جهان بازارلریده دالر قیمتی پسهییشده دوام اېتر اېکن، بو ارزنینگ افغانستان پول بیرلیگی افغانيگه نسبتاً نرخی هم پهسهییش باسقیچیده کۉرستماقده.
بوگون اېرتهلب (دوشنبه،۲۰ دلو) کابلده بیر امریکا دالری۶۳ افغانيدن سودا قیلینگن.
طالبان نظارتیدهگی مرکزي بانکنینگ سۉنگگی نرخیگه کۉره، دالرنی ساتیب آلیش نرخی۶۳.۶۵، ساتیش نرخی اېسه۶۳.۸۵افغاني اېتیب بېلگیلنگن.
بو سۉنگّی کونلردهگی اېنگ پست نرخ حسابلنهدی. گرچه دالر نرخی افغانستانده بیر نېچه آیدن بویان پهسهییب بارهیاتگن بۉلسه-ده.
اۉتگن ییلی دونالد ترامپ حاکمیتگه کېلیب، افغانستانگه یاردملر تۉختهتیلیشی اعلان قیلینگچ، دالر نرخی آشیب،۷۵ افغانيدن هم یوقاریگه چیقیب کېتگن اېدی.
افغانستانده دالر نرخی اهالینینگ خرید قابلیتیگه بېواسطه تأثیر کۉرسهتهدی، چونکه مملکت صادراتگه باغلیق و تاورلر اساسن دالر آرقهلی آلیب کېلینهدی.
بیراق حاضرگی وقتده قشّاقلیک و ایشسیزلیک نینگ کوچهییشی یانیده دالر نرخینینگ پهسهییشی اهالینینگ خرید قابلیبیگه دېیرلی تأثیر کۉرسهتمهیپتی، اهالی اېسه قیمتلیکدن شکایت قیلماقده. تأکیدلش جایزکی، جهان بازارلریده هم دالر یورو و فونت استېرلینگگه نسبتاً قدرسیزلنماقده.
تحلیلچیلرنینگ فکریچه، دالر قیمتینینگ پسهییشیگه قسماً امریکا جمهور رییسی دونالد ترامپنینگ سیاستی و سودا اوروشلرینینگ کوچهییشی سبب بۉلماقده. بوندهی شرایطده سرمایه یاتقیزوچیلر اۉز مبلغلرینی سقلش اوچون خوفسیزراق منبعلرنی ایزلهماقده، اېنگ یخشی وریانت اېسه آلتین بۉلیب، بو آلتین نرخی نینگ آشیشیگه سبب بۉلماقده.
