قندوز ولایتدهگی چم تیپه قیشلاغیده؛ کۉپلب عیاللر اویده قالیشنی اۉز تقدیرلری دېب بیلگن جایده، ۳۰ یاشلی سکینه اۉزی اوچون باشقهچه تقدیر یازدی. اونینگ حیاتی تۉرت باله و ناگران تورموش اۉرتاغی بیلن محنت، آغریق و متانت حکایهسی دیر.
بېش ییل آلدین اونینگ تورموش اۉرتاغی ایرانده قوریلیش ایشچیسی بۉلیب ایشلردی. او کۉپراق درآمد تاپیب، عایلهسی اوچون یخشیراق حیات یرهتیش امیدیده ایرانگه کېتگن اېدی. او اوزاق وقت قوریلیشده ایشلهدی. یخشی درآمد تاپردی و عایلهسینینگ حیاتی نسبتا برقرار اېدی . بیراق افسوسکی، بو قووانچ اوزاق دوام اېتمهدی.
ایسق یاز کونلریدن بیریده او قوریلهیاتگن بنانینگ ایکّینچی قبتیدن ییقلیب توشدی. اونینگ بیر ایاغی و اومورتقهلرینینگ ایریم سویکلریلری سینیب کېتدی. جراحتلری چوقور اېدی و او بیر نېچه آی ایراننینگ اۉزیده دوالنیشیگه تۉغری کېلدی.
وقت اۉتیب یرهلر بیتدی، بیراق ایاغی نینگ سینیشی و اومورتقهسیگه یېتگن ضرر اونی دایمی ناگران قیلیب قۉیدی. او اېندی ایشلهی آلمهیدیگن بۉلدی. امیدسیزلیک همده عاجزلیک بیلن ینه اوییگه، قندوزگه قیتدی.
اۉشه کوندن باشلب، بوتون حیات یوکینی سکینه اۉزینینگ نازیلک یېلکهلریگه آلدی.
اوللیگه حیاتینینگ بو کتته ضربهسی سکینهنی بوتونلهی کرخت قیلیب قۉیدی. کېچهلری بالهلرینینگ نفس آلیش سېسینی اېشتیب، قرانغوده جیم ییغلب اۉلتیرردی. بیراق، تانگ آتیشی بیلن او ینه کوچلی بۉلیشگه مجبور اېدی؛ نان اوچون، داری اوچون، کییم اوچون و امید اوچون.
او بیبیسیدن اېسکی قۉل تیکو ماشینینی مېراث قیلیب آلگن اېدی. اۉشه زنگ باسگن ماشین، اونینگ ینگیدن باشلهگن حیاتی بۉلدی.
دستلب او قۉشنیلر اوچون چادر و عادی کییملر تیکردی. آلگن پولی جوده کم اېدی، بیراق بری-بیر اۉشه پول اوییگه نان آلیشگه یېتردی. کېینچهلیک او آزگینه پول ییغیب، متالر ساتیب آلدی و بالهلر کییملرینی اۉزی تیکیب، بېزهب تیارلهی باشلهدی.
کۉپ اۉتمهی اونینگ تیکوچیلیک ملهکهسی قیشلاق بۉیلب مشهور بۉلیب کېتدی. عیاللر اونینگ اوییگه کېلیب نهفقط کییم بویورتمه بېریشردی، بلکه اۉزی دردلرینی هم ایتیب بېرردیلر.
سکینه هېچ قندهی رسمی تعلیمسیز و جوده کم امکانیت بیلن اوی شرایطیده تیکووچیلیکنی باشلهدی. ایلک فقط اېسکی تیکوو ماشینی بیلن کونلیک روزغارینی تامینلشگه حرکت قیلردی. بیراق، وقت اۉتیشی بیلن اونینگ مهارتی آشدی و مجازلری هم کۉپهیدی.
سکینه شوندهی سۉزلهیدی: “مېن هېچ قچان بوندهی شرایطده ایشلشگه مجبور بۉلهمن دېب اۉیلهمهگن اېدیم. بیراق، بالهلریم آچ اېدی. اېندی اېسه کیمدن یاردم سۉرهمهی،عایلهمنی اۉز کوچیم بیلن باقهیاتگنیمدن فخرلنهمن.”
برچه حرکتلریگه قرهمهی، معمالر حلی هم کۉپ. قندوز ولایتیدهگی قیشلاقده برق تېز-تېز اوزیلهدی، تازه ایچیملیک سووی تاپیش قیین، بازارگچه بۉلگن یۉل اېسه خوفلی و تېکس اېمس. شونگه قرهمهی، سکینه نهفقط برداش بېردی، بلکه اېندی یورهگیده ینه کتتهراق آرزو کورتک اورهباشلهگندی.
او اۉزینینگ اوییده کم تامینلنگن و باش پناهسیز خاتین-قیزلر اوچون کیچیک تیکووچیلکی صنفی آچیشنی ایستهدی.
سکینه سۉزلرینی اوشبو شکلده افادهلهیدی: “اگر مېن هېچ نرسهدن بیرار نرسه یرهته آلگن بۉلسم، باشقهلر هم قیلهآلهدی. فقط کیم دیر بیزگه ایشانیشی کېرهک.”
حلی هم اونینگ یۉلیده کۉپلب قیینچیلیکلر بار. برقرار برق یۉقلیگی، محصولاتلرینی ساتیش اوچون یخشی بازار تاپیش قیینلیگی و باشقه معمالر. بیراق، او بری-بیر بیر کون کېلیب اۉرگنیش امکانیتنی یرهتیشگه امید قیلهدی.
سکینه حکایهسی فقط بیرته عیالنینگ حیاتی اېمس. بو قندوزده یشهیاتگن مینگلب عیالنینگ حیاتینی عکس اېتیرهدی. اولر جیملیک ایچیده حیات غیلدیرهگنی یېلکهلریده کۉتریب ، قرانغولیک ایچیده هم امیدنی تیریک سقلب کېلهیاتگن عیاللر دیر.
