولر جدی‌لشگنیدن بېری، افغانستان نینگ پاکستان آرقه‌لی هندوستان‌گه بۉلگن صادراتی هم تۉخته‌تیلیب قوییلگن. افغانستان اۉتگن ییلی ۶۲۷ میلیون دالر ارزش‌گه هندوستان‌گه سوداگرلیک محصولاتلرینی یوبارگن اېکن که بو رقم افغانستان صادرات رقمینی کۉپ قسمینی تشکیل بېره‌دی و بو سوداگرلیک هم کۉپینچه پاکستان یۉلی آرقه‌لی بجریلگن.
