۸ مارچ خلقارا خاتین-قیزلر کونی، دنیاده عیاللرنینگ حقوق، شأن و تېنگلیک اوچون آلیب بارهیاتگن کورهشینی اېسلهتیب تورهدیگن مهم کوندیر. اما دنیانینگ اَیریم جایلریده بو کون عیاللر اوچون فقط بیرهم اېمس؛ بلکه عذاب، صبر و قرشیلیک رمزی دیر. افغانستاندهگی عیاللر بوگون انه شو حقیقتنینگ اېنگ آغیر مثاللریدن بیرینی باشدن کچیرماقده.
سۉنگی ییللرده افغانستانده یوز بېرگن سیاسی اۉزگریشلر، اینیقسه عیاللرنینگ حیاتیگه چوقور تأثیر کۉرستدی. اۉقیشدن محنت حیاتیگچه، اجتماعی حیاتدن اساسی انسان حقوقلریگچه بۉلگن کۉپلب ساحهلرده عیاللرنینگ امکانیتلری جدّی روشده چېکلب قۉییلدی. مکتبلرنینگ یاپیلیشی، بیلیم یورتلرگه کیریشنینگ تۉسیلیشی، کۉپلب کسب ساحهلریده ایشلشنینگ تعقیقلهنیشی و خاتین-قیزلرنی یشم میدانلریده کۉرینیشنینگ چېکلهنیشی افغانستان عیاللرینی اویلریده حبس بۉلیشگه محکوم اېتدی.
حالبوکه عیال اجتماعنینگ فقط بیر اعضاسی اېمس؛ بلکه اۉشه اجتماعنینگ کېلهجگینی تربیهلهیدیگن اېنگ مهم کوچ دیر. آنهنینگ تعلیمی — بیر ملتنینگ تعلیمی دېمک دیر. عیاللری سکوتگه مجبور قیلینگن، تعلیمدن اوزاقلشتیریلگن و اجتماعی حیاتدن اوزیلگن خلقنینگ رواجلهنیشی ممکن اېمس. تاریخ دوامیده کوچلی سوسیالیستی فعالیتلر اساسیده بیلیملی، شأنلی و فعال عیاللرنینگ بۉلگنلیگی کۉرینهدی.
بوگون افغانستان عیاللری آغیر شرایطلرده حیات اوچون کورهش آلیب بارهر اېکنلر، اصلیده اولر فقط اۉز حقوقلری اوچون اېمس، بلکه انسانیتنینگ عمومی وجدانی اوچون هم بیر سیناودن اۉتماقدهلر. دنیانینگ قهیېریده بۉلیشیدن قطعی نظر عیاللرنینگ شأنی، خوفسیزلیگی و تعلیم آلیش حقوقی حمایه قیلینیشی کېرهک. چونکه عدالت فقط بیر حدودده اېمس، بلکه بوتون انسانیت اوچون موجود بۉلگنده حقیقی معناسینی تاپهدی.
۸ مارچ مناسبتی بیلن افغانستاندهگی عیاللر باشدن کېچیرهیاتگن قیینچیلیکلرنی اېسلش و اولرنینگ سیسی بۉلیش انسانی بورچ دیر. سیسی اۉچیریلگن عیاللرنینگ سیسی بۉلیش، اولرنینگ تعلیم آلیش، ایشلش و شأن بیلن یشش حقوقینی حمایه قیلیش وجدانلی هر بیر انساننینگ وظیفهسی دیر.
اونوتمسلیک کېرهک که، عیاللری کوچلی بۉلگن خلقلر هم کوچلی بۉلهدی. عیاللری اېرکین بۉلگن خلقلر رواجلنهدی. عیاللری امید بیلن یشهی آلهدیگن دنیالر اېسه ینهده عدالتلی و ینهده انسانی بۉلهدی.
شو سببلی ۸ مارچ فقط بیرهم اېمس؛ بلکه افغانستاندهگی و دنیانینگ تورلی حدودلریدهگی برچه عیاللرنینگ شأن، عدالت و اېرکینلیک اوچون آلیب بارهیاتگن کورهشینی اېسلش و قۉللب-قوّتلش کونی دیر.
عیاللرنینگ آوازینی اۉچیریش ممکن اېمس، اولرنینگ امیدینی یۉق قیلیب بۉلمهیدی. چونکه عیال — حیاتنینگ اۉزی دیر.
