ایران تشقی ایشلر وزیری عباس عراقچی، امریکا جمهور رییسی دونالد ترامپ نینگ بیاناتلریگه جوابن، مملکتی هم اوروشگه، هم مذاکرهگه تیار اېکنینی ایتدی.
عاموی اخبارات واسطهلری خبریگه کۉره، عراقچی بوگون دوشنبه، 22-جدی تهرانده اېلچیلر بیلن اوچرهشووده ایران اوروش ایستمیدی، اما اوروشگه تۉلیق تیارلیگینی بیلدیرگن.
او شونینگدېک، ایران «عدالتلی، شرَفلی، تېنگ مقامدن، اۉزارا حرمت و منفعتلرگه اساسلنگن» مذاکرهگه هم تیارلیگینی ایتدی.
دونالد ترامپ بوگون تانگده ایران یېتکچیلری بیلن علاقهگه چیقیلگنی و اولر مذاکره قیلیشنی خواهلشگنی حقیده گپیرگن.
ترامپ نینگ قۉشیمچه قیلشیچه، اوچرهشوو بېلگیلنگن، اما حاضرگی واقعهلر طفیلی اوچرهشوودن آلدین حرکتگه مجبور بۉلیشی ممکن.
سۉنگگی کونلرده و ایراندهگی نمایشلر دوامیده ترامپ تهدید قیلگن: اگر ایران حکومتی نمایشچیلرنی باستیرسه، امریکا تامانیدن جوده قتّيق ضربه بېریلیشی ممکن.
ایران تشقی ایشلر وزیری تهرانده خارجي اېلچیلر بیلن اوچرهشووده مملکتدهگی نمایشلرگه هم اعتبار قرهتدی.
عراقچی شوندهی دېدی: «بیز بیر مدتگچه نمایشلرنی کوزهتدیک، کېین اېسه ترورچیلیک حرکتلری بۉلدی، و بو ایکّی حالتنی فرقلش کېرهک».
او نینگ قۉشیمچه قیلشیچه، ایرانده سۉنگگی کونلرده یوز بېرگن «ترورچیلیک حرکتلریده» امریکا و اسراییل نینگ ارهلشووی حقیده کۉپلب حجتلر موجود.
وزیر «ترورچیلیک حرکتلرینی» همهگه کتّه تهدید دېب اتهدی و باشقه هېچ قندهی تهدید یۉقلیگیگه ایشانچ حاصل قیلینمهگونچه، بعضی چېکلاولر سقلنیب قالیشینی بیلدیردی.
ایراندهگی عاموی ناراضیلیک نمایشلری بوگون اۉزی نینگ اۉن آلتینچی کونیگه کیرگن. ایران حکومتی ناراضیلیکلر کېنگهیگنیدن سۉنگ، پنجشنبه کېچیدن باشلب بوتون مملکت بۉیلب اینترنتنی اوزیب قۉیگن.
بوتون مملکت بۉیلب اینترنت اوزیلیشی دوام اېتهیاتگن بیر وقتده، خلقارا انسان حقوقلری تشکیلاتلری دولت کوچلری تامانیدن نمایشچیلرگه قرشی کېنگ کۉلملی باستیریشدن خواطر بیلدیرماقده.
