روح افزا نادری ۱۳۷۷- ییلده اېران مملکتیده معرفتلی و ضیالی عایلهده دنیاگه کېلدی.
اونینگ بالهلیگی اېراننینگ چنگلی و قویاشلی کۉچهلریده اۉتدی و باشلنغیچ تعلیمینی هم اۉشه مملکتده باشلهدی. حلی هم ینگی کتابلرنینگ هیدی و تنفس قۉنغیراغینینگ آوازی اونینگ خاطرهسیده جانلی سقلهنیب قالگن اېدی.
۱۳۸۹-ییلده نادری عایلهسی افغانستانگه قَیتیب کېلدی. بو قَیتیش روح افزا اوچون آسان بۉلمهدی؛ همه نرسه ینگی و باشقهچه اېدی: لهجهلر، محیط، صنفداشلر و حتا درس اۉقیش اسلوبی هم. شونگه قرهمهی، او صبر-طاقت بیلن اۉزینی ینگی شرایطگه ماسلشتیریشگه حرکت قیلدی.
او اۉرته مکتب و لیسه دورینی محنت بیلن دوام اېتتیردی و ۱۳۹۵-ییلده بیبی آمنه لیسهسینی توگهتدی.
اۉشه کون فقط دیپلوم آلیش کونی اېمس، بلکه اونینگ تعلیم یۉلیدهگی کتّه قدم هم اېدی.
بیر ییل اۉتیب او یونیورسیتیگه کیریب، فارس-دری تیلی و ادبیاتی دیپارتمنتیده تحصیل آله باشلهدی.
ادبیات اونینگ اوچون فقط بیر تعلیم یۉنهلیشی اېمس اېدی؛ او سۉزلر، تویغولر و فکرلر عالمی اېدی. او شعرلرنی جان بیلن اۉقیر، نثرلرنی اېسه قلب بیلن انگلر اېدی؛ بعضاً سۉزلر اونینگ اوچون رسّامچه بوم باشیگه قۉنگن رنگلر کبی تویولردی.
اما اونینگ اساسی قیزیقیشی بالهلیکدن رسم صنعتی اېدی. او قلمنی قۉلیگه آلگن پیتدن باشلب دفترلر، حتا دېوارلر هم اونینگ چیزمهلری بیلن تۉلیب کېتردی: چهرهلر، طبیعت منظرهلری و حتا اۉز تویغولرینی عادي چیزیقلر بیلن تصویرلر اېدی. او هر دایم بیر کون کېلیب رسم صنعتینی پروفیشنل طرزده اۉرگهنیب، کېلهجکده رسّام صفتیده تنیلیشنی آرزو قیلردی.
بیلیم یورت دوریده او قوندوز ولایتیده یشاوچی بیر خطاط و رسّام استاذ بیلن تنیشدی؛ او صنعت گروهینینگ اعضاسی اېدی.
روح افزا اۉز محنتی و مهارتی بیلن اوشبو گروهگه اعضا بۉله آلدی و بیر مدت ینگی تشکیل اېتیلگن بو صنعت گروهینینگ اعضاسی بۉلدی؛ امید و الهام بیلن ایش باشلهگن گروه اېدی. اولر کۉپلب فعالیتلر آلیب باردیلر، جملهدن چیرایلی دېواري رسملر، معناگه بای تصویرلر، صنعت و رسم کۉرگزمهلرینی تشکیل قیلیش و باشقهلر.
اما بو صنعت گروهی اوزاق دوام اېتمهدی. مالیوی سببلر و اجتماعی معمالر طفیلی، رژیم اۉزگرگندن سۉنگ گروه تېز آرهده اۉز فعالیتینی تۉختهتدی. شونگه قرهمهی، او اۉرگهنیش یۉلینی دوام اېتتیردی و رسم صنعتینی اۉز-اۉزینی اۉقیتیش آرقهلی دوام اېتتیردی. او ساعتلب صنعتکارلرنینگ اثرلرینی تماشا قیلر، مشق قیلر و قطعیت بیلن اۉز مهارتینی رواجلنتیرر اېدی.
هر بیر چیزگن رسمی اونینگ اوچون بیر حکایه اېدی: بعضاً افققه قرهب تورگن قیز، بعضاً اېسه سکوت ایچیده کوچ بیلن تورگن عیال چهرهسی. صنعت اونینگ اوچون آواز بیلن ایته آلمهیدیگن حس-تویغولری و سۉزلرینی افاده اېتیش واسطهسی اېدی.
حیات شرایطلری «مشهور رسّام بۉلیش» آرزوسینینگ رسمی طرزده عملگه آشیشیگه تۉسقینلیک قیلگن بۉلسه هم، اونینگ قیزیقیشی و قطعیتی سۉنمهدی. او حلی هم قۉلیده قلم بیلن بالهلیکدهگی اۉشه شجاعت و قووانچنی حس قیلهدی و صنعت همده اۉرگنیشنینگ اوزاق یۉلینی دوام اېتتیرماقده. صنعت هنوز اونینگ حیاتینینگ تیریک و نفس آلهیاتگن بیر قِسمی بۉلیب قالماقده.
روح افزا نادری برچه قیینچیلیکلرگه قرهمهی حلی هم امیدینی یۉقاتمهگن. او صنعت یۉنهلیشیده تعلیمینی دوام اېتتیریب، اۉز مهارتینی پروفیشنل درجهده اۉرگهنیشنی ایستهیدی. او چیزگن هر بیر رسم اونینگ آرزولری سری قۉییلگن بیر قدم دیر. امیدگه تۉله قلب و مستحکم اراده بیلن او صنعت و ایجاد یۉلینی دوام اېتتیریشگه تیار و بیر کون کېلیب اونینگ اثرلری اۉز حس-تویغولری همده حیات حکایهسینینگ آوازینی دنیاگه یېتکزهدی.
