پاکستان‌دن افغانستان‌لیک مهاجرلر چیقاریلیشی آرتیشی بیلن، بو مملکتده یشاوچی مینگ‌لب اۉزبېک مهاجر، آغیر و خوف آستیده کون‌وکېچه اۉتکزیب تورگنلریدن خبر بېره‌دیلر.
اوشبو مهاجرلردن قطاری اۉزبېک تی‌وی گه مراجعت قیلیب، اولر افغانستان و پاکستان حکومتلری همده حمایه قیلووچی تشکیلات‌لر اعتباری‌دن اوزاق‌ده قالگنلرینی تیلگه آله‌دیلر.
اوشبو مهاجرلر اۉزبېک تی‌وی‌گه ایتیلیشیچه، پاکستان‌نینگ پیشاور و کویته شهرلری‌نینگ ایریم حدودلریده، مینگ‌لب اۉزبېک مهاجر یشه‌یدی و اولر سونگی کونلرده آغیر احواللر بیلن یوز مه یوز بۉلگن.
بو مهاجرلردن بیری‌نینگ ایتیشیچه «بیز یشه‌یاتکن نوآباد ناملی حدودده یقین بیش مینگ اۉزبېک عایله بار. ایلگری هم نیچه مراتبه پاکستان پولیس کوچلری کېلیب، کۉپ کیشی‌لرنی آلیب کېتگن اېدی. اۉتگن کون هم توش‌دن کېین اوچ یریم‌لرده کېلیب، دروازه‌لرنی سیندیریب اوی‌لرگه باستیریب کېردی‌لر. عیاللر و ایرکک‌لر قاچیش‌گه مجبور بۉلدی. مین اۉزیم هم دیواردن تشلب قاچیش‌گه قادر بۉلدیم.»
پاکستان‌ده اوشبو باسیملر سبب، کۉپینچه ساتووچیلر و دکان‌دارلری اۉزبېک بۉلگن «غوث آباد بازاری» بوتونله‌ی تعطیل اېتیلگن.
اۉزبېک تی‌وی گه اوشبو بازاردن یوباریلگن صورت‌لرده، بازار دکان‌لری بوتونله‌ی باغلنگنی کۉرینه‌دی.
خودی شوندی پاکستان‌ده اۉزبېکلر یشاوچی حدودلر اینقسه، نوآباد حدودیده‌گی بیش مینگ اۉزبېک عایله، همده اوچ مینگ‌گه یقین، سمه‌لی ناملی قیشلاقده‌گی اۉزبېک عایله باسیم آستیده قالگن.
پاکستان‌ده یشاوچی بو اۉزبېک مهاجرلرنینگ ایتیشیچه، اولر قومی کم‌سیتیش‌لر بیلن هم یوز مه یوز و افغانستان‌گه قیتیش اوچون هم هیچ قنده‌ی امکانیت‌لری یۉق دیر.
مهاجرلردن بیری‌نینگ بو حقده ایتیشیچه «پاکستان موترلرینی اسلام امیرلیگی قویمه‌ی تورگن و افغانستان‌دن موترلر اېسه سواری اوچون پاسپورت قیلیب بو یاققه کېلمه‌یدی. شو اوچون بیز کۉپلب قیینچیلیکلرگه قالیب یاتیب‌میز.»
بو مهاجرلر افغانستان‌گه قیتریلگندن کېین هم اوی‌سیز و یشش امکانیت‌لری یۉق بیرحالده قنده‌ی حیات کېچیریش‌لری ممکن‌لیگیدن خواطرده دیر.
ایتیش کېره‌ک که پاکستان حکومتی، طالبان بیلن بۉلگن کېلیشماوچیلیکلری سبب، بو مملکتده یشاوچی مهاجرلر اوستیده باسیملرنی کۉپه‌یتیرگن.
