قندوز شهرینینگ جیم تار کۉچهلریدن بیریده کیچکینه یاغاچ اېشیکلی عادی بیر اوی بار. شو اویده نجیبه آتلی خاتین جیم کولگوسی و امیدگه تۉله قرهش بیلن حیاتنی ایگینه و ایپ بیلن تیکیب کېلماقده.
نجیبه ۴۲ یایشیده. او، بېش فرزندنینگ آنهسی. بېش ییلدن آرتیق بۉلهدی که، اونینگ تورموش اۉرتاغی نشه قیلووچی مادهلرگه معتاد بۉلیب قالگن. اۉشه پیتده او عادی اوی بېکهسی اېدی و هېچ قندهی درآمد منبعی یۉق اېدی.
نجبیه شوندهی دېدی: “تورموش اۉرتاغیم نشه قیلووچی مادهگه چلینگنیدن کېین، ایشلهمس اېدی و بیزنی ترک اېتدی. برچه نرسه توگهدی، دېب اۉزیم بیلن اۉیلر اېدیم. حتی بالهلریم نینگ اېرتهگی نانینی قهیېردن تاپیشنی بیلمس اېدیم و امیدسیز بۉلگن اېدیم.”
نجبیه هرکونی کۉپلب قیینچیلیکلرگه دوچ کېلردی. اونینگ اېری دایما مست حالده اویگه کېلیب، نجیبه و بالهلرینی کتلکلر اېدی. اوی بویوملرینی ساتیب، نشه قیلووچی ماده ساتیب آلردی.
نجیبه و اونینگ فرزندلری هرکونی اېرینینگ آزار و زوروانلیگیگه یوزلرشدی. اېری نهفقط ایشلهمس اېدی، بلکه نجیبهدن اونگه پول تاپیب بېریشنی هم طلب قیلردی.
نجیبهگه اېسه هېچ قندهی درآمد یۉق اېدی. او بیر نېچه بار حیاتینی دوام اېتیریش اوچون اکهلریدن و قۉشنیلریدن قرض آلیشگه مجبور بۉلگن.
هرکون حیات اونینگ اوچون تاباره آغیرلشیب بارردی. بیر تماندن اوی و بالهلرنینگ آزیق-آوقت خرجتی، ایکّینچی تاماندن اېرینینگ یمان احوالی نجیبهنینگ حیاتنی ینهده قیینلشتیرردی. بیراق، بو واقعهنینگ آخری حلی بو اېمس اېدی.
شو طرزده حیات دوام اېتیب تورگن پیتده، نهایت نجیبه ایشلش کېرهک دېگن قرارگه کېلدی. او فرزندلرینینگ روزغارینی تامینلش اوچون تیکووچیلیک قیلیشنی اۉیلهدی. بیراق، اونینگ حتی تیکوو ماشینی یۉق اېدی و تیکووچیلیک بۉییچه کتّه تجربهسی هم یۉق اېدی.
شو آرهده اېری هم اویینی ترک اېتدی و اوندن هېچ قندهی خبر بۉلمهدی. نجیبه و اونینگ بالهلری بوتونلهی باقووچیسیز قالدی.
نجبیه شونی توشوندی که، اېندی اونینگ تهینچی یۉق و ایشلشدن باشقه چارهسی هم قالمهگن. شونده او، ایشلشگه قرار قیلدی و فرزندلریگه حلال بیر لقمه نان تاپیب بېریش اوچون تیکووچیلیکنی باشلشنی اۉیلهدی.
نجیبه قۉشنیلردن تیکوو ماشین سۉرهدی. نهایت قۉشنیلردن بیری اونگه اېسکی بیر تیکوو ماشینینی قرضگه بېریب:” سینب کۉر، بلکه بیر ایش قیلهآلرسن”، دېدی.
اۉشه کونلرده نجیبه محلهدهگی خاتینلرنینگ بیریدن تیکووچیلیکنی اۉرگنه باشلهدی. اول ایشینی قۉشنیلرنینگ اېسکی کییملرینی توزهتیشدن باشلهدی. کېینراق، خاتینلر کییملرینی تیکیشنی اۉرگندی و سېکین-سېکین بالهلر کۉیلکلرینی هم تیکیشنی اۉزلشتیردی.
او جوده آغیر کونلرنی باشدن کېچیردی، بیراق وقت اۉتیشی بیلن اونینگ ایشی سېکین-سېکین یوریشه باشلهدی.
او شوندهی دېدی: “ایلک بار ایشلریم جوده قیین اېدی چونکه کۉپچیلیک بیر عیال، اینیقسه باقووچیسیز عیال، حیاتنی اۉزینی ایلگری آلیب کېتیشده ایشانمس اېدیلر. بیراق، استه-سېکین معجزهلر تاپه باشلهدیم، اینیقسه تۉیلر اوچون کۉیلیکلر تیکنیمده و چیرایلی بزم کییملرینی تیکیشنی باشلهگنیدن کېین.”
نجیبه تیکووچیلیک ایشینی قۉشنی خاتیندن قرضگه آلگن اېسکی بیر تیکوو ماشینی بیلن باشلهکن اېدی. او تیکووچیلیکنی اۉرگندی و بو صنعتنی حیاتیدهگی برچه قیینچیلیکلر و بختسیزلرگه قرشی اېنگ کتته امید دېب بیلدی.
او تیکووچیلیک اۉرگنیب آلگچ، اویی نینگ آلدیگه تیکووچیلیک لوحهسینی آسدی.
دستلبک اونگه یقین اۉرتاغلری، قۉشنیلری و قرینداشلری کییم تیکیش اوچون بویورتمه بېره باشلهدی. وقت اۉتیشی بیلن مجازلر اونینگ تیککن کییملریدن ممنون بۉلیشدی و شو سببلری مجازلری تاباره کۉپیب باردی. نجیبه ینهده چیرایلی و صفتلی کییملر تیکیشنی اۉرگندی. تورلی بیرهم و مراسملری اوچون کییملر تیکیب، کۉپراق درامد تاپه باشلهدی.
تیکووچیلیکدن تاپگن پولی بیلن قرضلرینی تۉلشگه موفق بۉلدی. اویینینگ و فرزندلرینینگ کوندهلیک خرجتلرینی تامینلهدی همده سېکین-سېکین پوللرینی کېلهجکده یخشیراق حیات قوریش اوچون ییغدی.
بیراق شونگه قرهمهی، او تورموش اۉرتاغینینگ تقدیری حقیده قیغورردی. او قهیېرده اېکنینی و نیمه قیلهیاتگنینی بیلمسدی.
باشقه تاماندن، اویده باقووچی اېرکنینگ یۉقلیگی هم کتته معما اېدی. نجیبه برچه معمالرنی یالغیز اۉزی حل قیلیشگه مجبور اېدی. بودن تشقری، بالهلری حلی کیچکینه بۉلگنی و اوی اېرککسیز بۉلگنی سببلی ، ایریم قۉشنیلر و قرینداشلرنینگ شبههلی قرهشلری و یمان سۉزلرینی هم چیدهم بیلن کۉتریشگه تۉغری کېلردی.
برچه قیینچیلیکلرگه قرهمهی، نجیبه اۉز حرکتلریدن واز کېچمهدی و تیکووچیلیک ایشینی ینه-ده کېنگیتیردی.
حاضر اېسه او تیکووچیلیک بیلن بیرگه، ینه تۉرت کیشی قیزگه هم تیکووچیلیکنی اۉرگتماقده. بو قیزلر اویده قالیب کېتگن، اۉقیشگه باریشگه رخصت بېریلمهگن قیزلر دیر. حتی نجیبهنینگ ۱۵ یاشلی قیزی مکتبدن قالیب کېتگن بۉلسه-ده، آنهسینینگ یانیده ایشلب، تیکوچیلکنی اۉرگنماقده.
اونینگ شاگردلری هم کم تامینلنگن عایلهلردن بۉلیب، اېندی اولر هم اۉز محنتی آرقهلی اویلرینینگ خرجتلرینی بیر قسمنی تامینلهماقده. “شاگردلریدن بیر-بیلقیس شوندهی دېدی: ؛اگر نجیبه اپه مېنگه تیکووچیلیکنی اۉرگتمگنیده، مېن اوچون هېچ قندهی یۉل یۉق اېدی. حاضر اېسه اۉزیم کییم تیکهمن ،یخشی درامد تاپهمن و حتی سینگلیمگه هم تیکووچیلیکنی اۉرگتهمن.”
نجیبه ایشانهدی که، خاتینلر هم موقیتیگه اېریشه آلهدی-فقط حرکت قیلیشلری، امیدسیز بۉلمسلیکلری کېرهک. اونینگ فکریچه، خاتینلرگه امکانیت بېرلیشنی و قۉللب-قوتلنیشی جوده مهم.
او بیر کونی قندوزده خاتینلر اوچون تیکووچیلیک اوستاخانهسی و کسبی اۉقوو مرکزی آچیشنی آرزو قیلهدی. شونده ینه کۉپلب قیزلر و خاتینلر اویده ایشسیز اۉتیریب قالمسدن، صنعت اۉرگنیب اۉز حیاتینی اۉزگرتیده آلهدی.
نجیبهنینگ ایتیشیچه، اگر عادیگینه بیر تیکوو ماشینی اونینگ حیاتنی اۉزگرتیرهآلگن بۉلسه، نېگه ینه اۉنلب تیکوو ماشینلر یوزلب خاتینلرنینگ حیاتینی اۉزگرتیرهآلمهسین؟
خاتین قیزلر محنتی بازارده کمراق امکانیتگه اېگه بۉلگن جمعیتده، نجیبه اۉزینینگ محنتی، مستقللیگی و جسارتی بیلن اۉز حدودیدهگی باشقه خاتینلر اوچون امید تمثالیگه ایلنگن.
