ایکّی ییل دوامیده، دنیاده یوز بېره‌یاتکن اۉزگریشلر و واقعه‌لرنی کوزه‌تیش‌نی مقصد قیلگنینگیزده، کۉپینچه خبرلر یقین شرق حدودیده قره‌تیلگنینی سېزیب بیلگن‌سیز دیر. بیر تامان اوروش و قان‌ده بیله‌نیب یاتکن بو منطقه، باشقه بیر تامانی‌ده سیاسی معامله‌لر ییللر دیر که دوام اېتیب تورگن.
یقین شرقده روی بېره‌یاتکن اۉزگریشلرنی کۉزه‌تگن تقدیرده، بو اۉزگریشلر ایچیده «اسرائیل» آتی کېنگ کۉزگه کۉرینه‌دی. بیر تاماندن هجوملری، حربی یوریشلری و باسیملری بیلن غزه‌ده دهشت یره‌تیب، مینگلب انسان اینیقسه باله‌لر و عیاللر اۉلیمی‌گه سبب بۉله‌یاتکن اسرائیل؛ هلی خبر بۉله‌یپمیز ایران‌گه هجوم قیلگن و بو هجوم توگه‌شی بیلن باشقه تاماندن یمن، سوریه و حتا قطرگه هجوم اویوشتیردی.
اسرائیل بو هجوملری شدت‌لنیشی و اونگه قرشی دنیا مملکت‌لرینی ناراض‌لیگینی نظرگه توتکن حالده، نیمه اوچون اسرائیل نه شرقی مملکتلر تنقیدیگه و نه هم غربی اولکه‌لر ناراضلیگی تَن بېرمه‌یدی؟ دېگن سوراق باشیمیزگه کېله‌دی.
حقیقتن اسرائیل بو بی‌پروارلیکلری قه‌یېردن کوچلنه‌دی و یقین شرق احوالی‌گه نسبتن مملکتلرنینگ حاضرگی یانده‌شوولریگه سبب نیمه دیر؟ بو سوراق‌لرنی ژورنالیست اوله‌راق کۉپلب مراتبه سیاسی مساله‌لر اینیقسه یقین شرق احوالی‌گه باغلیق موضوعلر خصوصیده فکر و قره‌شلرینی آلیش‌گه اولگورگن شخص‌لردن بیری و یقین شرق مساله‌سی بۉییچه چوقور معلوماتلی تحلیلچیلردن، ولی فروزان جنابلریگه مراجعت قیلدیم.
سیز اۉقیب تورگن بو یازوونی اېسه، جناب فروزان معلوماتلری همده فکر و قره‌شلریگه ته‌ینیب تیارلب، بو ییرده اختیارینگیزگه قۉیه‌من.
اسرائیل؛ شرق و غرب اۉرته‌سیده‌گی معما
اسرائیل دېگن بیر مملکت یا-ده انیق‌راق اَیتکنده منطقه‌وی معما، یقین شرق حدودلریده ایکّینچی جهان اوروشی‌دن کېین تاپیلدی.
ولی فروزان ایشانچی‌گه کۉره، مینگلب ییل ایلگری غربیلر اینیقسه اروپا مملکتلری اسرائیل و یهودی‌لرنی بیر معما اوله‌راق سېزگچ، اولرنی بوتونله‌ی یۉق اېتیش یا -ده هیچ بۉلمه‌گنده اروپادن کوچیریب، بو معمانی یقین شرق، عربلر و مسلمانلر بیلن درگیر قیلیب، اۉزلرینی قوتقریش اوچون اولگورگن.
فروزان ایکّینچی جهان اوروشی باشلنیشی و آلمان رهبری آدولف هیتلرنینگ یهودی‌لرنی قیرغین قیلیش‌گه قرار قیلیشی هم، خودی شو مقصد بیلن بۉلگنینی بیلدیره‌دی.
فروزان‌نینگ بو حقده ایتیشیچه «اروپالیکلر تۉرت مینگ ییل‌دن بیری خواهله‌یدی یهودیلر اروپادن کوچیریلسه، مثال اوچون ایکّینچی جهان اوروشی باشلنشی و هیتلر یهودی‌لرنی قیرغین قیلیش‌گه قرار قیلیشی هم شو سبب دیر. اروپا یهودیلر معماسینی منطقه، عربلر و مسلمانلر اوستیگه تشله‌گن و هیچ قچان یهودیلر اروپاگه قیتیش‌گه تیار بۉلمه‌یدیلر.»
شو اساسده، غربی مملکتلر اسرائیل و یهودی‌لرنی یقین شرقده بۉلگن تۉقنشوولری دواملی بۉلیب، هیچ قچان اروپاگه قیتمسلیکلرینی خواهله‌یدی و بو اوچون بو مملکتلر اسرائیل بیلن یقین شرق اهالیسی آره‌سیده‌گی کېلیشماوچیلیکلر حل بۉلمسلیگی آرتیدن دېب، بیلدیره‌دی ولی فروزان بو حقده‌گی سۉزلریده.
عرب مملکتلر یانده‌شووی؛ عرب‌لرنینگ عثمانی تورکلرگه قیلگن خیانتی عاقبتی
بیرینچی و ایکّینچی جهان اوروشی و اوندن کېین یقین شرقده روی بېرگن سیاسی و حربی اۉزگریشلرنی یخشیلب اۉقیگنینگیزده، بیله‌سیز که عربلر قدرت همده انگلیس وعده‌لری اساسیده، ییریک اسلامی امپراتورلیگی بۉلمیش عثمانیلرگه خیانت قیلیب، انگلیسلر بیلن بیرلشه‌دی. بو حقده جهان اوروشی دوامیده مکه‌نینگ اوشبو وقتده‌گی حاکمی شریف حسین، عثمانیلرگه قیلگن خیانتی و نتیجه‌ده فلسطین انگلیسلر قۉلی‌گه توشیب قالگنینی مثال بېریشیمیز ممکن دیر.
شوندن کېین حاضر عرب مملکتلری و حاکمیت‌لری انگلیس تامانیدن قوریلیب و انگلیس و امریکانینگ اقتصادی، سیاسی و حربی قورشاوویگه اۉته‌دی.
خلق ارا علاقه‌لر مساله‌لری بۉییچه تحلیلچی ولی فروزان، اوشبو قورشاوو سبب بوکونلر عرب مملکتلری و بو مملکتلرده حاکم ابن سعود کبی پادشاه‌لیک عایله‌لری هیچ قچان منطقه منفعتی اساسیده اېمس، بلکه انگلیس و امریکا طلبی‌گه اساس حرکت قیله‌دی دېب ایشانه‌دی.
«انگلیس و عثمانی‌لر اۉرته‌سیده قرشی‌لیکلر جدی‌لشگنده، انگلیسلر عرب‌لرنینگ ابن سعود کبی عایله‌لری بیلن بیرله‌شیب، اولرنی عثمانیلرگه قرشی تۉخته‌تدی. شو سبب حاضرگی عرب مملکتلری و اولرنینگ حاکملری انگلیس تامانیدن توزه‌تیلدی.»
دېیرلی ولی فروزان عرب مملکتلری اوشبو باسیم آستیده، حاضر غربی مملکتلر جمله‌دن امریکا و انگلیس‌ده، اۉزلری تیللریدن آلگن سرمایه‌لریدن کتّه بۉلیمینی بو مملکتلرده یاتقیزگن. شو اساسده عربلر، غربی‌لرگه اقتصادی باغلنیب قالگن و بو عرب مملکتلری هیچ قچان غزه احوالی کبی حالت‌لرده، غربیلر منفعتی‌گه ضد قرار چیقاریش‌لری ممکن اېمس دېب بیلدیره‌دی.
عرب‌لرگه یره‌تیلگن قۉرقیش؛ اولرنینگ غرب‌گه باغلنتیرگن باشقه بیر سبب
امریکا قۉشمه ایالتلری حاضر قطر و سعودی عربستان‌ده حربی پایگاه‌لری بیلن حضوری بار.
ولی فروزان، غربیلر عربلرنی کمونیزم و روسلر و شونگه اوخشش باشقه بیر قنچه فکرلر و مملکتلر خوفیدن قۉرقیتیب، اولرنی اۉز حمایه‌سیگه محتاج قیلیب آلگن دېب قۉشیمچه قیلدی.
فروزان، «امریکا بو تهدید و خوف بیلن که امریکانینگ حمایه‌سی بۉلمه‌گنده، عرب مملکتلری کمونیست‌لر، روس و آلمانی‌لر هجومی بیلن دوچ کېلیش‌لری ممکن دېب، قۉرقیتیب اولرنی اۉز حمایه‌سیگه محتاج قیلیب آلگن.» دیېه تاکیدله‌یدی.
دېمک بو موضوع‌ده قره‌گنده، عرب مملکتلری هلی بیری غزه بحرانی‌گه یېچیم تاپیب، اسرائیل‌گه ضد قرار قیلالمه‌یدیلر.
اسرائیل اۉزگریشی اوچون امریکاده اۉزگریش لازم دیر
عینی حالده، اسرائیل‌نینگ خلق ارا تنقیدلرگه بی‌پروا حرکتی‌ده اساسی سبب امریکانینگ تاثیرلی نهادلریده‌گی نفوذی‌ده دېب ایشانه‌دی ولی فروزان.
اونگه کۉره، ایکّینچی جهان اوروشی‌دن کېین یهودیلر کۉپلب فعاللری و بیلیمدان‌لری امریکاگه باریب، امریکاده تاثیرلی تشکیلاتلر حتا سنا کېنگشی و دولت کابینه‌سیگه کیریب آلگن و بو نفوذ اېسه حاضر یهودیلر و اسرائیل‌نینگ اساسی تکیه‌گاهی‌گه ایله‌نگن.
دېمک امریکادن بۉلگن کوچلی حمایه، اسرائیل اوچون «ایشانچ توغدیریش» یره‌تگن و شو سبب اسرائیل‌نینگ قانلی یوریش‌لریگه و یوریش‌لر تاباره کۉپه‌یشیگه گواه بۉلماقده‌میز.
خلاصه
اسرائیل یوریشلری و باسیملری دوام اېتر اېکن اونگه نسبتن مملکتلرنینگ حاضرگی یانده‌شووی ثمره‌لی اېمس. ایکّینچی جهان اوروشی‌دن کېین اسرائیل‌نینگ یقین شرقده‌گی حضوری تیزیملی باشقریلگن و حاضرگی غزه احوالی کبی وضعیت‌لر هم شو باشقریش اساسیده یوزه‌گه کېلگن.
شرقی مملکتلر اینیقسه اسلامی مملکتلرنی بیر تامانی عربلر تورکلرگه قیلگن خیانتی‌دن کېین غربیلر باسیمی آستیگه اۉتگن و بیر تامانی هم اۉز منفعت‌لریدن چیقالمه‌یدی و اسلامی مملکتلر اۉز-ارا بیرلیکده اېمس دیر. شو سبب بو مملکتلر هم اسرائیل یوریش‌لرینی تۉخته‌تیش و غزه احوالی کبی وضعیت‌لرنی توگه‌تیشگه قادر اېمس.
شوندی بیر وضعیت‌ده، دنیانینگ عامه‌وی فکری اوروش‌گه ضد کوچه‌یشی یالغیز امید بۉلیب قاله‌دی.
بیز کۉره‌یپمیز امریکا و اروپاده غزه اوروشی دوامی‌گه قرشی‌لیکلر کون-سایین آرتیب بارماقده و اۉتگن کون امریکا جمهور باشلیغی دونالد ترامپ واشینگتن دی سی شهریده‌گی هوتللردن بیریده، بو خصوصده‌گی ضدیتلر و شعارلر بیلن قرشی‌لندی.
اوشبو ضدیتلر سبب یقین کونلرده، اروپا اتفاقی‌نینگ کمیسیون باشلیغی اورزلا فون درلاین، اسرائیل‌گه قرشی تحریملر کۉریب چیقیلیشینی تیلگه آلدی.
شوندی اېکن کونی کېلیب، عامه خلق آره‌سیده اوروش‌گه قرشی‌لیکلر کوچه‌ییب حکومتلر باسیم آستیگه آلینسه، اسرائیل آلدی آلینیب، غزه احوالی توگه‌شی ممکن دیر.
