طالبلرنینگ نورستان ولایتیدهگی کانلر و پطرولیم باشقرمهسی دوآب اولسواللیگی کانلریدن قزیب آلینگن قیمتبها و یریم قیمتبها تاشلرنی۵۲ میلیون۶۲۰ مینگ افغاني قیمتیده ساتگنینی معلوم قیلدی.
طالبلر کانلر و پطرولیم ریاستی باشلیغی سید رحیم عمیرنینگ ایتیشیچه، اوشبو تاشلر شنبه کونی (۲۶ثور) دوآب اولسواللیگیده ایچکی و خارجي سوداگرلر اشتراکیده اۉتکزیلگن «آچیق سودا» آرقهلی ساتیلگن.
اونینگ قۉشیمچه قیلیشیچه، ساتیلگن تاشلر آرهسیده بیروج، کونزایت و مارگنیت موجود بۉلیب، اولر دوآب اولسواللیگی «ماوی» کانیدن قزیب آلینگن.
او تاشلرنینگ انیق آغیرلیگینی ایتمهگن، بیراق اولرنی ساتیشدن توشگن 5 میلیون۲۲۶ مینگ افغاني طالبان خزینهسیگه اۉتکزیلگنینی بیلدیرگن.
طالبان قیمتبها و یریم قیمتبها تاشلر قزیب آلووچی کمپنیلردن۱۰ فایز مقداریده سالیق آلهدی.
طالبان افغانستانده قَیته حاکمیتگه کېلگنیدن سۉنگ، مملکت نینگ تورلی حدودلریده قیمتبها تاشلر قزیب آلیش و اولرنی ساتیش جریانینی تېزلشتیرگن.
بیراق مخالفلر بو جریانلرنی «کانلر نینگ تالان-تاراج قیلینیشی» دېب اتهب، خلقارا حکومتلر و کمپنیلرنی طالبان بیلن شفّاف بۉلمهگن شرطنامهلرده اشتراک اېتمسلیککه چقیریب کېلماقده.
