ایران تشقی ایشلر وزیری عباس عراقچی امریکا قۉشمه ایالتلری جمهور رییسی دونالد ترامپنینگ سۉنگگی بیاناتلریگه مناسبت بیلدیریب، اگر امریکا اوروشگه قَیتسه، جوده کۉپ «کوتیلمهگن حالتلر»گه دوچ کېلیشینی ایتدی.
عراقچی بوگون تانگده چهارشنبه، ۳۰-ثور ایکس اجتماعی ترماغیده یازیشیچه، ایران قوراللی کوچلری دنیاده بیرینچی بۉلیب امریکانینگ مشهور ف-35 قیرووچی اوچاقینی اوریب توشیرگن حربي کوچ حسابلنهدی.
اونینگ یازیشیچه، ایرانگه قرشی اوروش باشلنگنیدن بیر نېچه آی اۉتیب، امریکا کانگرسی میلیاردلب دالر قیمتیدهگی اۉنلب اوچاقلر یۉق قیلینگنینی تن آلگن.
عراقچی شوندهی دېدی: «اېندی رسماً تصدیقلندیکی، بیز نینگ قدرتلی قوراللی کوچلریمیز دنیاده بیرینچی بۉلیب ایلغار و مشهور ف-35 قیرووچی اوچاقینی اوریب توشیردی.»
ایران تشقی ایشلر وزیری اوروش ینه باشلنیشی ممکنلیگیدن آگاهلنتیریب، ایران اوّلگیدن هم کوچلیراق تیارگرلیککه اېگه اېکنینی تأکیدلهدی.
او شوندهی یازدی: «بیز آلگن سبقلر و قۉلگه کیریتگن تجربهلریمیز بیلن ایشانچ حاصل قیلینگکی، اگر اوروش میدانیگه ینه قَیتیلسه، سیز بوندن هم کتّه شگفتلرگه دوچ کېلهسیز.»
باشقه تاماندن، امریکا جمهور رییسی دونالد ترامپ تیناوون ژورنالیستلر بیلن صحبتده ایرانگه قرشی هجوم سهشنبه کونی باشلنیشی رېجهلشتیریلگنینی معلوم قیلدی. اما اونینگ ایتیشیچه، قطر، سعودی عربستان و بیرلشگن عرب امیرلیگی التماسیگه کۉره، رېجهلشتیریلگن هجوم ایکّی-اوچ کونگه کېچیکتیریلگن.
ترامپ، اگر ایران شو مدت ایچیده ینه کېلیشووگه اېریشمسه، امریکا اوردوسی کېنگ کۉلملی هجوملرگه تیار اېکنینی هم تأکیدلهدی.
