ایران عامهوي اخبارات واسطهلرینینگ خبر بېریشیچه، «محمدمعصوم شاهي» و «حمید ولیدي» اسرایل اوچون جاسوسلیک قیلیشده عیبلنیب، اعدام اېتیلگن.
ایران محکمه تیزیمیگه یقین بۉلگن «میزان» اخبارات آژانسی معلوماتیگه کۉره، ایران عالي محکمه ارگانی تامانیدن چیقریلگن اۉلیم حکمی بوگون تانگده (دوشنبه، ۳۱-حمل) اجرا اېتیلگن.
خبرده ایتیلیشیچه، اوشبو شخصلر انترنیت و اجتماعي ترماقلر آرقهلی همده عراق کردستانی حدودیگه سفر قیلیش آرقهلی موساد خادملری بیلن علاقه اۉرنتگن. اولر کېینچهلیک «تروریستیک عملیاتلر بۉییچه تیارگرلیکدن اۉتیب»، ینه اېرانگه قَیتگن.
«میزان» نینگ یازیشیچه، اولر بیر قطار حرکتلرنی عملگه آشیرگن، جملهدن حربي و جماعت جایلریگه اۉت قۉییش کبی فعالیتلر. شونینگدېک، اولرگه ایران پایتختی تهراندهگی ایکّی هدفگه هجوم قیلیش وظیفهسی بېریلگن.
شونینگدېک، اولر تهرانده۱۰ته تیار پارتلاوچی قوریلمه بیلن قۉلگه آلینگنی، اولر نینگ اویلریده اېسه پارتلاوچی مادّهلر و مینامیات یهسهشگه عاید ماتریاللر تاپیلگنی بیلدیریلگن.
اولر «محاربه»، «دشمن دولتلر بیلن همکارلیک»، «ملي خوفسیزلیککه قرشی فتنه»، «ترور گروهیگه اعضالیک» و «تیزیمگه قرشی ترغیبات» کبی عیبلاولر بیلن محکمه قیلینیب، اۉلیم جزاسیگه حکم قیلینگن. ایران حکومتی اوّل هم شونگه اۉخشهش عیبلاولر بیلن کۉپلب آدملرنی اعدام قیلگن اېدی.
انسان حقوقلری تشکیلاتلری اېسه اۉلیم جزاسی انسان حقوقلرینی بوزیش دېب حسابلب، ایران حکومتیدن بوندهی جزالرنی تۉختهتیشنی طلب قیلیب کېلماقده.
