۱۶ یاشلی نرگس، قندوز ولایتینینگ خان آباد اولسواللیگینینگ یشاوچیسی. او سکیز کیشیلیک عایلهنینگ اېنگ کیچیک فرزندی.
آتهسی دهقان، آنهسی اېسه اوی بېکهسی. نرگسنینگ بیر اکهسی و آلتی آپهسی بار. اولرنینگ حیاتی عادی کۉپلب قیینچلیکلرگه تۉله بۉلسه هم، نرگس هر دایم مکتبده یخشی اۉقیشگه اینتیلردی.
او، هر تانگ آبی رنگلی رۉمالینی اۉرهی، قیشلاقنینگ چنگ کۉچهلریدن اۉتیب مکتبگه بارردی و مکتب اونینگ اوچون فقط درس اۉقیلهدیگن جای اېمس، بلکه امیدلری و آرزولرینینگ اویی اېدی.
او ۹- صنفنی توگتگن اېدی و کېلهجکده داکتر بۉلیشنی ایستردی. او: «بیرکون کون کېلیب، قیشلاقلردهگی داکتر یېتیشماوچیلیگی سببلی قیینلگن خاتینلرگه، یاردم بېرهمن.»
اونینگ اۉقووتوچیلری دایم نرگسنینگ استعدادی، تیریشقاقلیگی و انتظامنی مقتهشردی.
بیراق ینگی اۉقوو ییلینینگ باشلهنیشی نرگس اوچون ینگی باشلهنیش اېمس، بلکه یکون بۉلدی. بیر نېچه آی آلدین آتهسی کسل بۉلیب قالدی و ایشلشگه کوچی یېتمهدی. حیات خرجتلری آشیب کېتدی، ایرانده ایشلهیاتگن اکهسی بیلن اېسه علاقه اوزیلدی.
عایلهسی مکتب خرجتلرینی تۉلشگه کوچی یېتمس اېدی. آنهسی خواطرگه تۉله کۉزلر بیلن اونگه: «نرگسجان، اېندی مکتبگه باریش وقتی اېمس. او حاضر سېنگه محتاج. یخشیسی اویده قالیب مېنگه یاردم بېر. آتهنگ کسل.» دېب ایتدی.
نرگس بۉغزیگه بۉغیلگن ییغی بیلن جیم قالدی. اونینگ کتابلری طاقچهده آچیق قالیب کېتدی-خوددی اونینگ آرزولری کبی یریم آچیق.”
اېندی اونینگ کونلری آوقت پیشیریش، اۉتین ییغیش، کییم یوویش و آنهسیگه یاردم بېریش بیلن اۉتهدی. بیراق، کېچهلری اوی چراغلری اۉچگن، او کیچیکنه چراقنی یاقهدی و کتابلرینی ینه آچهدی.
ایریم پیتلر دېرهزه آرتیدن صنفداش قیزلرینینگ مکتبگه کېتهیاتگن سېسلرینی اېشیتهدی. او چوقور خورسینیب، سېکین شوندهی دېدی: «مېنگه اۉخشهگن قیزلر اوچون آرزو قیلیش-فقط ارمان.»
لېکن بو واقعه یکونی اېمس اېدی. ینگی ییل، ینگی معمالرنی معمالرنی آلیب کېلدی. قیزلر اوچون ینگی ییل آروزلر و قووانچلر بیلن باشلهنیشی کېرهک اېدی. بیراق، عکسنیچه ینگی قرانغولیک و قیینچیلیکلرنینگ باشلنیشیگه ایلندی.
نرگس شوندهی سۉزلهیدی: «مېن بیر ییلنی مکتبگه بارمسدن اۉتکزدیم. کون بۉیی آتمگه قرهدیم و آنمگه اوی یوموشلریگه یاردم بېردیم. شو وقت ایچیده آتمنینگ احوالی بیراز یخشلندی. سېکین-سېکین ینه ایشلهماقچی بۉلدی. شوندهی قیلیب، اوییمیزنینگ احوالی هم یخشلندی دېب امید قیلگندیک. ایرانده ایشلهیاتگن اکم اېسه فقط اۉز خرجتلرینی زورغه قاپلهی آلهدی، بیزگه کۉپ پول یوباره آلمهیدی. مېن ینگی ییلده ینه مکتبگه قیتهمن دېب جوده امید قیلگندیم. بو مېنی ینه بختلی قیلردی. بیراق، تقدیر ینه مېنگه یاردم بېرمهدی. ینگی ییل مېن اوچون هم، یورتیمدهگی برچه قیزلر اوچون هم ینه قرانغولیکنینگ باشلهنیشیگه ایلندی».
ینگی ییل باشلهنیشی بیلن مکتبلر و بیلیم یورتلر برچه قیزلر اوچون یاپیلدی.
نرگس کبی قیزلر-آرزوسی اۉقیش، بیلیم آلیش و بیر کونی کېلیب عایلهسی همده جمعیتگه خدمت قیلیش بۉلگن قیزلر-اېندی یورهکلریده فقط بیر کون ینه مکتبگه باریش آرزوسی و ارمانینی سقلب قالیشگن.
اولر نینگ هېچ قندهی حمایهچیسی یۉق و کۉپینچه جیم توریشدن باشقه چارهسی هم یۉق. بیراق، بو قیزلر حلی هم امیدینی یۉقاتمهگن. نرگس و اونگه اۉخشهگن مینگلب قیزلرنینگ یورهگی حلی هم اۉز آرزولری اوچون اورماقده.
نرگس کېچهلری، همه اۉخلب قالگنده، کیچکینه نفت چراغینی یاقهدی. اېسکی کتابلرینی ورقلهیدی. او اۉزی اوچون درس قیلهدی. بعضا دفترینی آچیب، مشقلر یازهدی.
او شوندهی دېدی: «مېن ایشانهمن، بو جیملیک ابدی اېمس. بلکه، آرزولریمنی مېندن تارتیب آلیشگن دیر لېکن، ایشانچیمنی اېمس. بیر کونی ینه رۉمالیمنی اۉرهب، کتابلریمنی آلیب صنفگه قیتهمن-رۉمالیم چنگ بۉلسه هم، یورهگی هر قچانگیدن هم یاروغ بۉلهدی.»
نرگس- برچه قیینچلیکلر و چېکلاولرگه قرهمهی، یورهگیده امید چراغینی اۉچیرمهگن یوزلب قیزلردن بیری دیر.
نرگسنینگ یریم اچیق کتابلری اېسه، تسلیم بۉلمهگن قیزنینگ رمزی دیر. جیمکلیگ ایچیده هم امید بیلن یشهیاتگن قیز
